រាជធានីភ្នំពេញ ៖ បន្ទាប់ពីកម្លាំងកងរាជអាវុធហត្ថរាជធានីភ្នំពេញ ដឹកនាំដោយលោកឧត្តមសេនីយ៍ឯក រ័ត្ន ស្រ៊ាង ក្រោមការបញ្ជាផ្ទាល់ពីលោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថ លើផ្ទៃប្រទេស បង្ក្រាបករណីក្រុមឧក្រិដ្ឋជនចូលជំរិត និងប្ល.ន់ស.ម្លា.ប់មិនបានសម្រេចកាលពីវេលាម៉ោងប្រមាណ១១ព្រឹកថ្ងៃទី១ ខែមីនា ឆ្នាំ២០២១ កន្លងមក នៅចំណុចក្នុងបុរីអង្គរភ្នំពេញ ដោយសមត្ថកិច្ចបានបន្តធ្វើការស្រាវជ្រាវ និងបានកំណត់អត្តសញ្ញាណក្រុមឧក្រិដ្ឋជនទាំង៤នាក់ ហើយឈានទៅឆែកឆេរផ្ទះជួលមេខ្លោងឧក្រិដ្ឋជន ដកហូតបានវត្ថុតាងបន្ថែមទៀត ។ នេះបើតាមផេកផ្លូវការរបស់កងរាជអាវុធហត្ថរាជធានីភ្នំពេញដែលបានបង្ហោះនៅព្រឹកថ្ងៃទី៤ ខែមីនា ឆ្នាំ ២០២១នេះ។ គួររំលឹកថា មុននេះបន្តិច ក្រុមចាប់ជំរិត ៤នាក់ ត្រូវស្លា.ប់ ក្រោយបាញ់តដៃជាមួយសមត្ថកិច្ចនៅខណ្ឌសែនសុខ
ក្រុមឧក្រិដ្ឋជនទាំង៤នាក់ រួមមាន ១-ឈ្មោះ អ៊ឹម សុវណ្ណរិទ្ធ ជាមេខ្លោង កាន់កាំភ្លើង AK47 កើតថ្ងៃទី28 តុលា ឆ្នាំ1999 មានស្រុកកំណើតនៅស្រុកស្វាយប៉ោ ខេត្តបាត់ដំបង ទីលំនៅបច្ចុប្បន្ន ភូមិក្តីចាស់ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ និងបានជួលបន្ទប់មួយទុកចោល លេខ៣១៤ ផ្លូវលំ ភូមិបុរី១០០ខ្នង សង្កាត់ទឹកថ្លា ខណ្ឌសែនសុខ រាជធានីភ្នំពេញ ដោយចេញចូលម្តងម្កាលប៉ុណ្ណោះ ។
២-ឈ្មោះរី ពីសី កាន់កាំភ្លើងខ្លីម៉ាក សូរ៉ាគី កើតថ្ងៃទី 27 តុលា 1991 មានស្រុកកំណើត សង្កាត់វឌ្ឍនភាព ទីរួមខេត្តកណ្តាល ទីលំនៅបច្ចុប្បន្ន ផ្ទះលេខ១២៨ ផ្លូវលំ ភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ៣-ឈ្មោះ ម៉ូវ ផានិត កើតថ្ងៃទី 27 តុលា 1998 មានស្រុកកំណើត ភូមិព្រៃពង្រ ឃុំរការកោះ ស្រុកគងពិសី ខេត្តកំពង់ស្ពឺ ទីលំនៅបច្ចុប្បន្ន ភូមិព្រៃពង្រ ឃុំរការកោះ ស្រុកគងពិសី ខេត្តកំពង់ស្ពឺ ស្នាក់នៅផ្ទះជួល ក្រោយវត្តតាខ្មៅ ក្រុងតាខ្មៅ ខេត្តកណ្តាល និងទី៤-ឈ្មោះ រ៉ន ភារុន កាន់កាំភ្លើងខ្លីម៉ាកCZ P09 កើតឆ្នាំ២០០០ មានស្រុកកំណើត ភូមិព្រែកសំរោង ឃុំតាខ្មៅ ក្រុងតាខ្មៅ ខេត្តកណ្តាល ទីលំនៅបច្ចុប្បន្ន ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ។
