ខេត្តកំពង់ឆ្នាំង ៖ វ៉ាក់សាំងការពារជំងឺកូវីដជាច្រើនដូស៍ ត្រូវបានរៀបចំចាក់ជូនមន្ត្រីនគរបាលខេត្តកំពង់ឆ្នាំង និងក្រុមគ្រូពេទ្យ នៅព្រឹកថ្ងៃទី០១ខែ មីនា នេះ នៅក្នុងមន្ទីពេទ្យបង្អែកខេត្តកំពង់ឆ្នាំង ។
លោក ប្រាក់ វ៉ុន ប្រធានមន្ទីរ សុខាភិបាលខេត្តកំពង់ឆ្នាំងបានឲ្យដឹងថា ក្នុងជំហានមួយនេះ ការចាក់វ៉ាក់សាំងការពារជំងឺកូវីដ19 គឺបានចាក់ជូនមន្ត្រីនគរបាលខេត្តកំពង់ឆ្នាំងនិង ក្រុមគ្រូពេទ្យ ។ចំពោះវ៉ាក់សាំងដែលមន្ទីរសុខាភិបាលខេត្តកំពង់ឆ្នាំងទទួលបានពីក្រសួងសុខាភិបាល វគ្គមួយនេះគឺមានចំនួន 7250 ដូស៍ ដោយបានដំណើរការចាក់ជូនមន្ត្រីនគរបាល និងបន្ទាប់មកក្រុមគ្រូពេទ្យ ចាប់ពីថ្ងៃទី០១ មីនា ។
លោកប្រធានមន្ទីរសុខាភិបាលក៏បានបញ្ជាក់ដែរថា ការទទួលវ៉ាក់សាំងការពារជំងឺកូវីដក្នុងម្នាក់ត្រូវទទួលការចាក់វ៉ាក់សាំង២ លើកមានន័យថាបើចាក់ថ្ងៃទី 1 ខែមីនានេះនឹងទទួលការចាក់លើកទី 2 ទៀតនៅថ្ងៃទី១៤ ខែមីនា ។ ដោយឡែក លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង ខណៈមកទទួលការវ៉ាក់សាំងការពារ កូវីត នេះដែរលោកបានបញ្ជាក់ថា មន្ត្រីនគរបាលដែលមកទទួលមុនគេនេះ មានស្នងការ ស្នងការរង នាយការិយាល័យនាយការិយាល័យរង និង អធិការតាមបណ្ដាស្រុកសរុបចំនួន៥០នាក់ ហើយពេលចាក់អស់ នឹងបន្តចាក់ជូនមន្ត្រីនគរបាលជាបន្តបន្ទាប់ទៀត ។
ជាការកត់សម្គាល់ នៅព្រឹកនេះដែ រគេឃើញមន្ត្រីការិយាល័យ អធិការនគរបាលស្រុក បានមកតម្រង់ជួរចាក់ថ្នាំនិងបានធ្វើកិច្ចសម្ភាសន៍ជាមួយក្រុមគ្រូពេទ្យដែលពិនិត្យសុខភាព មានដូចជាចង្វាក់បេះដូងសម្ពាធឈាម និងប្រវត្តិជំងឺផ្សេងៗផងដែរ ៕
ចែករំលែកព័តមាននេះ