ខេត្តកំពង់ចាម ៖ ក្រោយពីទទួលបានការណែនាំពីសំណាក់លោកអ៊ុន ចាន់ដា អភិបាលខេត្ត និងប្រធានគណៈកម្មការប្រយុទ្ធប្រឆាំងនឹងជំងឺ COVID-19 អាជ្ញាធរស្រុកកងមាស រួមនឹងមន្ទីរសុខាភិបាលខេត្ត បានចុះស្រាវជ្រាវជាបន្ទាន់…
ខេត្តកំពង់ចាម ៖ ក្រោយពីទទួលបានការណែនាំពីសំណាក់លោកអ៊ុន ចាន់ដា អភិបាលខេត្ត និងប្រធានគណៈកម្មការប្រយុទ្ធប្រឆាំងនឹងជំងឺ COVID-19 អាជ្ញាធរស្រុកកងមាស រួមនឹងមន្ទីរសុខាភិបាលខេត្ត បានចុះស្រាវជ្រាវជាបន្ទាន់ ដែលទាក់ទងទៅនឹងបុរសម្នាក់រស់នៅសង្កាត់ទួលសង្កែ ខណ្ឌឬស្សីកែវ រាជធានីភ្នំពេញ មានជំងឺ COVID-19 បានមកចូលរួមក្នុងពិធីមង្គលការនៅភូមិកោះតូច ឃុំពាមជីកង ស្រុកកងមាស នាពេលកន្លងទៅ ដើម្បីទប់ស្កាត់ និងបង្ការកុំឲ្យជំងឺនេះឆ្លងចូលក្នុងសហគមន៍។
លោក ភោគ សាវុធ អភិបាលស្រុកកងមាស បានប្រាប់ឱ្យដឹងនៅល្ងាចថ្ងៃទី២៧ ខែកុម្ភៈ ឆ្នាំ២០២១នេះថា ប្រជាពលរដ្ឋនៅភូមិកោះតូច បានរៀបមង្គលការកូនប្រុសស្រីកាលពីថ្ងៃទី២១ ខែកុម្ភៈកន្លងទៅ ដោយមានភ្ញៀវជិតឆ្ងាយ រួមទាំងប្រជាពលរដ្ឋក្នុងភូមិបានចូលរួមជាច្រើននាក់ ក្នុងនោះក៏មានអ្នកកើតជំងឺ COVID-19 ម្នាក់នៅរាជធានីភ្នំពេញ ក៏បានមកចូលរួមក្នុងកម្មវិធីនេះផងដែរ តែភ្លាមៗមិនបានចាប់អារម្មណ៍នោះទេ។
អភិបាលស្រុកកងមាស ប្រាប់បន្តឲ្យដឹងទៀតថា ក្រោយមកពេលដែលមានជំងឺ COVID-19 បានផ្ទុះឡើងក្នុងសហគមន៍២០កុម្ភៈ លុះពេលស្រាវជ្រាវទើបគាត់ដឹងថា បុរសរូបនោះបានមកចូលរួមមង្គលការគេនៅឃុំពាមជីកង ស្រុកកងមាស ។
បន្ទាប់ពីទទួលបានការណែនាំពីសំណាក់អភិបាលខេត្ត នាព្រឹកថ្ងៃទី២៧ ខែកុម្ភ: រូបលោកក៏បានសហការជាមួយនឹងលោកវេជ្ជបណ្ឌិត គីម សួរភិរុណ ប្រធានមន្ទីរសុខាភិបាលខេត្ត ចុះបេសកកម្មមកកាន់ភូមិកោះតូច ដើម្បីស្រាវជ្រាវរក ហើយរកឃើញមានប្រជាពលរដ្ឋនៅក្នុងឃុំអង្គរបាន១១នាក់ រួមទាំងភូមិដំណាក់ជ្រៃ សរុប៨៧ នាក់ ត្រូវបានយកសំណាកមកពិនិត្យនៅវិទ្យាស្ថានប៉ាស្ទ័រផងដែរ។ ក្នុងនោះផងដែរ ក៏មានអ្នកដែលត្រូវធ្វើចត្តាឡីស័កចំនួន១២នាក់ ត្រូវបាននាំទៅដាក់នៅសណ្ឋាគារមេគង្គ ក្រុងកំពង់ចាម ក្រៅពីនេះគឺត្រូវធ្វើចត្តាឡីស័កនៅតាមផ្ទះ ដោយមានការតាមដានយ៉ាងហ្មត់ចត់ពីសំណាក់អាជ្ញាធរមូលដ្ឋាន រួមជាមួយនឹងក្រុមគ្រូពេទ្យ។
