ខេត្តព្រះសីហនុ ៖ យ៉ាងហោចណាស់ទីតាំងសណ្ឋាគារ កាស៊ីណូ អគារស្នាក់នៅរួម មន្ទីរពេទ្យឯកជនមួយកន្លែង និងផ្សារទំនើប ចំនួន១៦កន្លែង ត្រូវបានអាជ្ញាធរខេត្តព្រះសីហនុ សម្រេចបិទទ្វារ…
ខេត្តព្រះសីហនុ ៖ យ៉ាងហោចណាស់ទីតាំងសណ្ឋាគារ កាស៊ីណូ អគារស្នាក់នៅរួម មន្ទីរពេទ្យឯកជនមួយកន្លែង និងផ្សារទំនើប ចំនួន១៦កន្លែង ត្រូវបានអាជ្ញាធរខេត្តព្រះសីហនុ សម្រេចបិទទ្វារ និងផ្អាកសកម្មភាពអាជីវកម្មពាក់ព័ន្ធ ក្រោយរកឃើញមានអ្នកកើតកូវីដ ១៩ នៅខេត្តមានសមុទ្រមួយនេះ ពាក់ព័ន្ធនឹងព្រឹត្តិការណ៍សហគមន៍បានកើនឡើងដល់៣០នាក់ គិតត្រឹមថ្ងៃទី ២៧ ខែកុម្ភៈ ឆ្នាំ២០២១នេះ។
រដ្ឋបាលសាលាខេត្តព្រះសីហនុ បានប្រកាសថា ទីតាំងពាក់ព័ន្ធចំនួន ១៦ កន្លែង ដែលត្រូវបានផ្អាកសកម្មភាពអាជីវកម្មមាន ៖
១- សណ្ឋាគារជីនប៉ី ទាំង ៣ សាខា,
២- អគារស្នាក់នៅរួម វ៉ាន់ឃឺឆឹង របស់ក្រុមហ៊ុនជីនប៉ី,
៣- សណ្ឋាគារ ហ័ងហ្គ័នជាយី (Crowne Plaza) ,
៤- អគារស្នាក់នៅរួម វីន ភ្យូឈ័រ ខុនដូ-អាជីវកម្ម,
៥- សណ្ឋាគារ Goddess of Liberty,
៦- អេស អេស ហូថែល&រេស៊ីដិន, សណ្ឋាគារអន្តរជាតិ ហាយជឺកាង,
៨- កាស៊ីណូ ឆាង ឆឹង អ៊ីឡឺឆឹង,
៩- សណ្ឋាគារ និងភោជនីយដ្ឋាន ជូហែតាង,
១០- សណ្ឋាគារ ប្រីល លានស៊ី និងកាស៊ីណូ ប៉ឡាយ,
១១- មន្ទីរពេទ្យឯកជន ថៃខាង,
១២- កាស៊ីណូ ហ័ងឡឺ,
១៣- សណ្ឋាគារ ណាន ហៃ
និងទី១៤- ផ្សារទំនើប ដារុនហ្វា (ផ្សារដំរី៥)។
រដ្ឋបាលខេត្តព្រះសីហនុ បានបន្តថា «ទន្ទឹមនោះ ក៏មានម្ចាស់ទីតាំងអាជីវកម្មមួយចំនួនបានស្ម័គ្រចិត្តផ្អាកដំណើរការអាជីវកម្មរបស់ខ្លួន និងរៀបចំធ្វើចត្តាឡីស័កស្របតាមការណែនាំរបស់ក្រសួងសុខាភិបាលរួមមាន៖ សណ្ឋាគារចំនួន ១០ ទីតាំង កាស៊ីណូចំនួន ៦ទីតាំង រមណីយដ្ឋាន១កន្លែង ភោជនីយដ្ឋាន ១កន្លែង និងទីតាំងគុជអាស៊ី ១កន្លែង ។
នៅខេត្តព្រះសីហនុ មកដល់ពេលនេះវត្ថុសំណាកតេស្តពីអ្នកពាក់ព័ន្ធជាមួយទីតាំងទាំងអស់ខាងលើសរុបចំនួន ៤១១៩នាក់ ដែលមានស្ត្រីចំនួន ១៦៧៦ នាក់ ។
រដ្ឋបាលខេត្តព្រះសីហនុបានបន្តថា ដោយសារកំណើនអ្នកឆ្លងវីរុសកូវីដ ១៩ មានការកើនឡើងជាបន្តបន្ទាប់គួរឲ្យព្រួយបារម្ភ ហើយក្រុមឆ្លើយតបបន្ទាន់កំពុងមមាញឹកយកវត្ថុសំណាកតេស្តពីអ្នកសង្ស័យមានចំនួនច្រើនឡើង ។ ដូចនេះដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ចូលក្នុងសហគមន៍ រដ្ឋបាលខេត្តព្រះសីហនុ សូមអំពាវនាវដល់ បងប្អូនប្រជាពលរដ្ឋខ្មែរ សាធារណជន និងជនបរទេស ដែលកំពុងស្នាក់នៅ ប្រកបអាជីវកម្មគ្រប់ប្រភេទ ក្នុងខេត្តត្រូវអនុវត្តនូវវិធានការ «៣ ការពារនិង ៣កុំ» រក្សាគម្លាតសុវត្ថិភាព និង «បើមិនមានការចាំបាច់ទេ សូមកុំធ្វើដំណើរចល័តពីខេត្តព្រះសីហនុ ទៅរាជធានីភ្នំពេញ ឬតាមបណ្តាខេត្តផ្សេងៗទៀត ឬពីក្រុង ស្រុកនានា ចូលមកក្រុងព្រះសីហនុ (ត្រូវស្នាក់នៅផ្ទះ ឬនៅកន្លែងធ្វើការ» ៕
ចែករំលែកព័តមាននេះ