រាជធានីភ្នំពេញ ៖ កក្រើកសង្វៀនទៀតហើយដោយសារគូប្រកួតដណ្ដើមប្រាក់លាននៅលើសង្វៀនស៊ីអិនស៊ីនារសៀលថ្ងៃសៅរ៍ទី២៧ កុម្ភៈ សប្ដាហ៍នេះ សុទ្ធតែជាកំពូលអ្នកប្រដាល់ជើងខ្លាំងដូចគ្នាដែលត្រូវប៉ះគ្នាចំនួន២គូ ។ កីឡាករ ខេម ចាន់…
រាជធានីភ្នំពេញ ៖ កក្រើកសង្វៀនទៀតហើយដោយសារគូប្រកួតដណ្ដើមប្រាក់លាននៅលើសង្វៀនស៊ីអិនស៊ីនារសៀលថ្ងៃសៅរ៍ទី២៧ កុម្ភៈ សប្ដាហ៍នេះ សុទ្ធតែជាកំពូលអ្នកប្រដាល់ជើងខ្លាំងដូចគ្នាដែលត្រូវប៉ះគ្នាចំនួន២គូ ។ កីឡាករ ខេម ចាន់ ជើងខ្លាំងប្រចាំក្លិបបញ្ជាការដ្ឋានទ័ពពិសេស ត្រូវជួបប្រកួតជាមួយកីឡាករ វ៉ាន់ វឿន ជើងខ្លាំងប្រចាំក្លិបឃ្លាំងមឿងកីឡា និងកីឡាករ សួន ចាន់នី មកពីក្លិបបក្សីស្លាបដែក ត្រូវជួបប្រកួតជាមួយកីឡាករលន បញ្ញា មកពីក្លិបពុទ្ធសេរីវង្សពោធិសែនជ័យ ។
រវាងខេម ចាន់ និងវ៉ាន់ វឿន សុទ្ធតែជាអ្នកប្រដាល់ចាស់វស្សាដូចគ្នា មានបទពិសោធប្រកួតនៅលើសង្វៀនយូរឆ្នាំមកហើយ ។ សម្រាប់ការប្រកួតលើកនេះទាំងសងខាងសុទ្ធតែអះអាងថា បានត្រៀមខ្លួនទុកជាមុន ដើម្បីក្លាយជាម្ចាស់ប្រាក់លានរបស់ក្រុមហ៊ុនខារ៉ាបាវ ។ ខេម ចាន់ ផ្លែកែងនិងជង្គង់របស់គេល្អខ្លាំងណាស់ ឯចិត្តរបស់គេក៏សឿងគ្រាន់បើដែរពោលគឺវាយមិនចេះដកថយនោះទេ ។ ចំណែកវ៉ាន់ វឿនក៏ខ្លាំងមិនធម្មតា ផ្លែកែងនិងជង្គង់អាចប្រើការបានគ្រប់ស្ថានការណ៍ ។ បើនិយាយពីស្នៀតកណ្ដាប់ដៃរបស់គេវិញនោះពិតជាល្អខ្លាំងណាស់ថែមទាំងមានចិត្តអំណត់ទៀតផង ។ សម្រាប់ទស្សនៈអ្នកតាមដានការប្រកួតភាគច្រើនសុទ្ធតែមានជំនឿចិត្តខ្ពស់ថា វ៉ាន់ វឿន នឹងក្លាយជាម្ចាស់ប្រាក់លានលើកនេះ។
មួយគូទៀតកីឡាករសួន ចាន់នី និងលន បញ្ញា បានក្លាយជាគូសងសឹកដោយសារពួកគេធ្លាប់ប៉ះគ្នាចំនួន២លើករួចមកហើយ ។ កាលពីលើកទី១សួន ចាន់នី ធ្លាប់វាយលន បញ្ញា ឱ្យសន្លប់ត្រឹមទឹកទី៤ម្ដង ។ ប៉ុន្តែសម្រាប់ការជួបគ្នាលើកទី២ លន បញ្ញា សងសឹកបានសម្រេចវិញ ដោយយកឈ្នះត្រឹមពិន្ទុប៉ុណ្ណោះ ។
ដូច្នេះសម្រាប់ការប៉ះគ្នាលើកទី៣នេះ គឺជារឿងសំខាន់មួយ ដោយសារអ្នកណាឈ្នះក្រៅពីក្លាយជាម្ចាស់ប្រាក់លានហើយក៏នឹងឡើងក្រេឌីត តែបើចាញ់នឹងទទួលការរិះគន់និងធ្លាក់ក្រេឌីតមិនខាន។ គូនេះបើពិនិត្យលើការប្រកួតទាំងពីរលើកកន្លងមក មានស្នៀតប្រយុទ្ធប្រហាក់ប្រហែលគ្នា បូករួមទាំងមាឌនិងកម្ពស់ ។ ពិបាកសន្និដ្ឋានខ្លាំងណាស់ថាអ្នកណានឹងក្លាយជាម្ចាស់ប្រាក់លាន ដូច្នេះមានតែរង់ចាំទស្សនាតាមកញ្ចក់ទូរទស្សន៍ប៉ុណ្ណោះអ្នកណាខ្លាំងជាងអ្នកណាគង់តែដឹងទេ ៕
ចែករំលែកព័តមាននេះ