ខេត្តបន្ទាយមានជ័យ ៖ លោកឧត្តមសេនីយ៍ រ៉ែម វីរៈ ស្នងការស្តីទី បន្តចុះពិនិត្យមើលកងកម្លាំងនគរបាលវរសេនាតូចការពារព្រំដែន គោកលេខ៨១៥ ក្នុងភូមិសាស្ត្រ ស្រុកម៉ាឡៃ កាលពីរសៀលថ្ងៃទី២៣កុម្ភៈ ឆ្នាំ២០២១ និងបន្តចុះពិនិត្យនិងសួរសុខទុក្ខ កងកម្លាំងនគរបាលវរសេនាតូចការពារព្រំដែនគោកលេខ៨១៥ សហការជាមួយកងកម្លាំងយោធាក្នុងប្រតិបត្តិការទប់ស្កាត់ ការលួចឆ្លងដែននិងបង្ក្រាបមេខ្យល់ និងអ្នកនាំផ្លូវឆ្លងដែនដោយមិនស្របច្បាប់ ស្ថិតក្នុងភូមិសាស្ត្រស្រុកម៉ាឡៃ ខេត្តបន្ទាយមានជ័យ ។
ក្នុងដំណើរការចុះពិនិត្យនោះដែរ លោកក៏បានជម្រុញដល់កងកម្លាំងទាំង០២ប្រភេទ គឺនគរបាលនិងយោធា ត្រូវបង្កើនការយកចិត្តទុកដាក់ ចំពោះការលួចឆ្លងដែន ចេញ-ចូល របស់ប្រជាពលរដ្ឋទៅប្រទេសថៃ ។ ជាងនេះទៀត ត្រូវស្រាវជ្រាវចំពោះមេខ្យល់ឬអ្នកនាំផ្លូវឆ្លងដែន ១/-គឺអ្នកមេខ្សល់ឬអ្នកនាំផ្លូវប្រជាជនឆ្លងដែនទៅប្រទេសថៃ,២/-គឺមេខ្សល់ឬអ្នកនាំផ្លូវប្រជាជនមកពីថៃចូលខ្មែរគេចវះពីសមត្ថកិច្ចរួចផុតពីការធ្វើចត្តាឡៃស័ក ។
លោកឧត្តមសេនីយ៍ស្នងការស្តីទី បានបញ្ជាក់ចំពោះមេខ្យល់ ឬអ្នកនាំផ្លូវ ឃាត់ខ្លួនបានមិនត្រូវមានការលើកលែងនោះឡើយ ត្រូវបញ្ជូនខ្លួនទៅការិយាល័យជំនាញរៀបចំសំណុំរឿង ចាត់ការតាមនិតិវិធីច្បាប់ ។
ជាក់ស្តែង នៅថ្ងៃទី២៣ ខែកុម្ភៈ នេះដែរ មុខសញ្ញានាំផ្លូវឆ្លងដែនមិនស្របច្បាប់ម្នាក់ ឈ្មោះនូន ទុំ ភេទប្រុស អាយុ២០ឆ្នាំ នៅភូមិសង្កែ ឃុំបឹងបេង ស្រុកម៉ាឡៃ ខេត្តបន្ទាយមានជ័យ និងប្រជាពលរដ្ឋប្រុស ស្រីចំនួន០៧នាក់ ក្នុងនោះក្មេងស្រី០១នាក់ មកក្រុងប៉ោយប៉ែត ដែលមានបំណងចូលទៅប្រទេសថៃ លក់ឥវ៉ាន់នៅផ្សារឡុងគ្លឿ ត្រូវបានចាញ់បោកមេខ្យល់គេយក០១នាក់ ៣ពាន់បាត ត្រូវបានកម្លាំងនគរបាលវរ៨១៥ និងកម្លាំងយោធា ប្រចាំការនៅប៉ុស្តិ៍ការពារព្រំដែនសង្កែ សហការជាមួយសមត្ថកិច្ចថៃ ធ្វើការឃាត់ខ្លួនមកសួរនាំប៉ុស្តិ៍សង្កែ ។
ទន្ទឹមនោះដែរ មានប្រជាពលរដ្ឋខ្មែរវិលត្រឡប់មកពីប្រទេសថៃចូលតាមច្រករបៀងប៉ុស្តិ៍ចំបក់ ឃុំបឹងបេង សរុបចំនួន២៩នាក់ ស្រី១១នាក់និងកុមារ០២នាក់ បានធ្វើការត្រួតពិនិត្យសុខភាពដោយមានគ្រូពេទ្យ សហការជាមួយកម្លាំងនគរបាលនៅប្រចាំការទីនោះផងដែរ។
នាឱកាសនោះ លោកឧត្តមសេនីយ៍ត្រី រ៉ែម វីរៈ ស្នងការស្តីទី ក៏បានអរគុណចំពោះកិច្ចសហការរបស់សមត្ថកិច្ចថៃ ក្នុងការចូលរួមប្រយុទ្ធប្រឆាំងជំងឺកូវីដ ពិសេសគឺទប់ស្កាត់ប្រជាពលរដ្ឋរងគ្រោះដោយ សារចាញ់បោកមេខ្យល់ឆ្លងដែនដោយខុសច្បាប់ទាំងចូលទៅថៃនិងត្រឡប់មកខ្មែរ និង សុំឲ្យជួយសហការក្នុងស្រាវជ្រាវរកមេខ្សល់ដែលកំពុងស្នាក់នៅទឹកដីថៃ ធ្វើសកម្មភាពអូសទាញប្រជាពលរដ្ឋខ្មែរឆ្លងដែនដោយមិនស្របច្បាប់នេះ ៕
ចែករំលែកព័តមាននេះ