រាជធានីភ្នំពេញ ៖ ក្រោយផ្ទុះព្រឹត្តិការណ៍ថ្ងៃ២០ កុម្ភៈ ដែលជាថ្ងៃរលកទី៣ នៃការឆ្លងជំងឺកូវី-១៩ចូលក្នុងសហគមន៍ មិនត្រឹមតែបង្អាក់ដំណើរកីឡាការិនី ស៊ន សៀវម៉ី មិនឱ្យបានចេញទៅហ្វឹកហាត់នៅក្នុងប្រទេសកូរ៉េដូចការគ្រោងទុកនោះទេ…
រាជធានីភ្នំពេញ ៖ ក្រោយផ្ទុះព្រឹត្តិការណ៍ថ្ងៃ២០ កុម្ភៈ ដែលជាថ្ងៃរលកទី៣ នៃការឆ្លងជំងឺកូវី-១៩ចូលក្នុងសហគមន៍ មិនត្រឹមតែបង្អាក់ដំណើរកីឡាការិនី ស៊ន សៀវម៉ី មិនឱ្យបានចេញទៅហ្វឹកហាត់នៅក្នុងប្រទេសកូរ៉េដូចការគ្រោងទុកនោះទេ សូម្បីតែគម្រោងរៀបចំមង្គលការឱ្យផ្អើលប្រទេសសមនឹងកេរ្តិ៍ឈ្មោះនៅក្នុងពិភពកីឡា ក៏មិនអាចទៅរួចនោះដែរ ។ នាងត្រូវបង្ខំចិត្តរៀបការស្ងាត់ៗ ដែលមានទម្រង់ដូចសែនព្រេនកាលពីថ្ងៃទី២២ កុម្ភៈ ឆ្នាំ២០២១ ដែលមង្គលការនេះ ក៏កើតក្រោយពេលនាងបានក្លាយជាជំទាវក្នុងមុខតំណែងជាជំនួយការរបស់សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា មានឋានៈស្មើនឹងអគ្គនាយក។
លោកជំទាវស៊ន សៀវមី និយាយថា ក្រោយពេលរៀបការ នាងនឹងមិនសកម្មក្នុងការប្រកួតកីឡាដូចមុនទៀតទេ គឺនាងទទួលតែប្រកួតក្នុងព្រឹត្តិការណ៍ធំៗ ដែលអាចមានតែប៉ុន្មានប្រកួតទៀតប៉ុណ្ណោះ ដោយសារតែនាងត្រូវការមើលថែគ្រួសារ ហើយបើនាងក្លាយជាម្ដាយគេផង គឺពិតជាត្រូវថ្នមខ្លួន ។ នាងនឹងអាចដើរតាមគន្លងបងស្រី តែអាចមិនឈប់ទាំងស្រុងនោះទេ គឺអាចនៅធ្វើជាគ្រូបង្វឹក និងជាអ្នកផ្ដល់យោបល់ជាដើម ដោយសារតែនាងក៏ស្រលាញ់ពេញចិត្តនឹងកីឡាដូចគ្នា។
នាងសម្ដែងអារម្មណ៍ខកចិត្ត ដែលមិនបានរៀបការធំដុំ តែនាងក៏មានមោទនភាពណាស់ដែរ ដែលបានរៀបការ និងរៀបចំគ្រួសារមួយជាមួយបុរសដែលនាងស្រលាញ់ ។ នាងថា ហេតុផលដែលនាងមិនរង់ចាំដល់ចប់កូវីដ-១៩ទើបរៀបការធំដុំ គឺដោយសារតែពេលវេលាកាន់តែអូសបន្លាយ និងម្យ៉ាងដោយសារតែនាងមិនចង់បន្តរស់នៅភាពជាគូដណ្ដឹងមួយខែហើយមួយខែទៀត។
នាងនឹងអាចរៀបចំពិធីកាត់ចំណងដៃធំដុំម្ដងទៀត តែមិនទាន់ច្បាស់ថា ត្រូវធ្វើឬធ្វើតែបុ៉នហ្នឹងបញ្ចប់នោះទេ ដោយសារតែនាងក៏មិនទាន់ច្បាស់លាស់។ នាងថា ខ្លួននៅតែបន្តហ្វឹកហាត់នៅក្នុងប្រទេស ក្នុងនោះនាងក៏នឹងទទួលបានការថតស្ពតឱ្យក្រុមហ៊ុនមួយចំនួនផងដែរ ប្រសិនបើមានការទំនាក់ទំនង បន្ទាប់ពីនាងក៏ទើបតែថតស្ពតឱ្យក្រុមហ៊ុនដល់ទៅ២តែម្ដង នាចុងឆ្នាំ២០២០ ដែលកាន់តែធ្វើឱ្យគេមើលឃើញថា នាងមានយីអ៊ុនខ្លាំង ក្រោយមានគូស្នេហ៍នោះផង។
