ខេត្តបាត់ដំបង៖ ប្រភពពីសមត្ថកិច្ចបានឲ្យដឹងថា ក្រុមចោរដែលគេមិនស្គាល់អត្តសញ្ញាណចំនួន០៣នាក់ ប្រដាប់ដោយកាំភ្លើងខ្លី និងកាំបិត បានសម្រុកចូលភ្ជង់ប្លន់ស្ត្រីម្នាក់យកគ្រឿងអលង្ការនិងប្រាក់អស់គ្មានសល់ កាលពីវេលាម៉ោង៥និង៣០នាទីព្រឹកថ្ងៃទី០៤ មីនា នេះ ស្ថិតនៅចំណុចភូមិបាសែត ឃុំតាប៉ុន ស្រុកសង្កែ ដែលជាតំបន់សំបូរទៅដោយបនល្បែងស៊ីសងច្រើនបំផុត រួចគេចខ្លួនដោយសុវត្ថិភាពមិនរំខានដល់សមត្ថកិច្ចឡើយ ។
ប្រភពបានឲ្យដឹងថា ក្រុមចោរហារយបានប្រើកាំភ្លើងខ្លី និងខ្លះប្រើកូនកាំបិតភ្ជង់ក្បាលជនរងគ្រោះផង ភ្ជង់ចង្កេះផង ជាមួយនឹងការគំរាមសម្លា.ប់ បើមិនព្រមប្រគល់ប្រាក់ និង គ្រឿងអល័ង្ការឲ្យពួកគេ ។ ស្ត្រីរងគ្រោះឈ្មោះ ម៉ៅ ចំរើន ភេទស្រីអាយុ៣៦ឆ្នាំ រស់នៅចំណុចកើតហេតុខាងលើ។
បើតាមស្ត្រីរងគ្រោះរូបនេះបានរាយការណ៍ប្រាប់សមត្ថកិច្ចកិច្ចថា ក្រុមទាំង០៣នាក់នោះ គាត់ហាក់មិនស្គាល់ភិនភាគទេ ។ ពួកវាបានសម្រុកចូលផ្ទះគាត់ទាំងព្រលឹមអុរ ហើយគ្នាវាម្នាក់បានដកកាំភ្លើងខ្លីភ្ជង់ក្បាលគាត់ ខណៈម្នាក់ទៀតបានដកកូនកាំបិតភ្ជង់ចង្កេះរហូតធ្វើឲ្យរហែកអាវគាត់។
អ្នកស្រីម៉ៅ ចំរើន ត្រូវបានសមត្ថកិច្ចស្រង់សំដីទៀតថា ពេលនោះ ពួកវាបានគំរាមសម្លាប់គាត់ បើមិនព្រមប្រគល់លុកកាក់និងគ្រឿងអលង្ការដែលគាត់ពាក់ជាប់ខ្លួន សូម្បីតែស្រែករកជំនួយពីអ្នកជិតខាង ក៏ពួកវាហាមដែរ។ ដោយសារភ័យនឹងការគំរាមស.ម្លាប់ ទើបគាត់ព្រមដោះខ្សែ.ក ខ្សែដៃ និង លុយកាក់បន្តិចបន្តួចប្រគល់ឲ្យពួកចោរទាំងអស់តែម្ដង។
ក្រោយពីប្លន់បានសម្រេច ពួកចោរក៏គេចខ្លួនបាត់ស្រមោល ហើយគាត់ក៏បានស្រែកប្រាប់អ្នកជិតខាង និង ផ្ដល់ដំណឹងទៅសមត្ថកិច្ចភ្លាមៗដែរ។ បើយោងតាមរបាយ
ការណ៍បឋមរបស់សមត្ថកិច្ច ដែលកោះសន្តិភាពទទូលបាន ទ្រព្យសម្បត្តិដែលជនរងគ្រោះបានបាត់បង់ ដោយសារក្រុមចោរហារយភ្ជង់ប្លន់ទាំងព្រឹកនោះមាន ខ្សែដៃមាស១ខ្សែ ទម្ងន់១ដំឡឹង ខ្សែកប្លាទីន១ខ្សែដែលមានតំលៃជិត៣លានរៀល ប្រាក់ខ្មែរចំនួនជាង៦០ម៉ឺនរៀល ប្រាក់ដុល្លាចំនួន១០០ដុល្លារ និងប្រាក់ថៃចំនួន២ម៉ឺនបាត។
