ខេត្តកំពង់ចាម ៖ ឃ្លាំងស្ទុកកម្ទេចក្រណាត់ជជុះច្រើនតោន ស្ថិតនៅភូមិស្រឡៅ ឃុំអំពិល ស្រុកកំពង់សៀម ត្រូវបានអគ្គិភ័យឆាបឆេះយ៉ាងសន្ធោសន្ធៅផ្សែងខ្មៅហុយខ្មួលខ្មាញ់ពេញអាកាស ដែលហេតុការណ៍កើតឡើងនៅវេលាម៉ោងប្រហែល១២និង៣០នាទីថ្ងៃត្រង់ថ្ងៃទី២៧ កុម្ភៈ ហើយត្រូវបានរថយន្តពន្លត់អគ្គិភ័យចេញមកអន្តរាគមន៍បាញ់ទឹកពន្លត់បន្តបន្ទាប់…
ខេត្តកំពង់ចាម ៖ ឃ្លាំងស្ទុកកម្ទេចក្រណាត់ជជុះច្រើនតោន ស្ថិតនៅភូមិស្រឡៅ ឃុំអំពិល ស្រុកកំពង់សៀម ត្រូវបានអគ្គិភ័យឆាបឆេះយ៉ាងសន្ធោសន្ធៅផ្សែងខ្មៅហុយខ្មួលខ្មាញ់ពេញអាកាស ដែលហេតុការណ៍កើតឡើងនៅវេលាម៉ោងប្រហែល១២និង៣០នាទីថ្ងៃត្រង់ថ្ងៃទី២៧ កុម្ភៈ ហើយត្រូវបានរថយន្តពន្លត់អគ្គិភ័យចេញមកអន្តរាគមន៍បាញ់ទឹកពន្លត់បន្តបន្ទាប់ ។
ជាមួយនោះគ្នា បានឃើញវត្តមានឯកឧត្តមអ៊ុន ចាន់ដា អភិបាលខេត្តបានអញ្ជើញចុះទៅពិនិត្យដោយផ្ទាល់ផងដែរ។ តាមប្រជាពលរដ្ឋរស់នៅក្បែរកន្លែងកើតហេតុប្រាប់ឲ្យដឹងថា គាត់បានឃើញគេសាងសង់ឃ្លាំងមួយកន្លែង ស្ថិតនៅភូមិស្រឡៅ ដោយបានដឹកកម្ទេចក្រណាស់ទាំងបាវៗ ចេញពីរោងចក្រមួយកន្លែងនៅក្នុងស្រុកកំពង់សៀម ដោយយកមកស្តុកទុកនៅក្នុងឃ្លាំងនេះ ដោយដំណើរការប្រហែលមួយឆ្នាំ។
ប្រជាពលរដ្ឋបានប្រាប់បន្តឲ្យដឹងទៀតថា ក្រោយពីមានអគ្គិភ័យឆាបឆេះឡើងគាត់បានឃើញរថយន្តពន្លត់អគ្គីភ័យនៃអធិការដ្ឋាននគរបាលស្រុកកំពង់សៀមមួយគ្រឿងចេញមកដល់គោលដៅបាញ់ទឹកពន្លត់មុនគេនិងបន្ទាប់មកទៀត មានរថយន្តរបស់ស្នងការដ្ឋាននគរបាលខេត្តចំនួន ៣គ្រឿងបានចេញមកបន្តបន្ទាប់។
សកម្មភាពកម្លាំងសមត្ថកិច្ចបាញ់ទឹកពន្លត់ភ្លើងដែលឆាបឆេះឃ្លាំងក្រណាត់នោះគឺមិនបានរលត់ដោយស្រួលស្រួលនោះទេ ព្រោះតែនៅក្នុងឃ្លាំងមានជាច្រើនតោន ដោយភ្លើងបានឆាបឆេះបន្ត រហូតដល់ពេលរសៀលមិនទាន់រលត់ទៀត ។ ជាមួយនោះគាត់ដែលមានផ្ទះនៅមិនឆ្ងាយប៉ុន្មានពីកន្លែងកើតហេតុ មានការព្រួយបារម្ភខ្លាចភ្លើងឡើងធ្លាក់មកលើផ្ទះដែរ។
លោកឧត្តមសេនីយ៍ត្រីមិន សុគន្ធវិវិបុល ស្នងការរងនគរបាលខេត្តទទួលផែនបង្ការនិងពន្លត់អគ្គីភ័យប្រាប់ឲ្យដឹងដែរថា ក្រោយពីមានអគ្គីភ័យឆាបឆេះនៅឃ្លាំងស្តុកកំទេចក្រណាត់ ដើម្បីកែច្នៃនាំចេញទៅលក់នៅបរទេស។
លោកស្នងការនគរបាលខេត្ត បានអញ្ជើញចុះទៅបញ្ជាដោយផ្ទាល់ ជាមួយនោះគឺបានហៅរថយន្តតាមបណ្ដាស្រុកជាច្រើនគ្រឿង មកជួយអន្តរាគមន៍បាញ់ទឹកពន្លត់។រហូតដល់វេលាម៉ោងជិត៤រសៀល កម្លាំងសមត្ថកិច្ចអាចគ្រប់គ្រងស្ថានភាពបានខ្លះហើយ ធ្វើឲ្យភ្លើងដែលឆេះនោះបានទ្រោមជាបណ្ដើរៗ ។
ដោយឡែក ឯកឧត្តមអ៊ុន ចាន់ដា អភិបាលខេត្តក៏បានអញ្ជើញមកចុះពិនិត្យស្ថានភាពជាក់ស្តែងដែលឱ្យកម្លាំងសមត្ថកិច្ចត្រូវប្រឹងប្រែងអន្តរាគមន៍បាញ់ទឹកពន្លត់ដើម្បីចៀសវាងកុំអោយភ្លើងឆេះរាលដាលដល់លំនៅដ្ឋានប្រជាពលរដ្ឋនៅក្បែរនោះ។ មូលហេតុដែលបណ្ដាលអោយមានគ្រោះអគ្គិភ័យកើតឡើងត្រូវបានកម្លាំងជំនាញកំពុងតែធ្វើការស្រាវជ្រាវបន្ត៕
ចែករំលែកព័តមាននេះ