ប្រទេសថៃ ៖ នាយករដ្ឋមន្ត្រីថៃលោក ប្រាយុទ្ធ ចាន់អូចា នឹងក្លាយជាឥស្សរជនកំពូលរបស់ថៃដំបូងគេបង្អស់ដែលចាក់វ៉ាក់សាំងប្រឆាំង Covid-19 របស់ក្រុមហ៊ុន AstraZeneca នៅថ្ងៃអាទិត្យនេះ…
ប្រទេសថៃ ៖ នាយករដ្ឋមន្ត្រីថៃលោក ប្រាយុទ្ធ ចាន់អូចា នឹងក្លាយជាឥស្សរជនកំពូលរបស់ថៃដំបូងគេបង្អស់ដែលចាក់វ៉ាក់សាំងប្រឆាំង Covid-19 របស់ក្រុមហ៊ុន AstraZeneca នៅថ្ងៃអាទិត្យនេះ ខណៈឧបនាយករដ្ឋមន្ត្រី និងរដ្ឋមន្ត្រីសុខភាពសាធារណៈ Anutin Charnvirakul នឹងទទួលបានវ៉ាក់សាំងស៊ីណូវ៉ាក់។ នេះបើយោងតាមការចេញផ្សាយរបស់សារព័ត៌មាន បាងកកប៉ុស្តិ៍ នាថ្ងៃទី ២៦ ខែ កុម្ភៈ ឆ្នាំ ២០២១។
សារព័ត៌មានដដែលបានបន្តថា លោកវេជ្ជបណ្ឌិត Sopon Mekthon ជាប្រធានអនុគណៈកម្មាធិការរបស់រដ្ឋាភិបាល សម្រាប់ការគ្រប់គ្រងលើវ៉ាក់សាំង Covid-19 នេះ បាននិយាយថា លោកឧត្តមសេនីយ៍ប្រាយុទ្ធ និងលោក Anutin ត្រូវបានគេគ្រោងនឹងចាក់វ៉ាក់សាំង នៅវិទ្យាស្ថានជំងឺឆ្លង Bamrasnaradura ដែលនឹងប្រព្រឹត្តិទៅនៅថ្ងៃអាទិត្យ។
វេជ្ជបណ្ឌិតរូបនេះបានបន្តថា ៖ «នេះគឺជាការប្រតិបត្តិតាម ការអនុម័តរបស់នាយកដ្ឋានវិទ្យាសាស្ត្រនិងវេជ្ជសាស្ត្រ ដែលបានចេញវិញ្ញាបនប័ត្រ បញ្ជាក់ពីប្រសិទ្ធភាព និងក្រុមមនុស្សឬអាយុ ដែលជាគោលដៅនឹងទទួលបានវ៉ាក់សាំងមុនគេ ដោយក្រុមហ៊ុនបានបញ្ជាក់យ៉ាងច្បាស់។ ការចាក់វ៉ាក់សាំងសម្រាប់ក្រុមអាទិភាព នៅក្នុងខេត្តគោលដៅ នឹងចាប់ផ្តើមនៅថ្ងៃចន្ទ និងព័ត៌មានលម្អិតបន្ថែម នឹងត្រូវបានផ្តល់ជូនដោយនាយកដ្ឋានត្រួតពិនិត្យជំងឺ»។
ប្រភពដដែលបានបន្តថា ក្រុមវេជ្ជបណ្ឌិតបានផ្តល់អនុសាសន៍ដល់ លោកឧត្តមសេនីយ៍ប្រាយុទ្ធ គួរតែចាក់វ៉ាក់សាំងវ៉ាក់នេះដែលចេញពីក្រុមហ៊ុន AstraZeneca ខណៈពេលដែលលោក Anutinនិងលោក Sathit Pitutecha ដែលជាអនុរដ្ឋមន្ត្រីសុខាភិបាលសាធារណៈ នឹងទទួលថ្នាំបង្ការពី Sinovac ៕
ចែករំលែកព័តមាននេះ