រាជធានីភ្នំពេញ ៖ សា្ថប័នប្រឆាំងអំពើពុករលួយ អង្គភាពប្រឆាំងអំពើពុករលួយ ហៅកាត់ (ACU) បានបំភ្លឺករណីបុគ្គលឈ្មោះ ឯម សុខសុវណ្ណ (ជាប្រធានគណបក្សមួយរូប)…
រាជធានីភ្នំពេញ ៖ សា្ថប័នប្រឆាំងអំពើពុករលួយ អង្គភាពប្រឆាំងអំពើពុករលួយ ហៅកាត់ (ACU) បានបំភ្លឺករណីបុគ្គលឈ្មោះ ឯម សុខសុវណ្ណ (ជាប្រធានគណបក្សមួយរូប) ប្តឹងមន្ត្រីរាជការចំនួន ១០រូប នៃក្រុមទី១ តួតពិនិត្យការប្រកាសពន្ធលើមធ្យោបាយ ដឹកជញ្ជូនឆ្នាំ២០២៣ របស់ខេត្តព្រៃវែង ។
ACU បានបំភ្លឺថា កាលពីថ្ងៃទី២៩ ខែវិច្ឆិកា ឆ្នាំ២០២៤ លោក ឯម សុខសុវណ្ណ បានប្ដឹងមន្ត្រីរាជការចំនួន ១០រូប នៃក្រុមទី១ ត្រួតពិនិត្យ ការប្រកាសពន្ធលើមធ្យោបាយដឹកជញ្ជូនឆ្នាំ២០២៣ ខេត្តព្រៃវែង ទៅសាលាដំបូងខេត្តព្រៃវែង ដោយចោទប្រកាន់ពីបទ កេងយកផលប្រយោជន៍ដោយខុសច្បាប់ និងបទឆបោក មានស្ថានទម្ងន់ទោស ដោយសំអាងថា រូបគាត់ (ឯម សុខសុវណ្ណ) បានចូលបង់ពន្ធ មធ្យោបាយដឹកជញ្ជូនសម្រាប់រថយន្តរបស់គាត់ ម៉ាក LEXUS LX 470 ពណ៌ខ្មៅ ផលិតឆ្នាំ១៩៩៩ ពាក់ផ្លាកលេខ ភ្នំពេញ 2-7929 តាមកម្មវិធីទូរសព្ទដៃ អ្នកជាប់ពន្ធ “GDT Taxpayer App” របស់អគ្គនាយកដ្ឋានពន្ធដារ ហើយបង្ហាញថា រូបគាត់ជាប់ពន្ធលើមធ្យោបាយចំនួន២ គឺឆ្នាំ២០២៣ ចំនួន ១ ៦០០ ០០០រៀល និងឆ្នាំ២០២៤ ចំនួន ៨០០ ០០០រៀល សរុបស្មើនឹង ២ ៤០០ ០០០រៀល ខណៈដែលរូបគាត់បានទូទាត់ប្រាក់ពន្ធ និងប្រាក់ពិន័យឆ្នាំ២០២៣ ចំនួន ៨០០ ០០០រៀល កាលពីថ្ងៃទី១ ខែកុម្ភៈ ឆ្នាំ២០២៤ ហើយប្រាក់ពន្ធ ដែលនៅសល់ ត្រូវបានទូទាត់រួចរាល់ តាំងពីថ្ងៃទី១ ខែមិថុនា ឆ្នាំ២០២៤ មកម្ល៉េះ។ ការណ៍នេះ នាំឱ្យលោក ឯម សុខសុវណ្ណ យល់ថា ប្រាក់ពន្ធឆ្នាំ២០២៣ ដែលគាត់បានបង់រួចហើយនោះ ត្រូវបានរក្សាទុកជាប្រយោជន៍ផ្ទាល់ខ្លួន ។