ក្រៅពីអាវុធវែងខ្លី៣ដើមខាងលើ ជនល្មើស នៅមានខ្នោះដៃ២គូ ស្កុតសម្រាប់រុំបិទមាត់២ដុំ, ខ្សែរ៉ូតជ័រទុកចងដៃជើង ០១ដុំ យកទៅតាមខ្លួនសម្រាប់ធ្វើសកម្មភាពជំរិតនិងប្លន់សម្លាប់ ផងដែរ។
នៅថ្ងៃទី២ ខែមីនា ឆ្នាំ២០២១ កម្លាំងជំនាញនៃការិយាល័យព្រហ្មទណ្ឌ កងរាជអាវុធហត្ថរាជធានីភ្នំពេញ សហការជាមួយកម្លាំងជំនាញ នៃមូលដ្ឋានអាវុធហត្ថ ខណ្ឌសែនសុខ និងដោយមានការសហការណ៍ ជាមួយ ម្ចាស់ផ្ទះជួល ព្រមទាំងអាជ្ញាធរមូលដ្ឋាន បានចុះធ្វើការឆែកឆេរបន្ទប់ជួលរបស់ឈ្មោះ អ៊ឹម សុវណ្ណារិទ្ធ ដែលជួលទុកចេញចូលម្តងម្កាល រកឃើញសម្ភារៈល្មើសច្បាប់មួយចំនួនទៀត រួមមាន៖ ១-កាំភ្លើងវែង ម៉ាក M16 ចំនួន ០១ដើម, ២-គ្រាប់កាំភ្លើងចម្រុះ ចំនួន ១៦ គ្រាប់, ៣-ស្រោមអាវុធខ្លី ម៉ាកK54 ចំនួន ០១ និង៤- សម្ភារៈផ្ទាល់ខ្លួនជនល្មើសជាច្រើនទៀត។
សូមបញ្ជាក់ថា ក្រុមឧក្រិដ្ឋជនទាំង៤នាក់ខាងលើត្រូវបានកម្លាំងកងរាជអាវុធហត្ថរាជធានីភ្នំពេញ បា.ញ់ស្លា.ប់កាលពីវេលាព្រឹកថ្ងៃទី១ ខែមិនា ឆ្នាំ ២០២១ នៅក្នុងវីឡាលេខ ២០ ក្នុងបុរីអង្គរភ្នំពេញ ស្ថិតនៅក្នុងភូមិបន្លាស្អិត សង្កាត់ឃ្មួញ ខណៈពេលដែលជនសង្ស័យ បានចូលទៅធ្វើសកម្មភាពចា.ប់ជំរិត លោក ម៉ៅ ហួរ ភេទប្រុសអាយុ ៥៨ឆ្នាំជាពាណិជ្ជករនិងជាអតីតប្រធានសាខាអគ្គីសនី ខេត្តកំពង់ចាម ដើម្បីយកប្រាក់ចំនួន១លានដុល្លារ និងគ្រោងស.ម្លា.ប់ទាំងគ្រួសារនិងអ្នកបម្រើ២នាក់ តែមិនបានសម្រេចដោយបានបែកធ្លាយផែនការ ។
បន្ទាប់ពីត្រូវកម្លាំងសមត្ថកិច្ចបា.ញ់ស្លា.ប់ សពឧក្រិដ្ឋជនទាំង៤នាក់ត្រូវបញ្ជូនទៅតម្កល់នៅឈាបនដ្ឋានវត្តទឹកថ្លា ដោយស.ពឧក្រិដ្ឋជនចំនួន៣នាក់ ត្រូវបានក្រុមគ្រួសារមកទទួលយក និងបានបូជាជាបន្តបន្ទាប់កាលពីវេលារសៀលថ្ងៃទី២ ខែមីនា ឆ្នាំ២០២១។
ដោយឡែក ស.ពមេខ្លោងឧក្រិដ្ឋជនម្នាក់ឈ្មោះ អ៊ឹម សុវណ្ណរិទ្ធ ពុំឃើញមានក្រុមគ្រួសារសាច់ញាតិមកទទួលយកឡើយ ហើយត្រូវបានតាអាចារ្យសម្រេចបូជានៅវេលាម៉ោងប្រមាណ៤និង៣០នាទីរសៀលថ្ងៃទី២ មីនា ហើយរក្សាធាតុទុក ដើម្បីរង់ចាំប្រគល់អោយក្រុមគ្រួសារ ។ នៅក្នុងពេលដំណាលលគ្នានោះដែរ ផ្ទះជួលរបស់មេក្លោងឧក្រិដ្ឋជនចាប់ជំរិត ត្រូវបានសមត្ថកិច្ចចុះឆែកឆេរនៅវេលាល្ងាច រកឃើញវត្ថុតាងបន្ថែមទៀតផងដែរ៕
ចែករំលែកព័តមាននេះ