គួរបញ្ជាក់ផងដែរថា បច្ចុប្បន្នភាពរបស់ ស៊ន សៀវម៉ី កាន់តែធ្វើឱ្យគេផ្ដោតការចាប់អារម្មណ៍ ដោយសារតែនាងស្ងាត់ឱកាសធ្វើជាអ្នកផ្សព្វផ្សាយផ្ដាច់មុខឱ្យក្រុមហ៊ុនធំៗជាយូរមកហើយ តែបានតំណែងជាលោកជំទាវ ដោយសារតែនាងត្រូវបានព្រះមហាក្សត្រតែងតាំងជាជំនួយការសម្ដេចប្រធានព្រឹទ្ធសភា មានឋានៈស្មើអគ្គនាយកនោះ ។
ដ្បិតតែនាងត្រូវលុបចោលគម្រោងចាកចេញទៅហ្វឹកហាត់នៅកូរ៉េជាយូរមកហើយ ហើយអាចនឹងបន្តពន្យារ តែនាងក៏នៅតែមានការត្រៀមខ្លួនសម្រាប់ស៊ីហ្គេមឆ្នាំ២០២១ នៅវៀតណាមនាចុងឆ្នាំខាងមុខនេះ ។ ក្នុងនោះនាងក៏ទទួលបាននូវការចាប់អារម្មណ៍ខ្លាំងផងដែរ តាមរយៈភាពផ្អែមល្ហែមជាមួយគូស្នេហ៍ដែលជាអ្នកថតរូបអាជីព ស្របពេលដែលនាង និងគូស្នេហ៍ ក៏កាន់តែបង្អួតចំណងស្នេហ៍ ធ្វើឱ្យអ្នកខ្លះច្រណែន មុនពេលសំពះផ្ទឹមផងដែរ។
អ្នកគាំទ្រភាគច្រើនលើកឡើងថា ស៊ន សៀវម៉ី ដ្បិតថាថមថយប្រជាប្រិយក្នុងវិស័យកីឡា មិនដូចពេលនាងឈ្នះមេដាយកម្រិតអាស៊ីកក្រើកមហាជនកាលពីឆ្នាំ២០១៤ ក៏ពិតមែន ប៉ុន្តែនាងនៅតែល្បី និងនៅតែឈរជើងជាតារាដែលមានយីអ៊ុន ជាពិសេសការថតស្ពតនាពេលចុងក្រោយ និងទទួលបានការចាប់អារម្មណ៍ខ្លាំង ក្នុងរឿងរ៉ាវឯកជន ។
អ្នកគាំទ្រមិនតិចទេ យល់ថា នាងគឺជាកីឡាការិនីដែលមានភាពជោគជ័យទាំងព្រម ទាំងស្នេហា ទាំងតំណែង ទាំងវិស័យកីឡា ទាំងមុខជំនួញអនឡាញនាពេលកន្លងមក និង ទាំងការងារថតស្ពតធំៗ ដែលកីឡាការិនីផ្សេងទៀតនៅមិនទាន់ប្រជែងបាន ។ នាងក៏ជានារីខ្ពស់ស្រឡះ ដែលមានរូបសម្រស់ស្រស់សោភាមិនអន់ដែរ ពោលគឺមិនចាញ់តារាម៉ូដែលអាជីព។
ជាមួយនឹងភាពលេចធ្លោទាំងព្រមនេះហើយ ដែលជីវិតស្នេហារបស់នាងកាន់តែទទួលបានការចាប់អារម្មណ៍ខ្លាំងឡើងស្ទើរគ្រប់សកម្មភាព។
គួរបញ្ជាក់ផងដែរថា ម្ចាស់មេដាយមាសកីឡាអាស៊ី ស៊ន សៀវម៉ី បានភ្ជាប់ពាក្យជាមួយលោក កែវ ដេវីដ កាលពីថ្ងៃទី២៨ ឧសភា ឆ្នាំ២០២០ ដែលជាជាងថតរូបអាជីពមួយរូប។ មុនឈានដល់ពិធីភ្ជាប់ពាក្យ អ្នកទាំងពីរស្គាល់គ្នា១ឆ្នាំមកហើយ ដោយផ្ដើមក្នុងពេលដែលនាងទៅថតស្ពតមួយ ហើយគូដណ្ដឹងរបស់នាង គឺជាអ្នកទទួលការងារនោះដោយផ្ទាល់ ។ នាងធ្លាប់ប្រកាសថា ពេលជួបគ្នាដំបូង អនាគតកូនកំលោះរបស់ម្ចាស់មេដាយមាសស៊ីហ្គេម ៣សម័យរូបនេះ មិនបានស្គាល់ថា សៀវម៉ី ជានរណាឡើយ តែដោយមានការណែនាំប្រាប់ពីក្រុមការងាររបស់លោក កែវ ដេវីដ ជាគូដណ្ដឹង ទើបផ្ដើមឲ្យពួកគេមានទំនាក់ទំនងជាមួយគ្នា តាំងពីថ្ងៃនោះមក។