នៅថ្ងៃទី២ ខែធ្នូ ឆ្នាំ២០២៤ លោក ឯម សុខសុវណ្ណ បានដាក់ពាក្យប្ដឹងសមាសភាពទាំង ១០រូបខាងលើបន្ថែម ចំនួនមួយបទល្មើសទៀត គឺបទរំលោភលើទំនុកចិត្ត និងប្តឹងលោក ឃឹម ហៀង ប្រធានការិយាល័យពន្ធដារ ស្រុកពាមរក៍ និងបក្ខពួក ពីបទជ្រៀតជ្រែកដោយខុសច្បាប់ ក្នុងការបំពេញមុខងារសាធារណៈ និងការក្លែងបន្លំ ។
អាស្រ័យដោយពាក្យបណ្ដឹងរបស់លោក ឯម សុខសុវណ្ណ មានការលើកឡើងពីបទកេងយកផលប្រយោជន៍ដោយខុសច្បាប់ ដែលត្រូវបានចាត់ថ្នាក់ជាបទល្មើសពុករលួយ និងជាសមត្ថកិច្ចផ្ដាច់មុខរបស់អង្គភាពប្រឆាំងអំពើពុករលួយ (អ.ប.ព.) ក្នុងការស៊ើបអង្កេត និងកសាងសំណុំរឿងបញ្ជួនទៅតុលាការ ទើបអយ្យការអមសាលាដំបូងខេត្តព្រៃវែង បានបញ្ជូនសំណុំរឿងខាងលើមក អ.ប.ព. ដើម្បីចាត់ការតាមនីតិវិធី ។
បន្ទាប់ពីទទួលបានសំណុំរឿខាងលើ ពីអយ្យការអមសាលាដំបូងខេត្តព្រៃវែង នៅថ្ងៃទី១១ ខែមេសា ឆ្នាំ២០២៥ អ.ប.ព. បានដំណើរនីតិវិធីស្រាវជ្រាវប្រមូលព័ត៌មានដោយបាន ៖
I. កោះហៅអ្នកពាក់ព័ន្ធចំនួន ១២នាក់ ដែលសុទ្ធសឹងជាអ្នកដែលត្រូវបានលោក ឯម សុខសុវណ្ណ ប្ដឹង ដើម្បីស្ដាប់ការបំភ្លឺ រួមមាន ៖
១- ឈ្មោះ ហ៊ឹម ឡូញ អតីតប្រធានសាខាពន្ធដារខេត្តព្រៃវែង
២- ឈ្មោះ សេក វណ្ណា អនុប្រធានសាខាពន្ធដារខេត្តព្រៃវែង និងជាប្រធានក្រុមត្រួតពិនិត្យ
៣- ឈ្មោះ ទីន ភារម្យ មន្ត្រីរដ្ឋបាលខេត្តព្រៃវែង និងជាអនុប្រធានក្រុមត្រួតពិនិត្យ
៤- ឈ្មោះ ឃឹម ហៀង ប្រធានការិយាល័យពន្ធដារស្រុកពាមរក៍ ខេត្តព្រៃវែង និងជាអនុប្រធានក្រុមត្រួតពិនិត្យ
៥- ឈ្មោះ ឯម សុភាព ប្រធានការិយាល័យពន្ធដារស្រុកមេសាង ខេត្តព្រៃវែង
៦- ឈ្មោះ ខុន កុសល ប្រធានការិយាល័យពន្ធដារស្រុកព្រះស្តេច ខេត្តព្រៃវែង
៧- ឈ្មោះ កែវ ស៊ីយឿន ប្រធានការិយាល័យពន្ធដារស្រុកបាភ្នំ ខេត្តព្រៃវែង
៨- ឈ្មោះ នាថ តារា មន្ត្រីការិយាល័យពន្ធដារស្រុកពាមរក៍ ខេត្តព្រៃវែង
៩- ឈ្មោះ វ៉ី ភារុន មន្ត្រីការិយាល័យពន្ធដារស្រុកពាមរក៍ ខេត្តព្រៃវែង
