រាជាធានីភ្នំពេញ ៖ សម្តេច ហេង សំរិន ប្រធានរដ្ឋសភាបានលើកថា ក្នុងរយៈប៉ុន្មានថ្ងៃចុងក្រោយនេះ ប្រទេសយើងបានប្រឈមការឆ្លងជំងឺកូវីដ១៩ ក្នុងសហគមន៍ជាថ្មី ពិសេសនៅតាមរាជធានីខេត្តមួយចំនួន ជាពិសេសនៅរាជធានីភ្នំពេញ ខេត្តកណ្តាល និងបណ្តាខេត្តជាប់ព្រំដែនប្រទេសជិតខាង ។
សម្តេចបានសរសេរលើបណ្តាញសង្គម នៅថ្ងៃទី២៤ ខែកុម្ភៈ បញ្ជាក់ថា ៖« ខ្ញុំសូមអំពាវនាវដល់បងប្អូនជនរួមជាតិបន្តអនុវត្តឲ្យបានខ្ជាប់ខ្ជួននូវរាល់វិធានការនានាដែលរាជរដ្ឋាភិបាល និងក្រសួងសុខាភិបាលបានដាក់ចេញសំដៅការពារ និងបញ្ចៀសឱ្យផុតពីការឆ្លងរាលដាលកាន់តែធំឡើង ហើយដែលអាចបង្កគ្រោះថ្នាក់កាន់តែធ្ងន់ធ្ងរដល់សុខភាពសាធារណ សេដ្ឋកិច្ច និងសង្គមនៃប្រទេសរបស់យើង» ។
ជាមួយគ្នានេះ សម្តេចបានអំពាវដល់ប្រជាពលរដ្ឋដែលបានដឹងថា ខ្លួនបានជាប់ពាក់ព័ន្ធនឹងករណីព្រឹត្តិការណ៍២០ កុម្ភៈ សូមសហការជាមួយអាជ្ញារធរពាក់ព័ន្ធដោយចេញមកធ្វើតេស្ត និងចត្តាឡីស័ក ដើម្បីទប់ស្កាត់កុំឲ្យបញ្ហានេះកាន់តែរីកធំឡើងដែលជាលទ្ធផលគ្មាននរណាក្រៅពីសមាជិកគ្រួសារយើងបងប្អូនយើង និងសង្គមជាតិទេ ដែលអាចនឹងរងការខូចខាតដោយសារជំងឺកូវីដ-១៩នេះ ។
ឆ្លៀតនៅក្នុងឱកាសនេះ ខ្ញុំក៏សូមលើកទឹកចិត្តដល់សមាជិក សមាជិការដ្ឋសភាទាំងអស់ សូមចុះជាប់ជាមួយប្រជាពលរដ្ឋ និងមានកិច្ចសហការល្អជាមួយអាជ្ញាធរ ដើម្បីអប់រំ ផ្សព្វផ្សាយបន្ថែមដល់ពលរដ្ឋអំពីជំងឺកូវីដ-១៩ និងអំពីវិធានការការពារ ជាពិសេសត្រូវត្រៀមលក្ខណៈអន្តរាគមន៍ឲ្យបានទាន់ពេលវេលា ជួយដល់ប្រជាពលរដ្ឋយើងនៅទូទាំងប្រទេសក្នុងគ្រាលំបាកនេះ ។
សូមជនរួមជាតិបានសមប្រកបតែពុទ្ធពរ ទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
ចែករំលែកព័តមាននេះ