ខេត្តព្រះសីហនុ ៖ រដ្ឋបាលខេត្តព្រះសីហនុ នៅថ្ងៃទី ២៨ ខែកុម្ភៈ ឆ្នាំ២០២១នេះ បានសម្រេចបិទ និងផ្អាកជាបណ្តោះអាសន្នទីតាំងមន្ទីរពហុព្យាបាលអន្តរជាតិក្រុងព្រះសីហនុ មានទីតាំងស្ថិតនៅសង្កាត់លេខ…
ខេត្តព្រះសីហនុ ៖ រដ្ឋបាលខេត្តព្រះសីហនុ នៅថ្ងៃទី ២៨ ខែកុម្ភៈ ឆ្នាំ២០២១នេះ បានសម្រេចបិទ និងផ្អាកជាបណ្តោះអាសន្នទីតាំងមន្ទីរពហុព្យាបាលអន្តរជាតិក្រុងព្រះសីហនុ មានទីតាំងស្ថិតនៅសង្កាត់លេខ ៤ ខេត្តព្រះសីហនុ ក្រោយរកឃើញទីតាំងនេះ ជាប់ពាក់ព័ន្ធនឹងអ្នកជំងឺកូវីដ-១៩ ។
យោងតាមលិខិតរបស់រដ្ឋបាលខេត្តព្រះសីហនុ ចុះថ្ងៃទី២៨ ខែកុម្ភៈជូនទៅលោកស្រី TANG LI ម្ចាស់មន្ទីរពហុព្យាបាលអន្តរជាតិក្រុងព្រះសីហនុ បានបញ្ជាក់ថា ការសម្រេចផ្អាកទីតាំងនេះ ក្រោយពី «ក្រុមឆ្លើយតបបន្ទាន់នៃមន្ទីរសុខាភិបាលខេត្ត បានយកសំណាកតេស្តពីអ្នកជំងឺដែលធ្លាប់ព្យាបាលនៅ មន្ទីរពហុព្យាបាលអន្តរជាតិក្រុងព្រះសីហនុ ហើយលទ្ធផលតេស្តមានវិជ្ជមានវីរុសកូវីដ ១៩ ។
ដើម្បីទប់ស្កាត់ការរីករាលដាលនៃជំងឺកូវីដ-១៩ ចូលក្នុងសហគមន៍ តម្រូវឲ្យលោកស្រី ផ្អាកជាបណ្តោះអាសន្នមន្ទីរពហុព្យាបាលអន្តរជាតិក្រុងព្រះសីហនុ» មានទីតាំងខាងលើ «ជាបន្ទាន់ដោយមិនអនុញ្ញាតឲ្យមានអ្នកជំងឺថ្មីចូលពិនិត្យព្យាបាល ហើយក៏មិនអនុញ្ញាតឲ្យអ្នកជំងឺ និងអ្នកបម្រើការដទៃទៀតដែលកំពុងស្នាក់នៅ ព្យាបាលក្នុងមន្ទីរពហុព្យាបាលចេញ-ចូលដោយគ្មានការអនុញ្ញាតពីអាជ្ញាធរមានសមត្ថកិច្ចឡើយ» ។
ក្រុមការងារនឹងចុះយកសំណាកពីអ្នកជំងឺ និងបុគ្គលិកដែលបម្រើការនៅក្នុងមន្ទីរពហុព្យាបាលដើម្បីធ្វើតេស្តរកវីរុសកូវីដ ១៩។ អាជ្ញាធរខេត្តបានបញ្ជាក់ថា ក្នុងដំណាក់កាលនេះ អ្នកពាក់ព័ន្ធទាំងអស់ក្នុងមន្ទីរពេទ្យត្រូវតែយកសំណាកតេស្ត និងធ្វើចត្តាឡីស័កគ្រប់គ្នា ។
រដ្ឋបាលខេត្តព្រះសីហនុក៏បានព្រមានថា «ក្នុងករណីលោកស្រី មិនអនុវត្តតាមការណែនាំខាងលើ រដ្ឋបាលខេត្តព្រះសីហនុ នឹងចុះអនុវត្តវិធានការតាមនីតិវិធីច្បាប់ជាធរមាន»
សូមបញ្ជាក់ថា គិតត្រឹមថ្ងៃទី ២៧ ខែកុម្ភៈនេះ រកឃើញអ្នកកើតកូវីដ ១៩ នៅខេត្តព្រះសីហនុចំនួន ៣០នាក់ដែលភាគច្រើនជាជនជាតិចិន ពាក់ព័ន្ធនឹងព្រឹត្តិការណ៍សហគមន៍២០កុម្ភៈ ៕
ចែករំលែកព័តមាននេះ