ជុំវិញករណីក្រុមចោរហារយសម្រុកចូលប្លន់អ្នកភូមិទាំងព្រឹកខាងលើនេះ សមត្ថកិច្ចហាក់ព្យាយាមបិទជិតឈឹងតែម្ដង។ មន្ត្រីខ្លះមិនហ៊ានហើបមាត់ទេ នៅពេលសាកសួរអំពីហេតុការណ៍នេះ បើទោះជាបានចុះទៅកាន់កន្លែងកើតហេតុហើយក្ដី។ រីឯលោកមន្ត្រីដទៃទៀត បានត្រិមឆ្លើយតបវិញត្រិមពាក្យដដែលៗថា «សមត្ថកិច្ចកំពុងធ្វើការស្រាវជ្រាវ»។
បើតាមប្រភពពីអ្នកភូមិបានឲ្យដឹងថា សព្វថ្ងៃនេះនៅក្នុងស្រុកសង្កែ សំបូរទៅដោយបនល្បែងស៊ីសងពេញទឹកពេញដី។ ជាពិសេស នៅក្នុងទឹកដី ឃុំតាប៉ុន តែម្ដងដែលសំបូរបនល្បែងច្រើនជាងគេ។ ប្រភពដដែលបានបញ្ជាក់ថា ល្បែងស៊ីសងដែលកំពុងបើកប្រណាំងប្រជែងគ្នានៅក្នុងទឹកដី ស្រុកសង្កែនេះគឺ «ល្បែងបញ្ជល់មាន់» តែម្ដង។ កន្លែងសង្វៀនមាន់ខ្លះ ត្រូវគេដឹងថា សមត្ថកិច្ចមូលដ្ឋានជាអ្នកបើកផ្ទាល់ ឬ ចាំកាងពីក្រោយខ្នង។
អ្នកភូមិនិយាយថា មូលហេតុដែលអ្នកញៀននឹងល្បែងបញ្ជល់មាន់ ចូលចិត្តបើកល្បែងនេះ និង លើកគ្នាបីមាន់ទៅជល់នៅតាមសង្វៀននានា នៅក្នុងទឹកដីស្រុកសង្កែ ដោយសារតែនៅក្នុងស្រុកសង្កែ មានភូមិសាស្ត្រល្អ ធានាបាននូវសុវត្ថិភាព ព្រោះសង្វៀនខ្លះមានមុខមន្ត្រីមូលដ្ឋានស្រែកហោរកញ្ជៀវយ៉ាងសប្បាយដែរ។ ដូច្នេះអំពើចោរកម្ម និង ចោរប្លន់ ដែលតែងកើតឡើងជាបន្តបន្ទាប់កន្លងទៅនេះ គឺអាចផ្ដើមចេញពីបនល្បែង និង ការប្រព្រឹត្តគ្រឿងញៀន។
បើនិយាយពីអំពើ«ប្លន់»នេះ ពេលនេះ ហាក់កំពុងកំរើកយ៉ាងខ្លាំង គួរឲ្យព្រួយបារម្ភបំផុត នៅខេត្តបាត់ដំបង ខណៈការទប់ស្កាត់ ឬ ការបង្ក្រាបក្រុមចោរ«ប្លន់» នេះ សមត្ថកិច្ចនៅតែងងិតឈឹងនៅឡើយ បើទោះជាមន្ត្រីជំនាញខ្លះអះអាងថា មានតម្រុយព្រាលៗហើយក្ដី។
ជាមួយនឹងបទល្មើសដែលកំពុងផ្ទុះឡើងស្ទើរគ្រប់រូបភាព ស្ទើរគ្រប់ទីកន្លែងបែបនេះ លោកស្នងការខេត្ត មិនគួរបណ្ដែតបណ្ដោយឲ្យមន្ត្រីក្រោមឪវ៉ាត។ ជាពិសេស មន្ត្រីនៅតាមមូលដ្ឋាន បើកបនល្បែងស៊ីសងព្រោងព្រាតបែបអាវ៉ាសែបែបនេះទេ ។ កុំចាំដល់មានការរិះគន់ ឬ គេថតទីតាំងល្បែងផុសតាមបណ្ដាញសង្គម ទើបលោកស្នងការធ្វើជាភ្ញាក់ផ្អើលចុះបង្ក្រាប ក្រោមហេតុផល «មិនបានដឹង»៕
ចែករំលែកព័តមាននេះ