រាជធានីភ្នំពេញ ៖ រថយន្តដឹកសម្រាមរបស់ក្រុមហ៊ុនមួយគ្រឿង ខណៈកំពុងបើកបរសុខៗស្រាប់តែរេចង្កូតជ្រុលទៅបុកឡើងសួនច្បារពុះចែកទ្រូងផ្លូវ រួចបុកផ្ទប់បង្គោលភ្លើងបំភ្លឺផ្លូវ១ដើមយ៉ាងពេញទំហឹងបណ្ដាលឲ្យទ្រេត ហើយរថយន្តនោះបានរងការខូចខាតក្រពឹតខ្ទេចមុខខ្លួនឯង ប៉ុន្តែជាសំណាងល្អពុំបានបណ្ដាលមានគ្រោះថ្នាក់ដល់អ្នកបើកបរឬអ្នកដទៃណាម្នាក់ឡើយ។
ហេតុការណ៍៍ខាងលើនោះបានកើតឡើងកាលពីវេលាម៉ោង៧និង១០នាទីព្រឹកថ្ងៃទី២៥ ខែកុម្ភៈឆ្នាំ២០២១ នៅលើកំណាត់មហាវិថីឈ្នះឈ្នះ ស្ថិតនៅក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
រថយន្តខាងលើម៉ាកហ៊ីយ៉ាន់ដាយ ចំណុះ១តោន ពណ៍ខៀវ អត់ស្លាកលេខ ជារថយន្តដឹកសម្រាមរបស់ក្រុមហ៊ុនមួយ និងបើកបរដោយបុរសមិនស្គាល់ឈ្មោះម្នាក់បានរត់គេចខ្លួនបាត់ស្រមោល។
តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តខាងលើបានបើកបរដឹកសម្រាមធ្វើដំណើរក្នុងទិសដៅពីត្បូងទៅជើង ក្នុងល្បឿនលឿនគួរសមដែរ លុះពេលទៅដល់ត្រង់ចំណុចកើតហេតុពុំដឹងថា អ្នកបើកបរងងុយដេកហើយងោកមួយភាំងឬស្រវឹងស្រាពីយប់មិនទាន់ស្វាងនោះទេ ស្រាប់តែរេចង្កូតជ្រុលទៅបុកឡើងលើសួនច្បារពុះចែកទ្រូងផ្លូវ រួចបុកផ្ទប់បង្គោលភ្លើងបំភ្លឺផ្លូវ១ដើមទាំងកម្រោល បណ្ដាលឲ្យបង្គោលភ្លើងបំភ្លឺផ្លូវទ្រេត ចំណែកសួនច្បារក៏រងការខូចខាតផងដែរ ហើយរថយន្តបង្កនេះបានរងការខូចខាតខ្ទេចមុខស្ទើរតែទាំងស្រុង ប៉ុន្តែជាសំណាងល្អពុំបានបណ្ដាលឲ្យបុរសអ្នកបើកបរឬអ្នកដំណើរតាមដងផ្លូវរងរបួសនោះឡើយ។
តាមប្រភពដដែលបានបន្តទៀតថា ក្រោយពេលកើតហេតុ កម្លាំងនគរបាលប៉ុស្តិ៍សំរោងក្រោមរួមជាមួយកម្លាំងនគរបាលចរាចរណ៍ខណ្ឌពោធិ៍សែនជ័យ បានចុះទៅកាន់ទីនោះពិនិត្យមើលជាក់ស្ដែងហើយបានរាយការណ៍បន្តទៅកាន់នគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ចុះទៅនាំយករថយន្តបង្កទៅរក្សាទុករង់ចាំការដោះស្រាយនៅពេលក្រោយ៕
ចែករំលែកព័តមាននេះ