រាជធានីភ្នំពេញ ៖ ជាថ្មីម្តងទៀតអាជីវកម្មផ្នែកអាហារ និងភេជ្ជៈនៅភ្នំពេញ បានរងផលប៉ះពាល់ពីការផ្ទុះកូវីដ ១៩ សហគមន៍ ២០កុម្ភៈនោះ នឹងឈានទៅដល់ការកាត់បន្ថយបុគ្គលិកសារជាថ្មី ។…
រាជធានីភ្នំពេញ ៖ ជាថ្មីម្តងទៀតអាជីវកម្មផ្នែកអាហារ និងភេជ្ជៈនៅភ្នំពេញ បានរងផលប៉ះពាល់ពីការផ្ទុះកូវីដ ១៩ សហគមន៍ ២០កុម្ភៈនោះ នឹងឈានទៅដល់ការកាត់បន្ថយបុគ្គលិកសារជាថ្មី ។ លោក សីហា អ្នកមើលការខុសត្រូវនៅក្នុងអាហារដ្ឋានមួយកន្លែងដែលមានម្ចាស់ជាជនជាតិបរទេស បាននិយាយថា ហាងរបស់លោកបរិមាណលក់មានការថយចុះជាងពាក់កណ្តាលនៅប៉ុន្មានថ្ងៃនេះ ។
បុរសម្នាក់នេះមិនលម្អិតថា ហាងរបស់គាត់រកចំណូលបានប៉ុន្មានក្នុងមូយថ្ងៃនោះទេ ហើយពេលនេះធ្លាក់ចុះមកដល់កម្រិតណានោះដែរ តែគាត់បាននិយាយថា ការលក់បានធ្លា្កក់ចុះជាងពាក់កណ្តាល ។ នៅក្នុងហាងមិនសូវមានអ្នកមកទទួលទានទេ ដូច្នេះថៅកែបានស្នើឲ្យបុគ្គលិកធ្វើការផ្លាស់វេនគ្នាហើយកាត់បន្ថយប្រាក់ខែ ។
តាមលោក សីហា ហាងរបស់គាត់បានជួបវិបត្តិការលក់តាំងពីពេលផ្ទុះកូវីដ ១៩ នៅឆ្នាំ២០២០ មកម្លេះ ប៉ុន្តែកន្លងមកដោយសារពុំមានអ្នកឆ្លងកូវីដ ១៩ ច្រើនអាជីវកម្មហាងរបស់លោកចេះតែបើកដំណើរការហាក់បានល្អបណ្តើរៗ បែរជាមកផ្ទុះព្រឹត្តិការណ៍សហគមន៍ជាថ្មីទៀត ។ ហាងខ្ញុំបានកាត់បុគ្គលិកម្តងហើយកាលពីចុងឆ្នាំ ២០២០ យើងមិនទាន់ហៅពួកគេមកធ្វើការឡើងវិញផង នៅពេលនេះជួបបញ្ហាទៀត ។
យើងបានបន្តបើកអាជីវកម្មក្នុងពេលកូវីដ ១៩ នេះ មានគ្នាបីបួននាក់ធ្វើការប៉ុណ្ណោះ ដូច្នេះពេលនេះ មិនអាចកាត់បន្ថយទៀតទេ តែយើងផ្លាស់វេនគ្នា មកធ្វើការហើយគិតប្រាក់តាមថ្ងៃធ្វើការវិញ ។ ថៅកែឈប់ឲ្យប្រាក់ខែឲ្យយើងហើយ ហើយយើងគិតថា ប្រាក់ចំណូលនឹងអាចបាត់ជាងពាក់កណ្តាល ។
នេះជាវិបត្តិមួយដែលកើតចេញពីជំងឺកូវីដ ១៩ ពិសេសការផ្ទុះកូវីដ ១៩ សហគមន៍ ២០កុម្ភៈ ។ ព្រឹត្តិការណ៍ ២០កុម្ភៈ ឆ្នាំ ២០២១នេះ បានធ្វើឲ្យចំនួនអ្នកកើតកូវីដ ១៩ នៅកម្ពុជាកើនដល់ ៧៤១នាក់ ក្នុងនោះអ្នកជាសះស្បើយចំនួន ៤៧៧នាក់ និងអ្នកជំងឺចំនួន ២៦២នាក់កំពុងសម្រាកព្យាបាលជំងឺនៅមន្ទីរពេទ្យ ។ នៅព្រឹកថ្ងៃទី ២៦ ខែកុម្ភៈ ឆ្នាំ ២០២១នេះ កម្ពុជាបន្តរកឃើញកូវីដ ១៩ ករណីវិជ្ជមានចំនួន ៤៤នាក់ថ្មីទៀត ។ ក្នុងចំណោមអ្នករកឃើញថ្មីនេះ ៤០នាក់ជាករណីឆ្លងក្នុងសហគមន៍នៃ «ព្រឹត្តិការណ៍ ២០កុម្ភៈ» និង ៤នាក់ជាករណីធ្វើដំណើរមកពីក្រៅប្រទេស ។
ប្រឈមការឆ្លងការឆ្លងរាតដាល់ខ្លាំងនេះ កញ្ញា ពិសី អ្នកធ្វើការឲ្យក្រុមហ៊ុនឯកមួយ ដែលមានបុគ្គលិកប្រមាណ ៣០នាក់ បាននិយាយថា ក្រុមហ៊ុនគាត់កំពុងត្រៀមឲ្យបុគ្គលិកធ្វើការតាមអនឡាញសារថ្មីដើម្បីសុវត្ថិភាពពួកគេ ។ កញ្ញា ពិសី និយាយថា បុគ្គលិកទាំងអស់បានបារម្ភពីសុវត្ថិភាពដោយសារពេលនេះចំនួនអ្នកកើតមួយថ្ងៃៗច្រើនណាស់ ។ ការធ្វើការតាមអនឡាញ ធ្វើឲ្យគុណភាពការងារធ្លាក់ចុះ ដោយភារកិច្ចបុគ្គលិកខ្លះគាត់ត្រូវធ្វើដោយផ្ទាល់ ដូច្នេះបើគាត់មិនមកធ្វើការនៅការិយាល័យទេ គាត់អាចមិនបំពេញភារកិច្ចរបស់ខ្លួនដែលធ្វើឲ្យក្រុមហ៊ុនខាតបង់ ។
ក្រោយផ្ទុះព្រឹត្តិការណ៍សហគមន៍ ២០កុម្ភៈស្ថានភាពសង្គមកម្ពុជាបានវិលទៅរកព្រឹត្តិ ការណ៍សហគមន៍ ២៨វិច្ឆិកាកាលពីឆ្នាំ ២០២០ វិញ សាលារៀន សេវាកម្មកម្សាន្ត កម្មវិធីប្រជុំ បានផ្អាក ហើយអាជ្ញាធរទទួចឲ្យពលរដ្ឋបង្កើនកាតប្រុងប្រយ័ត្នដើម្បីកុំឲ្យស្ថានការណ៍កាន់តែធ្ងន់ធ្ងរ ៕
ចែករំលែកព័តមាននេះ