ប្រទេសមីយ៉ាន់ម៉ា ៖ បាតុករច្រើនឡើងៗនៅប្រទេសមីយ៉ាន់បានចូលរួមធ្វើការតវ៉ាអហិង្សាដោយមិនចូលធ្វើការ ដើម្បីប្រឆាំងនឹងរបបយោធា កំពុងក្លាយជាអាវុធមុខស្រួច ធ្វើអោយមេដឹកនាំយោធាកំពុងភ័យព្រួយដោយសារតែការជាប់គាំងសេដ្ឋកិច្ច ។ ប្រព័ន្ធផ្សព្វផ្សាយរបស់រដ្ឋាភិបាលមីយ៉ាន់ម៉ា បានរាយការណ៍នៅថ្ងៃអង្គារទី ២៣…
ប្រទេសមីយ៉ាន់ម៉ា ៖ បាតុករច្រើនឡើងៗនៅប្រទេសមីយ៉ាន់បានចូលរួមធ្វើការតវ៉ាអហិង្សាដោយមិនចូលធ្វើការ ដើម្បីប្រឆាំងនឹងរបបយោធា កំពុងក្លាយជាអាវុធមុខស្រួច ធ្វើអោយមេដឹកនាំយោធាកំពុងភ័យព្រួយដោយសារតែការជាប់គាំងសេដ្ឋកិច្ច ។
ប្រព័ន្ធផ្សព្វផ្សាយរបស់រដ្ឋាភិបាលមីយ៉ាន់ម៉ា បានរាយការណ៍នៅថ្ងៃអង្គារទី ២៣ ខែ កុម្ភៈ ឆ្នាំ ២០២១ ថាមេដឹកនាំនៃរបបយោធា បានអំពាវនាវឱ្យមានកិច្ចខិតខំប្រឹងប្រែងខ្លាំងក្លា ដើម្បីស្តារសេដ្ឋកិច្ចដែលកំពុងមានភាពទន់ខ្សោយឡើងវិញ ខណៈដែលបណ្តាប្រទេសលោកខាងលិចបានពិចារណា លើការដាក់ទណ្ឌកម្មបន្ថែមទៀត ដើម្បីជម្រុញ ឱ្យឧត្តមសេនីយ៍ដែលបានធ្វើរដ្ឋប្រហារ ឱ្យបញ្ឈប់ការបង្ក្រាបដោយហិង្សាលើបាតុកម្ម ដែលកំពុងទាមទារលិទ្ធិប្រជាធិបតេយ្យ។
ការអំពាវនាវគឺផ្តោតសំខាន់តែលើសេដ្ឋកិច្ចនេះ បានកើតឡើងបន្ទាប់ពីមានកូដកម្មទូទៅមួយ ដែលបានបិទអាជីវកម្ម កាលពីថ្ងៃចន្ទ ដោយមានប្រជាជនយ៉ាងច្រើនបានប្រមូលផ្ដុំគ្នា ដើម្បីប្រឆាំងនឹងរដ្ឋប្រហារយោធា ដែលបានធ្វើឡើងតាំងពីថ្ងៃទី ១ ខែ កុម្ភៈ មក ហើយបានទាមទារឱ្យមានការដោះលែង មេដឹកនាំជាប់ឆ្នោត គឺលោកស្រី អ៊ុងសាន ស៊ូជី ទោះបីជាមានការព្រមាន ពីអាជ្ញាធរថាការប្រឈមមុខគ្នានេះ អាចនឹងធ្វើឱ្យមានមនុស្សស្លាប់ផងដែរ ។
សូមជម្រាបជូនផងដែរថា អ្នកប្រឆាំងនឹងរដ្ឋប្រហារ បានប្រមូលផ្តុំគ្នាម្តងទៀតកាលពីថ្ងៃអង្គារិ៍ ទោះបីជាមានចំនួនតិចតួចក៏ដោយ។ ហើយប្រព័ន្ធផ្សព្វផ្សាយ ក៏បានរាយការណ៍ថាក៏មានការហែក្បួនតូចៗ ក្នុងការគាំទ្រដល់របបយោធាផងដែរ ប៉ុន្តែមិនមានការរាយការណ៍ណាមួយ ដែលបញ្ជាក់ពីអំពើហិង្សានោះទេ។
បន្ទាប់ពីបានធ្វើរដ្ឋប្រហារកាន់កាប់ប្រទេសមីយ៉ាន់ម៉ារួច មេបញ្ជាការយោធា លោកឧត្តមសេនីយ៍ Min Aung Hlaing បានធ្វើកិច្ចប្រជុំជាមួយក្រុមប្រឹក្សាកាន់អំណាចរបស់លោក កាលពីថ្ងៃចន្ទ និងបានអំពាវនាវឱ្យមានការកាត់បន្ថយក្នុងការចំណាយឬការនាំចូលរបស់រដ្ឋ និងត្រូវបង្កើនការនាំចេញ។
ប្រព័ន្ធផ្សព្វផ្សាយរបស់រដ្ឋបានដកស្រង់សម្តីលោក ដូចនេះថា៖ «ក្រុមប្រឹក្សាចាំបាច់ត្រូវដាក់ថាមពលរបស់ខ្លួន ទៅក្នុងការស្តារសេដ្ឋកិច្ចទន់ខ្សោយរបស់ប្រទេសឡើងវិញ ហើយវិធានការដោះស្រាយសេដ្ឋកិច្ចត្រូវតែមាន» ។
គួរបញ្ជាក់ផងដែរថា កងទ័ពបានដណ្តើមអំណាចបន្ទាប់ពីបានចោទប្រកាន់ ថាមានការក្លែងបន្លំសន្លឹកឆ្នោត នៅក្នុងការបោះឆ្នោតកាលពីថ្ងៃទី ៨ ខែ វិច្ឆិកា កន្លងមកនេះ ហើយរបបយោធាបានកាន់កាប់ប្រទេសទាំងស្រុង និងបានឃុំខ្លួនលោកស្រី អ៊ុងសាន ស៊ូជី និងមេដឹកនាំគណបក្សជាច្រើនទៀតផងដែរ ប៉ុន្តែគណៈកម្មការរៀបចំការបោះឆ្នោតបានច្រានចោល នៃពាក្យបណ្តឹងឬការចោទប្រកាន់ទាំងនេះ៕ ប្រែសម្រួលពី ៖ CNA
(ចេញផ្សាយ ថ្ងៃទី ២៤ ខែ កុម្ភៈ ឆ្នាំ ២០២១)
ចែករំលែកព័តមាននេះ