១០- ឈ្មោះ ច្រឹក ហ៊ល នាយរងផ្នែកការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តព្រៃវែង
១១- ឈ្មោះ ហំ ចំរើន នាយការិយាល័យគីមីសាស្ត្រ នៃបញ្ហាការដ្ឋានកងរាជអាវុធហត្ថខេត្តព្រៃវែង
១២- ឈ្មោះ ហេង ចាន់តារា អតីតមន្ត្រីរដ្ឋបាល នៃសាខាពន្ធដារខេត្តព្រៃវែង។
II. ស្នើសុំការបំភ្លឺពីអគ្គនាយកដ្ឋានពន្ធដារ អំពីការរក្សាទុកប្រាក់ពន្ធ និងគោលការណ៍ នៃការបោះពុម្ពលតាបត្រពន្ធលើ មធ្យោបាយដឹកជញ្ជួន។
III. ការស៊ើបអង្កេតតាមរយៈការស្តាប់ការបំភ្លឺពីអ្នកពាក់ព័ន្ធ ការបំភ្លឺពីអគ្គនាយកដ្ឋានពន្ធដារ និងស្រាវជ្រាវពីប្រភពផ្សេងៗ អ.ប.ព. រកឃើញ ដូចខាងក្រោម៖
១- នៅថ្ងៃទី១ ខែកុម្ភៈ ឆ្នាំ២០២៤ ការត្រួតពិនិត្យការប្រកាសពន្ធលើមធ្យោបាយដឹកជញ្ជូន រកឃើញថា លោក ឯម សុខសុវណ្ណ ពុំបានបំពេញកាតព្វកិច្ចបង់ប្រាក់ពន្ធ លើមធ្យោបាយដឹកជញ្ជូនឆ្នាំ២០២៣ សម្រាប់រថយន្តរបស់គាត់មាន ម៉ាក LEXUS LX470 ឆ្នាំផលិត១៩៩៩ ផ្លាកលេខភ្នំពេញ 2I-7929 ដែលមានចំនួន ៨០០ ០០០រៀល នោះទេ រហូតទាល់តែត្រូវបានក្រុមត្រួតពិនិត្យនៅចំណុចផ្លូវជាតិលេខ១ ស្ថិតក្នុងស្រុកព្រះស្តេច ផ្ទៀងផ្ទាត់ឃើញថា ពុំទាន់បង់ប្រាក់ពន្ធ ឆ្នាំ២០២៣ ទើបត្រូវបានកំណត់ឱ្យបង់ប្រាក់ពន្ធសរុបចំនួន ១ ៦០០ ០០០រៀល ដោយក្នុងនោះមានប្រាក់ពន្ធបន្ថែម (ទណ្ឌកម្មរដ្ឋបាលសម្រាប់ការបង់ពន្ធលើមធ្យោបាយដឹកជញ្ចូនយឺតយ៉ាវ) ចំនួន ៨០០ ០០០រៀល។ នៅចំពោះមុខក្រុមត្រួតពិនិត្យ លោក ឯម សុខសុវណ្ណ ពុំមានប្រាក់គ្រប់ចំនួន ក៏បានស្នើសុំកក់ប្រាក់ចំនួន ៨០០ ០០០រៀល ហើយក្រុមត្រួត ពិនិត្យបានធ្វើកំណត់ហេតុ ស្ដីពីការត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូនសម្រាប់ឆ្នាំ២០២៣ ហើយ លោក ឯម សុខសុវណ្ណ ត្រូវយកប្រាក់មកបង់បង្គប់ត្រឹមថ្ងៃទី៣១ ខែមីនា ឆ្នាំ២០២៤។ នៅថ្ងៃទី៣១ ខែមីនា ឆ្នាំ២០២៤ ជាថ្ងៃកំណត់បង់ប្រាក់ពន្ធបង្គប់ លោក ឯម សុខសុវណ្ណ មិនបានបង់ពន្ធបង្គ្រប់តាមការសន្យារបស់ខ្លួនទេ គឺបានបង់តែ ២០០ ០០០រៀល តែប៉ុណ្ណោះ ធ្វើឱ្យប្រាក់ពន្ធ ដែលគាត់ (ឯម សុខសុវណ្ណ) មិនទាន់បង់មានចំនួន ៦០០ ០០០រៀល។ រហូតដល់ថ្ងៃទី១ ខែកក្កដា ឆ្នាំ២០២៤ (ហួសពេលកំណត់រយៈពេល ៣ខែ) លោក ឯម សុខសុវណ្ណ បានបង់ប្រាក់ចំនួន ៧០០ ០០០រៀល (លើសទឹកប្រាក់ដែលត្រូវបង់ ១០០ ០០០រៀល)។
២- នៅអំឡុងខែវិច្ឆិកា ឆ្នាំ២០២៤ លោក ឯម សុខសុវណ្ណ បានចូលបង់ពន្ធតាមកម្មវិធីទូរសព្ទដៃ អ្នកជាប់ពន្ធ “GDT Taxpayer_App” របស់អគ្គនាយកដ្ឋានពន្ធដារ ប៉ុន្តែមិនអាចបង់បាន ដោយប្រព័ន្ធពន្ធដារ បញ្ជាក់ថា រូបគាត់នៅជំពាក់ប្រាក់ពន្ធ និងប្រាក់ពិន័យឆ្នាំ២០២៣។ ការនៅជំពាក់ប្រាក់ពន្ធនេះ ដោយសារតែប្រាក់ពន្ធ និងប្រាក់ពិន័យសម្រាប់ ឆ្នាំ២០២៣ មិនទាន់ត្រូវបានបញ្ចូលក្នុងប្រព័ន្ធគ្រប់គ្រងពន្ធលើមធ្យោបាយរបស់អគ្គនាយកដ្ឋានពន្ធដារ ព្រោះការបង់ប្រាក់លើកដំបូង កាលពីថ្ងៃទី១ ខែកុម្ភៈ ឆ្នាំ២០២៤ លោក ឯម សុខសុវណ្ណ មិនបានបង់គ្រប់ចំនួនទេ គឺបង់បានតែ ៨០០ ០០០ រៀល (លើប្រាក់ពន្ធ និងប្រាក់ពិន័យត្រូវបង់ ១ ៦០០០០០រៀល) ហើយលើកទី២ ថ្ងៃទី៣១ ខែមីនា ឆ្នាំ២០២៤ លោក ឯម សុខសុវណ្ណ បង់បានតែ ២០០ ០០០រៀល ប៉ុណ្ណោះ គឺនៅខ្វះ ៦០០ ០០០រៀល ហើយលោក ឯម សុខសុវណ្ណ មិន ព្រមបង់ប្រាក់ពន្ធ ដែលនៅខ្វះនេះទេ រហូតដល់ថ្ងៃទី១ ខែកក្កដា ឆ្នាំ២០២៤ (ហួសកំណត់ពេលបង់ប្រាក់ដល៣ខែ) ទើបលោក ឯម សុខសុវណ្ណ បង់ប្រាក់ពន្ធចំនួន ៧០០ ០០០រៀល (លើសចំនួនដែលត្រូវបង់ ១០០ ០០០រៀល។ ទោះបី លោក ឯម សុខសុវណ្ណ បានបង់ប្រាក់ពន្ធ និងប្រាក់ពិន័យរួចហើយក្តី ប៉ុន្តែកាលបរិច្ឆេទ ដែលលោក ឯម សុខសុវណ្ណ
