រាជធានីភ្នំពេញ ៖ មិនត្រឹមតែទទួលជោគជ័យក្នុងការឈោងចាប់តំណែងជាពិធីការិនីនៅទូរទស្សន៍កីឡាប៉ុណ្ណោះទេ អតីតកីឡាការិនីហែលទឹក ដែលមានរូបសម្រស់ស្រស់សោភា កញ្ញា ហែមថុន វិទិនី ក៏កំពុងមមាញឹកនឹងផែនការរៀបចំបើកហាងចំណីចំណុក ឬ…
រាជធានីភ្នំពេញ ៖ មិនត្រឹមតែទទួលជោគជ័យក្នុងការឈោងចាប់តំណែងជាពិធីការិនីនៅទូរទស្សន៍កីឡាប៉ុណ្ណោះទេ អតីតកីឡាការិនីហែលទឹក ដែលមានរូបសម្រស់ស្រស់សោភា កញ្ញា ហែមថុន វិទិនី ក៏កំពុងមមាញឹកនឹងផែនការរៀបចំបើកហាងចំណីចំណុក ឬ ភោជនីយដ្ឋានខ្នាតមធ្យមមួយកន្លែងផងដែរ។ អាជីវកម្មថ្មីរបស់នាង នឹងបើកដំណើរការឆាប់ៗបើទោះជាមានការរាំងស្ទះដោយជំងឺកូវីដ-១៩ក្ដី។
កញ្ញាហែមថុន វិទិនី ដែលសម្រេចចិត្តបោះបង់ការប្រកួតប្រមាណ២ឆ្នាំមកហើយ បានអះអាងថា ក្រៅពីមានអារម្មណ៍សប្បាយ និងរំភើបចិត្តយ៉ាងខ្លាំង ដែលត្រូវបានលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអ្នកគ្រប់គ្រងកម្មវិធីនៅទូរទស្សន៍កីឡា បានផ្ដល់ឱកាសឱ្យនាងកាន់កាប់កម្មវិធីមួយនៅក្នុងស្ថាប័នថ្មីនេះក្នុងនាមជាពិធីការិនី នាងក៏សប្បាយចិត្ត្តខ្លាំងណាស់ដែរ ដោយសារតែក្នុងពេលនេះ នាងកំពុងត្រៀមបើកហាងលក់អាហាររួមមាន អាហារពេលព្រឹក អាហារពេលល្ងាចផ្ដោតលើបុកល្ហុងបាយដំណើបខ្មែរថៃ និងអាហារជាច្រើនផ្សេងទៀត ដែលនាងប្រាប់ថា មិនពិបាករកអ្នកទទួលទាន ។ ហាងថ្មីដែលនាងចំណាយការរៀបចំនេះ គឺស្ថិតនៅម្ដុំទួលទំពូង ហើយបើទោះជាកូវីដ-១៩នៅតែបន្តកើតមាន ក៏នាងបើកដំណើរការនោះដែរ ប្រសិនបើរៀបចំហើយ។ នាងថា អាជីវកម្មនេះ គឺម្ដាយមីង និង សាច់ញាតិរបស់នាងជាអ្នកមានជំនាញ ហើយសម្រាប់រូបនាងផ្ទាល់ក៏ចេះមុខម្ហូបមួយចំនួន ដែលអាចដំណើរការហាងទាំងមូលបានផងដែរ។
ហាងមួយនេះទម្រាំរួចរាល់ គឺប្រើដើមទុនច្រើន ប៉ុន្តែនៅមិនទាន់ដឹងថា នឹងចំណាយទំហំណាឱ្យប្រាកដនោះទេ ដោយសារការចំណាយគឺបន្ថែមឥតឈប់ ជាពិសេសគឺលើផ្នែកដេគ័រ និងការទិញសម្ភារចូល ។ នាងរំពឹងថា មុខរបរថ្មីនេះនឹងកាក់កប ស្របពេលដែលកម្មវិធីដែលនាងធ្វើជាពិធីការិនី ក៏កំពុងលេចរូបរាង។
ហែមថុន វិទិនី បន្តបញ្ជាក់ថា នេះគឺជាក្ដីស្រមៃរបស់នាងតាំងពីមុនក្លាយជាអ្នកហែលទឹកមកម្ល៉េះ ដោយនាងតែងនឹកស្រមៃថា ចង់ក្លាយជាម្ចាស់ហាងផង និងជាពិធីការិនីផង។