បន្ទាប់មកក្រុមការងារបានបន្តបេសកកម្មចុះទៅកាន់មណ្ឌលសុខភាពស្វាយសាច់ភ្នំ ស្រុកស្រីសន្ធរ ដោយស្រាវជ្រាវរកឃើញអ្នកដែលពាក់ព័ន្ធក្នុងពិធីមង្គលការនៅភូមិកោះតូច ដោយក្នុងនោះមានចុងភៅ អ្នករត់តុ ជាងថតរូប អ្នកសំអាងការ ត្រូវបានប្រមូលយកសំណាកជាបន្តបន្ទាប់ផងដែរ។
សូមបញ្ជាក់ថា នៅក្នុងសេចក្តីប្រកាសព័ត៌មានរបស់រដ្ឋបាលខេត្តកំពង់ចាម ដោយបានបញ្ជាក់អ្នកដែលពាក់ព័ន្ធក្នុងនោះមាន ៖
១-ឪពុកម្ដាយកូនក្រមុំដែលបន្ទាប់ពីថ្ងៃមង្គលការរួចបានត្រឡប់ទៅរាជធានីភ្នំពេញវិញ និងស្នាក់នៅម្ដុំ ក្រោយមន្ទីពេទ្យកាល់ម៉ែត រាជធានីភ្នំពេញ។
២-ឪពុកម្ដាយកូនកំលោះបានត្រឡប់ទៅស្រុកកំណើតវិញនៅភូមិត្រពាំងលើក ឃុំក្រាំងស្បូវ ស្រុកឈូក ខេត្តកំពត។
៣-កូនកំលោះកូនក្រមុំ និងអ្នកកំដរបានត្រឡប់ទៅភ្នំពេញវិញ។
៤-អ្នករួមតុជាមួយផ្ទាល់មាន ៖ ក្រុមអ្នកសំអាងការ, អ្នកថតរូប រស់នៅភូមិព្រៃទទឹង និងភូមិវាលស្បូវ ឃុំឫស្សីស្រុក ស្រុកស្រីសន្ធរ ព្រមទាំងប្រជាពលរដ្ឋចំនួន២នាក់ទៀតរស់នៅភូមិដំណាក់ជ្រៃ ឃុំពាមជីកង ស្រុកកងមាស ។
៥-ចុងភៅ អ្នកលើកម្ហូប និងមេចុងភៅ រស់នៅភូមិត្រើយបឹង ឃុំឬស្សីស្រុកស្រុកស្រីសន្ធរ។
ជាមួយនោះ អាជ្ញាធរស្រុកកងមាស ក៏បានចាក់សារជាសំឡេងតាមមេក្រូនៅគ្រប់ឃុំទាំងអស់នៃស្រុកកងមាស ដោយឲ្យប្រជាពលរដ្ឋត្រូវប្រកាន់ភ្ជាប់ និងអនុវត្តតាមការណែនាំរបស់ក្រសួងសុខាភិបាល ដើម្បីបញ្ជ្រាបទៅដល់ប្រជាពលរដ្ឋនៅគ្រប់ច្រកល្ហកធ្វើយ៉ាងណាទប់ស្កាត់ ដើម្បីកុំឲ្យជំងឺ COVID-19 ឆ្លងចូលក្នុងសហគមន៍។
ដោយឡែកលោកវេជ្ជបណ្ឌិត គីម សួរភិរុណ ប្រធានមន្ទីរសុខាភិបាលខេត្ត មានប្រសាសន៍ឲ្យដឹងដែរថា ក្រុមឆ្លើយតបបន្ទាន់នៃមន្ទីរសុខាភិបាលបានចុះទៅស្រាវជ្រាវរកអ្នកដែលពាក់ព័ន្ធជាមួយពិធីមង្គលការនៅភូមិកោះតូច ឃុំពាមជីកង ស្រុកកងមាស ដែលមានបុរសម្នាក់មកពីទួលសង្កែ ក្រុងភ្នំពេញ ថ្ងៃទី២១ កុម្ភៈ ពេលត្រឡប់ទៅវិញថ្ងៃទី២៣ កុម្ភៈ ពិនិត្យសំណាកឃើញវិជ្ជមានជំងឺកូវីដ-១៩។
ដោយទទួលបានការណែនាំពីសំណាក់អភិបាលខេត្ត និងរដ្ឋមន្ត្រីក្រសួងសុខាភិបាលក្រុមការងាររបស់លោកបានចុះស្រាវជ្រាវជាបន្ទាន់ មកកាន់ស្រុកកងមាស និងស្រុកស្រីសន្ធរ ក៏បានយកសំណាកប្រជាពលរដ្ឋសរុបចំនួន២២៣នាក់។ ចំពោះអ្នកដែលបានប៉ះពាល់ផ្ទាល់មានចំនួន២១នាក់ ក៏បានយកពួកគាត់មកចត្តាឡឺស័ករយៈពេល១៤ថ្ងៃ នៅសណ្ឋាគារមេគង្គក្រុងកំពង់ចាមផងដែរ៕
ចែករំលែកព័តមាននេះ