លើកចុងក្រោយ មានការយឺតយ៉ាវរហូតដល់ ៣ខែ ហើយត្រូវដល់ពេលដែលត្រូវប្រមូលពន្ធសម្រាប់ឆ្នាំ២០២៤ ទៅហើយនោះ ទើបធ្វើឱ្យប្រាក់ពន្ធរបស់គាត់ ពុំត្រូវបានបញ្ចូលក្នុងប្រព័ន្ធគ្រប់គ្រងពន្ធលើមធ្យោបាយរបស់អគ្គនាយកដ្ឋានពន្ធដារ នោះទេ ហើយប្រាក់ពន្ធនេះនៅរក្សាទុកក្នុងទូដែករបស់របស់ការិយាល័យពន្ធដារស្រុកពាមរក៍ រង់ចាំលោក ឯម សុខសុវណ្ណ មកបង់បង្គប់ ។
៣- អនុលោមតាមប្រកាសលេខ៥៣១ សហវ.ប្រក ចុះថ្ងៃទី៣០ ខែឧសភា ឆ្នាំ២០១៨ របស់ក្រសួងសេដ្ឋកិច្ច និងហិរញ្ញវត្ថុ ស្តីពីការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ មន្ត្រីពន្ធដារ មិនអាចដំណើរការ នីតិវិធីបង់ពន្ធ និងចេញលតាបត្រពន្ធឆ្នាំ២០២៣ ជូនលោក ឯម សុខសុវណ្ណ បានទេ ដោយសារត្រឹមថ្ងៃទី៣១ ខែមីនា ឆ្នាំ២០២៤ លោក ឯម សុខសុវណ្ណ ទើបបង់ប្រាក់ពន្ធបានចំនួន ១ ០០០ ០០០រៀល លើប្រាក់ពន្ធសរុបចំនួន ១ ៦០០ ០០០រៀល ហើយនៅថ្ងៃទី១ ខែកក្កដា ឆ្នាំ២០២៤ លោក ឯម សុខសុវណ្ណ ទើបបង់ប្រាក់ពន្ធបានចំនួន ១ ៧០០ ០០០រៀល លើប្រាក់ពន្ធសរុបចំនួន ២ ៤០០ ០០០រៀល ដោយការប្រមូលពន្ធលើមធ្យោបាយដឹកជញ្ជូនសម្រាប់ឆ្នាំ២០២៤ ត្រូវបាន ចាប់ផ្តើមនៅថ្ងៃទី១ ខែមិថុនា ឆ្នាំ២០២៤ ដល់ថ្ងៃទី៣០ ខែវិច្ឆិកា ឆ្នាំ២០២៤ ដែលលោក ឯម សុខសុវណ្ណ ត្រូវបង់ប្រាក់ពន្ធឆ្នាំ២០២៤ បន្ថែមទៀតសិន ទើបមន្ត្រីពន្ធដារអាចដំណើរការនីតិវិធីបង់ពន្ធក្នុងប្រព័ន្ធគ្រប់គ្រងពន្ធលើមធ្យោបាយរបស់ អគ្គនាយកដ្ឋានពន្ធដារ បោះពុម្ពលតាបត្រពន្ធឆ្នាំ២០២៤ ដែលមានរំលេចប្រាក់ពន្ធ និងប្រាក់ពិន័យឆ្នាំ២០២៣ និងប្រាក់ ពន្ធឆ្នាំ២០២៤ ។
៤- នៅថ្ងៃទី៣០ ខែវិច្ឆិកា ឆ្នាំ២០២៤ មន្ត្រីពន្ធដារខេត្តព្រៃវែង បានទាក់ទងឱ្យលោក ឯម សុខសុវណ្ណ មកបង់ពន្ធ ឆ្នាំ២០២៤ ចំនួន ៧០០ ០០០រៀល (បង្គ្រប់លើប្រាក់ដែលគាត់បានបង់នៅសល់ ១០០ ០០០រៀល) ប៉ុន្តែទាក់ទងលោក ឯម សុខសុវណ្ណ មិនបាន។ មន្ត្រីពន្ធដារស្រុកពាមរក៍ បានចុះទៅជួបលោក ឯម សុខសុវណ្ណ ដោយបានបោះពុម្ព