រាជធានីភ្នំពេញ ៖ នៅមុននេះបន្តិច នាយកដ្ឋានប្រឆាំងបទល្មើសបច្ចេកវិទ្យា (Anti Cyber Crime Department) បានប្រកាសច្រានចូលនូវការផ្សព្វផ្សាយមួយថា «មន្ត្រីនគរបាលក្រសួងមហាផ្ទៃម្នាក់…
រាជធានីភ្នំពេញ ៖ នៅមុននេះបន្តិច នាយកដ្ឋានប្រឆាំងបទល្មើសបច្ចេកវិទ្យា (Anti Cyber Crime Department) បានប្រកាសច្រានចូលនូវការផ្សព្វផ្សាយមួយថា «មន្ត្រីនគរបាលក្រសួងមហាផ្ទៃម្នាក់ ធ្លាក់ខ្លួនពិការ ក្រោយពីចាក់វ៉ាក់សាំងចិន» ដែលបង្កនូវចលាចលក្នុងសង្គម ខណៈដែលប្រទេសកម្ពុជា កំពុងតែធ្វើយុទ្ធនាការចាក់វ៉ាក់សាំងប្រឆាំងកូវីដ១៩ តាមគោលការណ៍ស្ម័គ្រចិត្ត។
យ៉ាងណាមិញ នាយកដ្ឋានប្រឆាំងបទល្មើសបច្ចេកវិទ្យាបានអះអាងថា ព័ត៌មាននោះ គឺជា ព័ត៌មានមិនពិត ព្រោះពុំមានសមត្ថកិច្ចប៉ូលីសណាមួយបានជួបហេតុការណ៍ដូចការផ្សព្វផ្សាយនោះឡើយ ។
នាយកដ្ឋានប្រឆាំងបទល្មើសបច្ចេកវិទ្យាបានបញ្ជាក់ថា ព័ត៌មានដែលផ្សាយថា « លោកឧត្តមសេនីយ៍ ជា ឧត្តម បម្រើការងារនៅក្នុងនាយកដ្ឋានសន្តិសុខផ្ទៃក្នុង មានជំងឺគៀបសរសៃប្រាសាទឆ្អឹងខ្នង និងលើសអាស៊ីតធ្ងន់ធ្ងរជាយូរមកហើយ និងថ្មីៗនេះបានបណ្តាលឪ្យប៉ះពាល់សរីរាង្គផ្នែកខាងក្រោមចង្កេះ ធ្វើឲ្យជើងទាំងពីរស្ពឹកទន់ ដើរពុំរួច» ។
ឆ្លើយតបនឹងការចែកចាយនូវរឿងមិនពិតនេះ នាយកដ្ឋានប្រឆាំងបទល្មើសបច្ចេកវិទ្យាបានជូនដំណឹងដល់មហាជនថា «នាពេលថ្មីៗនេះ មានការផ្សព្វផ្សាយដោយចេតនាទុច្ចរិត នូវព័ត៌មានមិនពិតក្នុងគណនីហ្វេសប៊ុកមួយ ដោយបានធ្វើការបង្ហោះព័ត៌មានក្លែងក្លាយថា «មន្ត្រីនគរបាលក្រសួងមហាផ្ទៃម្នាក់ ធ្លាក់ខ្លួនពិការក្រោយពីចាក់វ៉ាក់សាំងចិន» ក្នុងគោលបំណងបង្កឱ្យមានភាពចលាចលក្នុងប្រទេស តែតាមការពិតរូបភាពដែលបានយកមកបង្ហោះនោះ គឺជារូបភាពដែលថ្នាក់ដឹកនាំនាយកដ្ឋានសន្តិសុខផ្ទៃក្នុង បាននាំយកថវិកានិងសម្ភារៈមួយចំនួនទៅចុះសួរសុខទុក្ខលោកឧត្តមសេនីយ៍ត្រី ជា ឧត្តម ដែលមានជំងឺ គៀបសរសៃប្រាសាទឆ្អឹងខ្នង។
ប្រភពដដែលបានបន្តថា «ទាក់ទងនឹងការផ្សព្វផ្សាយព័ត៌មានក្លែងក្លាយនេះ លោកឧត្តមសេនីយ៍ត្រី ជា ឧត្តម បានធ្វើការបដិសេធនៅក្នុងទំព័រហ្វេសប៊ុកផ្ទាល់ខ្លួន ហើយជាមួយគ្នានេះ នាយកដ្ឋានសន្តិសុខផ្ទៃក្នុង ក៏បានធ្វើការបដិសេធខ្លឹមសារដែលបានបង្ហោះខាងលើផងដែរ» ។
បន្ថែមពីលើនេះ នាយកដ្ឋានប្រឆាំងបទល្មើសបច្ចេកវិទ្យា សូមណែនាំដល់ប្រជាពលរដ្ឋទាំងអស់ថា «ត្រូវមានការទទួលខុសត្រូវចំពោះព័ត៌មានដែលខ្លួនយកមកបង្ហោះ ឬចែកចាយ ទោះជាចេតនា ឬអចេតនាក្ដី ព្រោះលោកអ្នកអាចប្រឈមនឹងច្បាប់នូវរាល់ការផ្សព្វផ្សាយក្លែងបន្លំណាដែលបង្កឱ្យមានភាពចលាចលដល់សង្គម» ។
ប្រភពដដែលបានបញ្ជាក់ថា លោកឧត្តមសេនីយ៍ត្រី ជា ឧត្តម ពុំដែលបានទទួលការចាក់វ៉ាក់សាំងកូវីដ ១៩ ទេ និងពុំមានលក្ខខណ្ឌគ្រប់គ្រាន់តាមការណែនាំរបស់ក្រសួងសុខាភិបាល (មានជំងឺប្រចាំកាយ) ដើម្បីទទួលបានការចាក់វ៉ាក់សាំងកូវីដ-១៩ ដែរ ៕
ចែករំលែកព័តមាននេះ