រាជធានីភ្នំពេញ ៖ នៅថ្ងៃទី១មីនាឆ្នាំ២០២១នេះកម្ពុជា និងជប៉ុននឹងធ្វើការចុះនឹងចុះហត្ថលេខាលើលិខិតប្តូរសារស្តីពីការផ្តល់ហិរញ្ញប្បទានឥតសំណងប្រមាណ១០លានដុល្លារអាមេរិកដើម្បីអនុវត្តគម្រោងអភិវឌ្ឍន៍ចរាចរណ៍នាវានៅកំពង់ផែស្វយ័តក្រុងព្រះសីហនុ។ការចុះហត្ថលេខាក៏ដូជាការអនុវត្តគម្រោងនេះវានិងចូលររួមធ្វើឱ្យការផ្តល់សេវាបំពេញបែបបទសម្រាប់នាវាកាន់តែមានភាពងាយស្រួលនិងលឿនរហ័សជាមុនថែមទៀត។
យោងតាម ក្រសួងការបរទេសនិងសហប្រតិបត្តិការអន្តរជាតិកម្ពុជា បង្ហាញថាឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសនិងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងឯកឧត្តម MIKAMI Masahiro ឯកអគ្គរាជទូតជប៉ុនប្រចាំកម្ពុជានឹងចុះហត្ថលេខាលើលិខិតប្តូរសារស្តីពីការផ្តល់ហិរញ្ញប្បទានឥតសំណងរបស់ជប៉ុន ដែលមានទឹកប្រាក់សរុប ប្រមាណ១០,៨លានដុលលារអាមេរិក ដើម្បីអនុវត្តគម្រោងអភិវឌ្ឍន៍ចរាចរណ៍នៅកំពង់ផែស្វយ័តក្រុងព្រះសីហនុ នៅថ្ងៃទី១ មីនាឆ្នាំ២០២១។
ក្រសួងការបរទេសកម្ពុជាគូសបញ្ជាក់ថា«ហិរញ្ញប្បទានឥតសំណងដែលផ្តល់ដោយរដ្ឋាភិបាលជប៉ុននេះ នឹងរួមចំណែកយ៉ាងសំខាន់ដល់ការលើកកម្ពស់ការអភិវឌ្ឍសេដ្ឋកិច្ច និងសង្គម នៃព្រះរាជាណាចក្រកម្ពុជា ព្រមទាំងពង្រឹងបន្ថែមទៀតនូវចំណងមិត្តភាពនិងកិច្ចសហប្រតិបត្តិការរវាងប្រទេសទាំងពីរ។ក្នុងកិច្ចខិតខំប្រឹងប្រែងដើម្បីចូលរួម ទប់ស្កាត់ការផ្ទុះឡើងនៃការឆ្លងជំងឺកូវីដ១៩ក្នុងសហគមន៍ឬហៅថាព្រឹត្តិការណ៍២០កុម្ភៈ ភាគីទាំងពីរនឹងធ្វើការចុះហត្ថលេខាខាងលើ លិខិតប្តូរសារនេះនៅកន្លែងរៀងៗខ្លួន»។
លោក វ៉ាស៊ឹម សុរិយ៉ា មន្ត្រីអ្នកនាំពាក្យក្រសួងសាធារណការនិងដឹកជញ្ជូន មានប្រសាសន៍ឱ្យដឹងនៅថ្ងៃទី២៨កុម្ភៈនេះថា ដោយសារកំពង់ផែស្វយ័តក្រុងព្រះសីហនុនេះ វាជាផ្នែកមួយនៃផ្សារភាគហ៊ុនជប៉ុន ជាអ្នកមានភាគហ៊ុនធំ អីចឹងទេ ជប៉ុនគាត់ជួយថែមទៀតដើម្បីរៀបចំឱ្យប្រសើរឡើង។
លោកលើកឡើងថា «តាំងពីទសវត្សរ៍៦០មករហូតមកដល់ឥលូវនេះ កំពង់ផែស្វយ័តក្រុងព្រះសីហនុបានក្លាយជាផែយុទ្ធសាស្ត្ររបស់កម្ពុជា។អីចឹងទោះនៅក្នុងករណីណាក៏ដោយ យើងត្រូវតែអភិវឌ្ឍន៍ផែយើងឱ្យមានប្រសិទ្ធភាព ទាំងការធ្វើចរាចរទំនិញ ការងារហើយនិង មានការប្រកួតប្រជែងថែមទៀត។ជាធម្មតានៅតាមប្រទេសនីមួយៗមានផែយុទ្ធសាស្ត្ររបស់គេជានិច្ច ដូចប្រទេសថៃ ក្រៅពីគេមានផែបាងកក គេនៅមានផែឡាំចាបាំង ដូចទៅយើងដែរ យើងមានផែភ្នំពេញនិងផែព្រះសីហនុ។ដូចនេះយើងនៅតែអភិវឌ្ឍន៍កំពង់ផែរបស់យើង ដើម្បីជាច្រកសេដ្ឋកិច្ចនិងជាច្រកឆ្ពោះទៅកាន់អន្តរជាតិ»។
លោក អ៊ុក សុមេធី ប្រធានការិយាល័យស្ថិតិកំពង់ផែស្វយ័តក្រុងព្រះសីហនុ មានប្រសាសន៍ថា« គម្រោងនេះគេធ្វើការងារដំបូងបំផុតទៅលើការសម្រួលបែបបទនាវាចរណ៍ដែលមានទឹកប្រាក់ជាង១០លានដុល្លារអាមេរិក ហើយសម្រាប់ផែ យើងសូមអបអរសាទរ ព្រោះគម្រោងនេះវាជួយឱ្យការធ្វើបែបបទលឿន កាត់បន្ថយការប្រើប្រាស់ក្រដាសស្នាម, កាត់បន្ថយការជួបមុខគ្នា អីចឹងវាធ្វើឱ្យការបំពេញបែបបទនាវា លឿនហើយងាយស្រួលក្នុងការទំនាក់ទំនងគ្នា»។
លោកបន្តថា គម្រោងខាងលើនេះធ្វើឡើងសម្រាប់ការបំពេញបែបបទនាវាសិន វាខុសពីកំពង់ផែប្រទេសដទៃគេរៀបចំទាំងនាវានិងទំនិញ ហើយរាល់ទំនិញចូលមកដល់ផែប្រព័ន្ធនេះអាចគ្រប់បាន ហើយមានទំនាក់ទំនងជាមួយខាងគយទៅតាមប្រព័ន្ធទាំងអស់។
បើតាម លោក អ៊ុកសុមេធី គម្រោងអភិវឌ្ឍន៍ចរាចរណ៍នាវានៅកំពង់ផែស្វយ័តក្រុងព្រះសីហនុនេះ វាបាននិងកំពុងបង្ហាញពីការបោះជំហ៊ានឈានទៅរកភាពរីកចម្រើនរបស់កំពង់ផែយុទ្ធសាស្ត្ររបស់កម្ពុជា៕
ចែករំលែកព័តមាននេះ