ស៊ន សៀវម៉ី បញ្ជាក់ថា ចំណងស្នេហ៍មួយនេះផ្ដើមចេញពីចិត្ត និងចិត្ត បន្ទាប់មកទើបអ្នកទាំងពីរប្រាប់ម៉ាក់-ប៉ាទាំងសងខាងឲ្យដឹង…។ នាងធ្លាប់បញ្ជាក់បន្តថា ការជ្រើសរើសគូស្រករលុយមិនមែនជម្រើសទី១នោះទេ ម្យ៉ាងមកពីនាង និងគូដណ្ដឹងសុទ្ធតែមានមុខជំនាញរៀងខ្លួន ដែលអាចរកលុយបានដោយខ្លួនឯង ។
នាងអះអាងទៀតថា បើទោះជានាងគឺជាកីឡាការិនី ប៉ុន្តែការប្រើក្បាច់គុនដោះស្រាយបញ្ហាគឺមិនមាននោះទេ ដោយសារតែក្នុងសម័យនេះ គឺមិនប្រើអំពើហិង្សាជាធំ ។ កីឡាការិនីកម្ពស់ ១.៨៣ម៉ែត្ររូបនេះបញ្ជាក់ថា មង្គលការគ្រោងរៀបចំឆ្នាំក្រោយ ដោយទោះជាមានបញ្ហាកូវីដ-១៩ កើតឡើងប៉ុនណា ក៏នឹងធ្វើឱ្យបានមុនស៊ីហ្គេមនៅកម្ពុជា នាឆ្នាំ២០២៣ នោះដែរ។ ជាមួយគ្នានោះ នាងក៏បញ្ជាក់ពីគម្រោងលាឈប់ផងដែរ ដោយគ្រាន់តែមិនទាន់កំណត់បាន ព្រោះត្រូវចាំមើលកម្លាំងជាក់ស្ដែងសិន។
នាងនិយាយថា៖«ក្រោយបញ្ចប់អាជីពកីឡាតេក្វាន់ដូ ខ្ញុំប្រហែលជាទៅរកស៊ីក្រៅ គ្រាន់តែថា ក្នុងនាមយើងធ្លាប់ជាកីឡាការិនីតំណាងជាតិនិងស្រឡាញ់កីឡានេះ ខ្ញុំនៅតែចូលរួមបំផុសបំផុល ឲ្យមានការចូលរួមលេងកីឡានេះឲ្យបានច្រើន ។ ម្យ៉ាងខ្ញុំក៏ចង់ទុកឱកាសឲ្យប្អូនៗ
ជំនាន់ក្រោយដែលមានសមត្ថភាព បានចូលរួមការប្រកួតអន្ដរជាតិផ្សេងៗដែរ…។ ចំពោះស៊ីហ្គេម បើខ្ញុំអាចយកមេដាយជូនជាតិបាន ខ្ញុំនៅតែបន្ដជួយយកមេដាយជូនជាតិ ទោះបីខ្ញុំមានការងារខាងក្រៅ ព្រោះខ្ញុំមានមោទនភាព ពេលបានប្រកួតតំណាងជាតិម្ដងៗ»។
សូមបញ្ជាក់ថា ស៊ន សៀវម៉ី ជាកីឡាការិនីតេក្វាន់ដូកម្រិតប្រវត្តិសាស្ដ្ររបស់កម្ពុជា ក្រោយនាងត្រូវបានប្រមុខរាជរដ្ឋាភិបាលប្រសិទ្ធនាមជាវីរកីឡាការិនីកម្ពុជា បន្ទាប់ពីកញ្ញាកែប្រែប្រវត្តិសាស្ត្រដណ្តើមបានមេដាយមាសកីឡាអាស៊ី កាលពីឆ្នាំ២០១៤ នៅប្រទេសកូរ៉េ ។ នាងក៏ជាកីឡាការិនីកម្ពុជាដំបូង ដែលទទួលបានសិទ្ធិចូលរួមព្រឹត្តិការណ៍អូឡាំពិក ឆ្នាំ២០១៦ នៅប្រេស៊ីល និងជាម្ចាស់មេដាយមាសកីឡាស៊ីហ្គេម ៣សម័យកាលផងដែរ ៕
ចែករំលែកព័តមាននេះ