រាជធានីភ្នំពេញ ៖ បុរសម្នាក់សង្ស័យជិះម៉ូតូមួយគ្រឿងលឿនពេកវ៉ារថយន្តកាត់មុខ ទើបជ្រុលទៅបុកនឹងរថយន្តក្រុមហ៊ុនវីរៈប៊ុនថាំ បណ្តាលអោយដួលសន្លប់ស្តូកស្តឹងនៅនឹងកន្លែងកើតហេតុ កាលពីវេលាម៉ោង7និង15នាទីយប់ថ្ងៃទី២៤ ខែកុម្ភៈ ឆ្នាំ២០២១ នៅចំណុចរង្វង់មូលព្រហ្មមុខបួន តាមបណ្តោយផ្លូវជាតិលេខ៦ ស្ថិតនៅក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
បុរសម្នាក់ដែលរងរបួសសន្លប់ស្តូកស្តឹងខាងលើមិនស្គាល់អត្តសញ្ញាណនោះទេ ជាអ្នកបើកបរម៉ូតូមួយគ្រឿងម៉ាកវ៉េវ ពណ៌ខ្មៅ ពាក់ស្លាកលេខ ភ្នំពេញ 1GZ-9503 ។ ចំណែករថយន្តក្រុមហ៊ុនវីរៈប៊ុនថាំ ពណ៌ខៀវលាយទឹកក្រូច ពាក់ស្លាកលេខ ភ្នំពេញ 2AG-9114 ។
តាមប្រភពព័ត៌មានពីសមត្ថកិច្ចអន្តរាគមន៍ដែលប្រចាំនៅគល់ដៅរង្វង់មូលព្រហ្មមុខ៤បានអោយដឹងថា មុនពេលកើតហេតុខាងលើនេះ គេឃើញបុរសម្នាក់ជិះម៉ូតូមួយគ្រឿងម៉ាកវ៉េវ បើកបរតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូង ខណៈពេលបើកមកដល់ចំណុចកើតហេតុខាងលើនេះ ដោយសារតែម៉ូតូបើកវ៉ាកាត់មុខរថយន្តក្រុមហ៊ុនវីរៈប៊ុនថាំ កំពុងធ្វើដំណើរក្នុងទិសដៅស្របគ្នា ហើយម៉ូតូមិនបានប្រុងប្រយ័ត្ននោះទេ ទើបជ្រុលទៅបុកក្បាលរថយន្តវីរៈប៊ុនថាំ ចំហៀងខាងស្តាំ បណ្តាលអោយដួលបោកក្បាលនឹងថ្នល់រងរបួសធ្ងន់សន្លប់ស្តូកស្តឹង រីឯម៉ូតូនឹងរថយន្តវិញរងការខូចខាតតិចតួចតែប៉ុណ្ណោះ ។
តាមប្រភពដដែលបានបន្តថា ភ្លាមៗនោះដែរ សមត្ថកិច្ចអន្តរាគមន៍ដែលប្រចាំនៅគល់ដៅរង្វង់មូលព្រហ្មមុខ៤បានទំនាក់ទំនងហៅរថយន្តសង្គ្រោះរបស់គ្លីនិកឯកជនបានមកដល់ដឹកយកជនរងគ្រោះទៅព្យាបាល ហើយសមត្ថកិច្ចក៏បានធ្វើការវាស់វែអ និងបាញ់ថ្នាំសម្គាល់នៅកន្លែងកើតហេតុ រួចយកម៉ូតូនិងរថយន្តទៅដាក់អែបគៀន ដើម្បីកុំឱ្យកកស្ទះចរាចរណ៍៍ ។
ក្រោយពេលកើតហេតុ រថយន្តនឹងម៉ូតូត្រូវបានសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោកដើម្បីធ្វើការដោះស្រាយគ្នានៅពេលក្រោយជាបន្តទៅទៀត ៕
ចែករំលែកព័តមាននេះ