ប្រទេសមីយ៉ាន់ម៉ា ៖ អ.ស.បរាយការណ៍ថា មនុស្សដល់ទៅ៣៨នាក់បានត្រូវបាត់បង់ជីវិត កាលពីថ្ងៃទី៣ ខែមីនា ឆ្នាំ២០២១ ក្នុងការបង្ក្រាបបាតុកម្ម ប្រឆាំងរដ្ឋប្រហារយោធាកាលពីថ្ងៃទី១ ខែកុម្ភៈ…
ប្រទេសមីយ៉ាន់ម៉ា ៖ អ.ស.បរាយការណ៍ថា មនុស្សដល់ទៅ៣៨នាក់បានត្រូវបាត់បង់ជីវិត កាលពីថ្ងៃទី៣ ខែមីនា ឆ្នាំ២០២១ ក្នុងការបង្ក្រាបបាតុកម្ម ប្រឆាំងរដ្ឋប្រហារយោធាកាលពីថ្ងៃទី១ ខែកុម្ភៈ ដែលនោះជាទិវាដ៏បង្ហូរឈាមធំបំផុតមួយ ក្នុងប្រទេសនេះចាប់តាំងពីពួកយោធាដណ្ដើមអំណាចមក។
សាក្សីទាំងឡាយបាននិយាយថា ប៉ូលិស និងកងទ័ពបានបាញ់គ្រាប់ពិតលើពួកអ្នកតវ៉ា។ សកម្មជនវ័យក្មេងម្នាក់អះអាងប្រាប់រ៉យទ័រថា ពិតជាសែនទារុណដែលនោះជាការផ្តាច់ជីវិតរង្គាលមួយ។ មិនអាចយកពាក្យអ្វីមកនិយាយប្រៀបផ្ទឹមទៅនឹងសភាពការណ៍នោះបានឡើយ។
អង្គការមនុស្សធម៌ SAVE THE CHILDREN បានថ្លែងថា ក្មេងជំទង់៤នាក់ស្ថិតក្នុងចំណោមអ្នកដែលបាត់បង់ជីវិត។ បណ្ដាសារព័ត៌មានក្នុងស្រុករៀបរាប់ពីការចាប់ខ្លួនមនុស្សច្រើនរយនាក់។
នៅក្រុងញ៉វយ៉ក បេសកជនពិសេសអ.ស.បសម្រាប់មីយ៉ាន់ម៉ា លោកស្រី CHRSTINE SCHRANER BURGENER ក៏បានថ្លែងថា ពេលនេះជាថ្ងៃដ៏បង្ហូរឈាមធំបំផុតមួយ ចាប់តាំងពីរដ្ឋប្រហារមក។ តែមួយថ្ងៃ មានមនុស្សបាត់បង់ជីវិតដល់ទៅ៣៨នាក់។ រហូតមកទល់ពេលនេះ ចំនួនអ្នកបាត់បង់ជីវិតសរុបដោយសារការបង្ក្រាប បាតុកម្មនៅមីយ៉ាន់ម៉ាបានឡើងដល់ជាង៥០នាក់ហើយ តាំងពីរដ្ឋប្រហារមក ហើយមនុស្សច្រើនរយនាក់រងរបួស។
នៅក្រុងរ៉ង់ហ្គូន ជាទីក្រុងធំបំផុតរបស់ប្រទេស មនុស្សយ៉ាងតិច៨នាក់បានត្រូវបាត់បង់ជីវិត ក្នុងនោះ៧នាក់នាវេលាលា្ងច ក្រោមការបាញ់ប្រហារដោយកាំភ្លើងស្វ័យប្រវត្តិ ក្នុងសង្កាត់មួយនាភាគខាងជើងក្រុង។ នៅក្រុងម៉ូនីវ៉ា នាភាគកណ្ដាលប្រទេស មនុស្ស៦នាក់បានត្រូវបាត់បង់ជីវិត។ ចំណែកមនុស្ស២នាក់បាត់បង់ជីវិតនៅក្រុងម៉ាន់ដាឡៃ ជាទីក្រុងធំទី២របស់ប្រទេស។ ចំណែកមនុស្ស២នាក់ទៀតបាត់បង់ជីវិតនៅទីក្រុងរ៉ែ HPAKANT ភាគខាងជើងប្រទេស។ និងមនុស្សម្នាក់បាត់បង់ជីវិត នៅក្រុង MYINGYAN ភាគកណ្ដាលប្រទេស។
អំពើហិង្សាទាំងនោះ កើតមានបន្ទាប់ពីការអំពាវនាវមួយឲ្យមានការអត់ធ្មត់ពីសំណាក់រដ្ឋមន្ត្រីការបរទេសបណ្ដាប្រទេសអាស៊ាន។ តែមានប្រទេសអាស៊ានតែ៤ប៉ុណ្ណោះ គឺឥណ្ឌូណេស៊ៅ ម៉ាឡេស៊ី ហ្វ៊ីលីពីន និងសិង្ហបុរី ក្នុងចំណោមប្រទេសសមាជិកអាស៊ានទាំង១០ បានស្នើឲ្យរបបយោធាដោះលែងលោកស្រី អ៊ួង សាន់ស៊ូជី មេដឹកនាំស៊ីវិល និងឲ្យស្ដារឡើងវិញលទ្ធិប្រជាធិបតេយ្យ។
សម្ដេចប៉ាបកាតូលិកហ្វ្រង់ស្វ័រ តាម TWITTER បានសម្ដែងការក្ដុកក្ដួលចំពោះព័ត៌មានពីការប៉ះទង្គិចគ្នាដោយហិង្សាថ្មី និងស្នើឲ្យមានការចរចាចៀសវាងការបង្ក្រាប។ ចំណែកសហភាពអឺរ៉ុបវាយតម្លៃថា ការបាញ់លើបណ្ដាជនស៊ីវិល ដែលគ្មានអាវុធ ឬបណ្ដាអ្នកជួយសង្គ្រោះគឺជាការរំលោភបំពាន ជាក់ស្ដែងលើច្បាប់អន្តរជាតិ។ សហភាពអឹរ៉ុបក៏ចោទប្រកាន់ដែរដល់ពួកយោធាមីយ៉ាន់ម៉ាថា បង្កើនការបង្ក្រាបលើបណ្ដាសារព័ត៌មាន ដោយរៀបរាប់ពីចំនួនអ្នកកាសែតកាន់តែច្រើន ត្រូវចាប់ខ្លួននិងរងការចោទប្រកាន់។
យោងតាមទីភ្នាក់ងារព័ត៌មាន MYANMAR NOW ថា កងកម្លាំងសន្តិសុខបានចាប់ខ្លួនបាតុករប្រមាណជា៣០០នាក់នៅក្រុងរ៉ង់ហ្គូន។ បណ្ដារូបភាពផ្សាយតាមបណ្ដាញសង្គម បង្ហាញបណ្ដាយុវជនទាំងប្រុសទាំងស្រីត្រូវគេឲ្យលើកដៃដាក់លើក្បាល ចាប់ដឹកតាមរថយន្តកាមីញ៉ុងយោថា ក្រោមការត្រួតពិនិត្យពីសំណាក់កងទាហាននិងប៉ូលិស៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