រាជធានីភ្នំពេញ ៖ ចាត់ទុកជាដំណឹងដ៏រីករាយមួយសម្រាប់បងប្អូនកម្មករប្រមូលសំរាម ដោយនៅមុននេះបន្តិចសម្តេចតេជោ ហ៊ុន សែន នាយករដ្ឋមន្ត្រីកម្ពុជាបានសម្រេចឱ្យចាក់វ៉ាក់សាំងប្រឆាំងជំងឺកូវីដ១៩ ប្រភេទវ៉ាក់សាំង ស៊ីណូហ្វាម ដែលជាវ៉ាក់សាំងជំនួយរបស់មហាមិត្តចិន…
រាជធានីភ្នំពេញ ៖ ចាត់ទុកជាដំណឹងដ៏រីករាយមួយសម្រាប់បងប្អូនកម្មករប្រមូលសំរាម ដោយនៅមុននេះបន្តិចសម្តេចតេជោ ហ៊ុន សែន នាយករដ្ឋមន្ត្រីកម្ពុជាបានសម្រេចឱ្យចាក់វ៉ាក់សាំងប្រឆាំងជំងឺកូវីដ១៩ ប្រភេទវ៉ាក់សាំង ស៊ីណូហ្វាម ដែលជាវ៉ាក់សាំងជំនួយរបស់មហាមិត្តចិន ជូនកម្មករប្រមូលសំរាម ក្នុងចំណោមអាទិភាព សម្រាប់កម្មករប្រមូលសំរាមចន្លោះអាយុពី ១៨ ដល់អាយុ ៥៩ ឆ្នាំ ។
យោងតាមសេចក្តីជូនដំណឹងរបស់ក្រសួងសុខាភិបាលនៅរសៀលថ្ងៃទី២៨ ខែកុម្ភៈ ឆ្នាំ២០២១នេះ បានឲ្យដឹងថា «យោងតាមអនុសាសន៍ណែនាំ និងការយកចិត្តទុកដាក់ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ការចាក់វ៉ាក់សាំងកូវីដ-១៩ (ស៊ីណូហ្វាម Sinopharm Beijing Institute of Biological Products) ដែលជាជំនួយមនុស្សធម៌ដ៏ថ្លៃថ្លារបស់សាធារណរដ្ឋប្រជាមានិតចិន ត្រូវបានអនុញ្ញាត ឱ្យបន្តចាក់ជូនដល់បងប្អូនដែលជាកម្មករប្រមូលសំរាមនៅរាជធានីភ្នំពេញ បន្ថែមលើក្រុមមនុស្សដែលជាបុគ្គលិកសុខាភិបាល កងកម្លាំងប៉ូលីសជាតិ និងអាជ្ញាធរជួរមុខ»។
ជាមួយគ្នានោះផងដែរ ក្រសួងសុខាភិបាល បានណែនាំទៅគណៈអភិបាលខេត្ត គណៈអភិបាលក្រុង/ស្រុក/ខណ្ឌ គណៈកម្មការភូមិ-ឃុំ-សង្កាត់ រៀបចំចាត់ចែងកម្មករប្រមូលសំរាមនៅរាជធានីភ្នំពេញ ដែលមានអាយុពី ១៨ឆ្នាំ ដល់ ៥៩ឆ្នាំ ទៅទទួលការចាក់វ៉ាក់សាំងដោយឈរលើគោលការណ៍ស្ម័គ្រចិត្ត ចាប់ពីថ្ងៃផ្សាយដំណឹងនេះតទៅ នៅតាមទីតាំងដូចខាងក្រោមនេះ ៖
១- មន្ទីរពេទ្យបង្អែករាជធានីភ្នំពេញ
២- មន្ទីរពេទ្យបង្អែកព្រែកព្នៅ
៣- មន្ទីរពេទ្យបង្អែកច្បារអំពៅ
៤- មន្ទីរពេទ្យបង្អែកដង្កោ
៥- មន្ទីរពេទ្យបង្អែកមិត្តភាពកម្ពុជា-ចិន សែនសុខ
៦- មន្ទីរពេទ្យបង្អែកចតុមុខ
៧- មន្ទីរពេទ្យបង្អែកសម្ដេចឪ សម្ដេចម៉ែ និង
៨- មន្ទីរពេទ្យបង្អែកពោធិចិនតុង។
បន្ថែមពីលើនេះ ក្រសួងសុខាភិបាលក៏បានពង្រីកទីតាំងចាក់វ៉ាក់សាំងដល់គ្រប់រាជធានី-ខេត្តទាំង២៥ ហើយនោះ និងដើម្បីជម្រុញការចាក់វ៉ាក់សាំងអោយមានប្រសិទ្ធភាពកាន់តែធំទូលំទូលាយ ទីតាំងចាក់វ៉ាក់សាំងទាំងអស់ដែលមានការអនុញ្ញាតពីក្រសួងរួចរាល់ហើយនោះ ត្រូវបន្តចាក់វ៉ាក់សាំងជូនប្រជាជនតាមក្រុមមនុស្សនៅរៀងរាល់ថ្ងៃ រួមទាំងថ្ងៃសៅរ៍ និងថ្ងៃអាទិត្យ និងថ្ងៃឈប់សម្រាកផងដែរ ៕
ចែករំលែកព័តមាននេះ