ពាក់ព័ន្ធនឹងពិធីការិនី កញ្ញាថា កម្មវិធីដំបូង ដែលខាងគណៈកម្មការតម្រូវឱ្យនាងចេញមុខ និងកាន់កាប់ក្នុងតំណែងជាពិធីការិនីនេះគឺកម្មវិធី«ដំណើរឆ្ពោះទៅកាន់ស៊ីហ្គេម២០២៣»។ នៅក្នុងពេលនេះ នាងកំពុងតែត្រូវបានបង្វឹកដោយអ្នកជំនាញ ដោយគេឃើញអ្នកឯកទេសក្នុងការអត្ថាធិប្បាយមួយរូប គឺលោកស្រី ប្រាក់ សម្ផស្ស ដែលជាអ្នកជំនាញផ្នែកពិធីការិនីជាអ្នកបង្ហាត់បង្រៀនដោយផ្ទាល់នោះផង ។ កញ្ញាថា អាជីពមួយនេះ នឹងប្រឹងពុះពារឱ្យអស់ពីលទ្ធភាព ដោយនាងបញ្ជាក់ថា ផ្អែកតាមការបង្ហាត់បង្ហាញ និងការអនុវត្តក្នុងរយៈពេលប៉ុន្មានថ្ងៃកន្លងមកនេះ គឺនាងទទួលបានការលើកទឹកចិត្ត ។
យ៉ាងណាមិញគេមើលឃើញការទទួលតំណែងជាពិធីការិនី ដើម្បីវិភាគ និងអត្ថាធិប្បាយកីឡាដែលនាងទើបទទួល មិនមែនជាឧបសគ្គរបស់នាងទៀតទេ ដោយសារតែក្រៅតែពីមានចំណេះច្រើនពីវិស័យកីឡា ជាពិសេសវិស័យហែលទឹក គឺនាងក៏មានវោហារសព្ទពូកែដោយសារតែនាងប្រឡូកជាអ្នកលក់អនឡាញនាពេលកន្លងមក ដែលត្រូវគេកត់សម្គាល់ថា ពូកែនិយាយផងដែរ ។
ហែមថុន វិទិនីបន្តរំលឹកថា ដ្បិតតែនាងគឺជាអ្នកឯកទេសផ្នែកហែលទឹក តែនាងក៏មានការយល់ដឹងពីបច្ចេកទេស និងតិកនិកពីវិស័យកីឡាផ្សេងទៀតផងដែរ ទើបនាងយល់ថា អាចមិនមែនជាបញ្ហា ក្នុងការអត្ថាធិប្បាយនោះទេ ។ ម្យ៉ាងមកពីកម្មវិធីមួយនេះ គឺជាការថតទុក ដែលមានអ្នកជំនាញជាអ្នកចាំកែកំហុសឆ្គង ទើបនាងយល់ថា តំណែង និងតួនាទីរបស់ខ្លួន គឺពិតជាទទួលបានផ្លែផ្កា។ នាងថា កម្មវិធីថ្មីនេះ រួមមានការអត្ថាធិប្បាយ និងកិច្ចសម្ភាសន៍ជាមួយអ្នកជំនាញកីឡា ដោយរាល់កម្មវិធីដែលថតដំណើរការ គឺមានការរៀបចំទុក និងមានការផ្ដល់សំណួរទុកជាមុនស្រាប់ជាជំនួយ គឺមិនមែនឱ្យនាងជាអ្នកចាត់ចែងនោះទេ ដែលកត្តាទាំងនេះហើយ ដែលនាងយល់ថា មិនមែនជារឿងលំបាក។
យ៉ាងណាមិញនាងថា កម្មវិធីដែលនាងចេញមុខ នៅមិនទាន់ដឹងថា នឹងចេញផ្សាយឱ្យប្រាកដនៅពេលណាឡើយ ដោយគ្រាន់តែដឹងថាកម្មវិធីនេះ គឺជាកម្មវិធីដំបូង ហើយបន្ទាប់ពីកម្មវិធីនេះដំណើរការ គឺកម្មវិធីថ្មីបន្ថែមនឹងលេចរូបរាង ។ កញ្ញាបញ្ជាក់ថា មុនពេល លោក វ៉ាត់ ចំរើន ជ្រើសរើសកញ្ញាឱ្យធ្វើជាពិធីការិនី លោកថាលោកចង់ផ្ដល់ឱកាស ហើយក្រោយពីនាងបង្ហាញ
សមត្ថភាពឱ្យឃើញខ្លះៗ គឺលោកពេញចិត្ត និង ជឿជាក់ថា នាងអាចធ្វើបានសម្រាប់ការងារមួយនេះ ៕
ចែករំលែកព័តមាននេះ