លតាបត្រពន្ធលើមធ្យោបាយដឹកជញ្ជូនឆ្នាំ២០២៤ យកទៅជាមួយ ក្នុងបំណងឱ្យលោក ឯម សុខសុវណ្ណ បង់ពន្ធបង្គប់ (ប្រាក់ពន្ធ ត្រូវបង់ ៧០០ ០០០រៀល) ប៉ុន្តែលោក ឯម សុខសុវណ្ណ ពុំព្រមបង់ប្រាក់ពន្ធបង្គប់សម្រាប់ឆ្នាំ២០២៤ នេះទេ ទើប លតាបត្រ ដែលបានបោះពុម្ពរួចហើយនោះ ត្រូវបាន មោឃភាពវិញ ។
៥- លោក ឯម សុខសុវណ្ណ បដិសេធមិនព្រមបង់ប្រាក់ពន្ធបង្គ្រប់ចំនួន ៧០០ ០០០រៀល ជាប្រាក់ពន្ធ លើមធ្យោបាយដឹកជញ្ជូនឆ្នាំ២០២៤ ដែលខ្លួនត្រូវបង់នោះទេ បែរជាប្ដឹងសមាសភាពទាំង ១០រូប នៃក្រុមទី១ ត្រួតពិនិត្យការ ប្រមូលពន្ធលើមធ្យោបាយដឹកជញ្ជូនរបស់ខេត្តព្រៃវែង បន្ថែមពីបទរំលោភលើទំនុកចិត្ត និងប្តឹងលោក ឃឹម ហៀង និងបក្ខពួកបន្ថែម ពីបទជ្រៀតជ្រែកដោយខុសច្បាប់ក្នុងការបំពេញមុខងារសាធារណៈ និងការក្លែងបន្លំ ថែមទៀត ក្នុងពេលដែលលោក ឯម សុខសុវណ្ណ ខ្លួនឯង មិនព្រមបង់ពន្ធតាមច្បាប់កំណត់។
៦- ការបោះពុម្ពលតាបត្រពន្ធឆ្នាំ២០២៤ ជាមុន ដោយសារតែលោក ឯម សុខសុវណ្ណ បានបង់ពន្ធស្មើនឹង ៧០,៨៣% នៃប្រាក់ពន្ធ ដែលត្រូវបង់ (ប្រាក់ពន្ធ និងប្រាក់ពិន័យឆ្នាំ២០២៣ និងប្រាក់ពន្ធឆ្នាំ២០២៤) មិនមែនមាន អ្នកណាម្នាក់បង់ពន្ធជំនួសលោក ឯម សុខសុវណ្ណ នោះទេ ហើយលតាបត្រនេះ ត្រូវបានមោឃភាពវិញ ដោយសារលោក ឯម សុខសុវណ្ណ មិនព្រមបង់ពន្ធឱ្យគ្រប់ចំនួន ។
៧- នៅថ្ងៃទី១៥ ខែមករា ឆ្នាំ២០២៦ លោក ឯម សុខសុវណ្ណ បានអញ្ជើញមក អ.ប.ព. តាមការអញ្ជើញរបស់មន្ត្រីកាន់ករណ៏ ដើម្បីជម្រាបជូនពីលទ្ធផល នៃការស្រាវជ្រាវរបស់ អ.ប.ព. និងដើម្បីផ្ទៀងផ្ទាត់លើព័ត៌មានមួយចំនួន។ លោក ឯម សុខសុវណ្ណ ទទួលស្គាល់ថា ពិតជាមិនបានបង់ប្រាក់ពន្ធរថយន្តរបស់គាត់ក្នុងឆ្នាំ២០២៣ រហូតដល់ថ្ងៃដែលត្រូវបានក្រុមត្រួតពិនិត្យរកឃើញ ហើយត្រូវបានផាកពិន័យនៅថ្ងៃទី១ ខែកុម្ភៈ ឆ្នាំ២០២៤ ដោយលោកបានបង់ប្រាក់ពន ត្រឹមតែ ៨០០ ០០០រៀល ពិតមែន និងនៅថ្ងៃទី៣១ ខែមីនា ឆ្នាំ២០២៤ ដែលជាថ្ងៃកំណត់ត្រូវបង់ពន្ធបង្កប់ គាត់ពិតជាបានបង់ត្រឹមតែ ២០០ ០០០រៀល ប៉ុណ្ណោះ ហើយរហូតទាល់តែថ្ងៃទី១ ខែកក្កដា ឆ្នាំ២០២៥ ទើបបានបង្ហា ៧០០ ០០០រៀល ទៀត។ នៅពេលពន្យល់អំពីលទ្ធផល នៃការស្រាវជ្រាវរបស់ អ.ប.ព. និងមូលហេតុដែលប្រាក់ពន្ធរបស់គាត់មិនត្រូវ បានបញ្ចូលក្នុងប្រព័ន្ធគ្រប់គ្រងពន្ធលើមធ្យោបាយរបស់អគ្គនាយកដ្ឋានពន្ធដារ លោក ឯម សុខសុវណ្ណ ពុំព្រមទទួលយក ការពន្យល់ទេ ហើយនៅតែបន្តចោទប្រកាន់ថា លោក ឃឹម ហៀង ប្រធានការិយាល័យពន្ធដារស្រុកពាមរក៍ ស៊ីដាច់ប្រាក់ពន្ធ និងប្រាក់ពិន័យឆ្នាំ២០២៣ ដែលគាត់បានបង់រួចហើយ ហើយចំពោះការយកលតាបត្រពន្ធ ប្រចាំឆ្នាំ២០២៤ ទៅប្រគល់ឱ្យគាត់នៅផ្ទះ កាលពីថ្ងៃទី៣០ ខែវិច្ឆិកា ឆ្នាំ២០២៤ ត្រូវបានលោក ឯម សុខសុវណ្ណ ចោទថា មានអ្នកបង់ពន្ធជំនួសគាត់ ទោះបីមានការពន្យល់ជូនគាត់អំពីនីតិវិធី នៃការបោះពុម្ពលតាបត្រពន្ធ និងករណីមន្ត្រីពន្ធដារ តម្រូវឱ្យគាត់បង់ប្រាក់ពន្ធឆ្នាំ២០២៤ បង្គ្រប់ចំនួន ៧០០ ០០០រៀល ដើម្បីឱ្យមន្ត្រីពន្ធដារអាចប្រគល់លតាបត្រពន្ធឆ្នាំ២០២៤ ជូនគាត់ក៏ដោយ ក៏គាត់ នៅតែចចេស មិនព្រមទទួលយកការពន្យល់នេះ ។
៨- នៅថ្ងៃទី១២ ខែកុម្ភៈ ឆ្នាំ២០២៦ លោក ឯម សុខសុវណ្ណ បានដាក់ពាក្យប្ដឹងគោរពជូនសម្ដេចកិត្តិសង្គហបណ្ឌិត ម៉ែន សំអន ប្រធានក្រុមប្រឹក្សាជាតិប្រឆាំងអំពើពុករលួយ ដោយចោទប្រកាន់ថា អ.ប.ព. មិនមានចំណាត់ការលើសំណុំរឿង ដែលអយ្យការអមសាលាដំបូងខេត្តព្រៃវែង បញ្ជូនមក អ.ប.ព. ពាក់ព័ន្ធនឹងពាក្យប្ដឹងរបស់គាត់ (ឯម សុខសុវណ្ណ) ដែលបានប្ដឹងក្រុមត្រួតពិនិត្យការប្រកាសពន្ធលើមធ្យោបាយដឹកជញ្ជូនឆ្នាំ២០២៣ ខេត្តព្រៃវែង ខណៈដែល អ.ប.ព. បានអញ្ជើញគាត់មកជម្រាបអំពីដំណើរការ នៃការស្រាវជ្រាវរបស់ អ.ប.ព. ព្រមទាំងជម្រាបជូនគាត់អំពីលទ្ធផល នៃការស្រាវជ្រាវ ករណីនេះជាបឋមមុនរួចទៅហើយ ។
