រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នាវេលាម៉ោងប្រមាណ៩ព្រឹកថ្ងៃទី ៤ មីនា ឆ្នាំ ២០២១ ផ្ទះ និងហាងនៅជុំវិញផ្សារទំនើបរតនាផ្លាហ្សាត្រូវបានបិទទ្វារ…
រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នាវេលាម៉ោងប្រមាណ៩ព្រឹកថ្ងៃទី ៤ មីនា ឆ្នាំ ២០២១ ផ្ទះ និងហាងនៅជុំវិញផ្សារទំនើបរតនាផ្លាហ្សាត្រូវបានបិទទ្វារ ហើយមន្ត្រីនៃមន្ទីរសុខាភិបាលបានចុះមកយកសំណាកអ្នកដែលពាក់ព័ន្ធជាជនជាតិចិន នៅតាមផ្ទះ និងហាងជុំវិញផ្សារទំនើបនោះទៅពិនិត្យ បន្ទាប់ពីរកឃើញករណីវិជ្ជមានកូវីដ-១៩ លើជនជាតិចិនចំនួន ២នាក់ ដែលមកព្យាបាលនៅបន្ទប់ពិគ្រោះ និងព្យាបាលជំងឺទូទៅ ក្នុងឧសថស្ថានរងក ជីនប៉ោឆេង ផ្ទះលេខ២៧ និង២៩ ផ្លូTV បុរីកាណាឌីយ៉ា ក្នុងភូមិចុងថ្លង់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ កាលពីវេលាយប់ថ្ងៃទី៣ មីនា ឆ្នាំ២០២១។
ទោះបីជាយ៉ាងណា ផ្សារទំនើបរតនាផ្លាហ្សា គឺពុំត្រូវបានបិទនៅឡើយទេ ហើយនៅជុំវិញផ្សារទំនើបនេះគឺសុទ្ធតែជាផ្ទះ និងហាងជនជាតិចិនដែលបើកលក់ដូររកស៊ី ត្រូវបានបិទទ្វារ ចំណែកជនជាតិចិនត្រូវបានមន្ត្រីមន្ទីរសុខាភិបាល និងអាជ្ញាធរបានណែនាំឱ្យធ្វើចត្តាឡីស័ក ព្រមទាំងយកសំណាកទៅធ្វើការពិនិត្យផងដែរ ។
សូមបញ្ជាក់ថា នៅវេលាម៉ោងប្រមាណ៨ជិត៩យប់ថ្ងៃទី៣ មីនា ឆ្នាំ២០២១ បានរកឃើញករណីវិជ្ជមានកូវីដ-១៩ បន្ទាប់ពីមានអ្នកជំងឺជាជនជាតិចិន២នាក់បានមកព្យាបាលនៅចំណុចបន្ទប់ពិគ្រោះ និងព្យាបាលជំងឺខាងលើនោះ ហើយក៏ធ្វើតេស្តរកឃើញករណីវិជ្ជមានវីរុសឆ្លងមួយនេះ និងត្រូវបានខាងមន្ទីរពេទ្យយកទៅព្យាបាល ហើយក្រោយមកតំបន់ជុំវិញនោះក៏ត្រូវបានហាមឃាត់ ។
លុះព្រឹកឡើងទើបសមត្ថកិច្ច និងអាជ្ញាធរមូលដ្ឋាន ព្រមទាំងមន្ត្រីសុខាភិបាលបានសហការគ្នាចុះប្រមូលជនជាតិចិនប្រមាណ១០០នាក់ដែលនៅជុំវិញនោះ ដើម្បីយកសំណាកទៅពិនិត្យ ។ ព័ត៌៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