រាជធានីភ្នំពេញ ៖ រថយន្តឡិចស៊ីស GS-300 មួយគ្រឿងបត់ឆ្វេងត្រលប់ក្រោយត្រូវម៉ូតូហុងដាឌ្រីមជិះទៅបុកយ៉ាងពេញទំហឹង ធ្វើឲ្យបុរសជាអ្នកជិះម៉ូតូរងរបួសធ្ងន់ ដែលហេតុការណ៍នេះកើតឡើងនៅវេលាម៉ោង៨យប់ ថ្ងៃទី១ ខែមីនា ឆ្នាំ២០២១ ជិតបុរីជីបម៉ុង ផ្លូវ៦០ម៉ែត្រ សង្កាត់ជើងឯក ខណ្ឌដង្កោ។ តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញបុរសម្នាក់បានបើករថយន្តម៉ាកឡិចស៊ីស GS-300 ពណ៌ស្ករ ពាក់ស្លាកលេខ ភ្នំពេញ 2BD-7500 ធ្វើដំណើរតាមបណ្ដោយផ្លូវ៦០ម៉ែត្រ ក្នុងទិសដៅពីជើងទៅត្បូង លុះមកដល់ចំណុចកើតហេតុ ក៏បានបត់ឆ្វេងត្រលប់ក្រោយវិញ។
ហើយគាប់ជួនពេលនោះដែរស្រាប់តែមានបុរសម្នាក់ទៀត បានជិះម៉ូតូម៉ាកហុងដាឌ្រីម ស៊េរីឆ្នាំ២០១០ ពណ៌ខ្មៅ ពាក់ស្លាកលេខ ភ្នំពេញ 1AM-5569 បានធ្វើដំណើរតាមបណ្ដោយផ្លូវ ៦០ម៉ែត្រ ក្នុងទិសដៅពីជើងទៅត្បូង ក្នុងល្បឿនលឿន មិនប្រយ័ត្នជ្រុលទៅបុកនឹងរថយន្តឡិចស៊ីស ចំពីមុខយ៉ាងពេញទំហឹង បណ្តាលឲ្យម៉ូតូខ្ទេចស្រុញផ្នែកខាងមុខ និងធ្វើឲ្យអ្នកជិះម៉ូតូហោះទៅផ្ទប់នឹងកញ្ចក់រថយន្ត បែកទាំងកញ្ចក់ បែកទាំងក្បាលមនុស្ស ហូរឈាមសន្លប់ស្តូកស្តឹង។ ហើយភ្លាមៗនោះដែរ ជនរងគ្រោះត្រូវបាន រថយន្តសង្គ្រោះបានមកយកទៅសង្គ្រោះនៅគ្លីនិកឯកជន។
ដោយឡែករថយន្តវិញរងការខូចខាត ផែ្នកខាងមុខ និងបែកកញ្ចក់ តែមិនមានគ្រោះថ្នាក់ដល់អ្នកជិះក្នុងរថយន្តនោះទេ។ ក្រោយពេលកើតហេតុ ភាគីទាំងសងខាងចង់សម្របសម្រួលគ្នាដើម្បីបញ្ចប់រឿងនៅកន្លែងកើតហេតុដែរ តែដោយសារតែស្ថានភាពអ្នកជំងឺរបួសធ្ងន់ពេក មិនអាចនិយាយគ្នាបានទើបសមត្ថកិច្ចជំនាញចរាចរណ៍ ក៏បានចុះទៅធ្វើការវាស់វែងយករថយន្ត និងម៉ូតូទៅរក្សាទុកនៅអធិការដ្ឋាននគរបាលខណ្ឌដង្កោរង់ចាំដោះស្រាយគ្នាជាថ្មីម្តងទៀត៕ ដោយ ៖ យឹម ឈឿន
ចែករំលែកព័តមាននេះ