ជារួម លោក ឯម សុខសុវណ្ណ ក្នុងនាមជាប្រធានគណបក្សមួយរូប ដែលគួរតែជាអ្នកធ្វើគំរូល្អ ក្នុងការគោរពច្បាប់ ការបំពេញកាតព្វកិច្ចនានា ក្នុងនាមជាពលរដ្ឋល្អ ជាពិសេស គឺកាតព្វកិច្ចបង់ពន្ធជូនរដ្ឋ ប៉ុន្តែផ្ទុយទៅវិញ លោក ឯម សុខ សុវណ្ណ បែរជាមិនបង់ពន្ធរថយន្តរបស់ខ្លួន សម្រាប់ឆ្នាំ២០២៣ រហូតទាល់តែក្រុមត្រួតពិនិត្យការប្រមូលពន្ធលើមធ្យោបាយ ដឹកជញ្ជូនរកឃើញ ហើយត្រូវពិន័យជាទឹកប្រាក់ស្មើនឹងប្រាក់ ដែលត្រូវបង់ពន្ធ (៨០០ ០០០រៀល បូកប្រាក់ពិន័យ ៨០០ ០០០ រៀល) ក៏លោក ឯម សុខសុវណ្ណ នៅតែមិនបង់ឱ្យគ្រប់ចំនួន ហើយព្យាយាមគេចវេះ ម្ដងជាពីរដង រហូតទាល់តែត្រូវដល់ពេលត្រូវបង់ពន្ធឆ្នាំ២០២៤ ក៏លោក ឯម សុខសុវណ្ណ ព្យាយាមគេចវេះ ពុំព្រមបង់ពន្ធតាមច្បាប់កំណត់ថែមទៀត។ ដើម្បី បិទបាំងអំពើល្មើសរបស់ខ្លួន ដែលគេចវេះពុំព្រមបង់ពន្ធនេះ លោក ឯម សុខសុវណ្ណ បានប្ដឹងមន្ត្រីពន្ធដារ និងអ្នកពាក់ព័ន្ធ ថា បានកិបកេងប្រាក់ពន្ធ ដែលខ្លួនគាត់បានបង់ ខណៈដែលតាមពិតលោក ឯម សុខសុវណ្ណ ពុំបានបង់ពន្ធតាមការបរិច្ឆេទ ដែលបានកំណត់នោះទេ។ លើសពីនេះទៅទៀត នៅពេលដែល អ.ប.ព. បានទទួលស៊ើបអង្កេតករណីនេះ តាមការបញ្ជួន ពីសាលាដំបូងខេត្តព្រៃវែង ហើយរកឃើញការពិត ចំពោះការគេចវេះការបង់ពន្ធរបស់លោក ឯម សុខសុវណ្ណ លោក ឯម សុខសុវណ្ណ បានប្រើឧបាយកលមួយទៀត គឺប្ដឹងចោទប្រកាន់ អ.ប.ព. ថាមិនមានចំណាត់ការលើសំណុំរឿងរបស់ខ្លួន ដែលត្រូវបានបញ្ជូនពីសាលាដំបូងខេត្តព្រៃវែង ខណៈដែល អ.ប.ព. បានជម្រាបជូនរូបគាត់រួចហើយ អំពីការស៊ើបអង្កេត និងលទ្ធផលដែល អ.ប.ព. រកឃើញ។ ការប្តឹងរបស់លោក ឯម សុខសុវណ្ណ ដែលមិនមានមូលដ្ឋាន មិនមែនជាការពិត គឺជាការប្តឹង ដែលបាននាំឱ្យសាលាដំបូងខេត្តព្រៃវែង និង អ.ប.ព. ធ្វើការស្រាវជ្រាវដោយអសារឥតការ ៕
ចែករំលែកព័តមាននេះ