ទីក្រុងតូក្យូ ៖ នាយករដ្ឋមន្ត្រីជប៉ុន លោកស្រី សាណាអេ តាកាអ៊ីឈី (Sanae Takaichi) មានគម្រោងកែសម្រួលច្បាប់ស្តីពីប្រាក់បំណាច់មន្ត្រីរាជការ ដើម្បីកាត់បន្ថយប្រាក់ខែសមាជិកគណៈរដ្ឋមន្ត្រី…
ទីក្រុងតូក្យូ ៖ នាយករដ្ឋមន្ត្រីជប៉ុន លោកស្រី សាណាអេ តាកាអ៊ីឈី (Sanae Takaichi) មានគម្រោងកែសម្រួលច្បាប់ស្តីពីប្រាក់បំណាច់មន្ត្រីរាជការ ដើម្បីកាត់បន្ថយប្រាក់ខែសមាជិកគណៈរដ្ឋមន្ត្រី រួមទាំងលោកស្រីផ្ទាល់ផងដែរ អំឡុងពេលសម័យប្រជុំវិសាមញ្ញរបស់សភា នៅពេលខាងមុខនេះ។ នេះបើតាមប្រភពពីសារព័ត៌មាន Japan Times និង Nippon បានចេញផ្សាយ។
យោងតាមព័ត៌មានពីរដ្ឋាភិបាលជប៉ុនបានឱ្យដឹងថា កិច្ចប្រជុំជាមួយរដ្ឋមន្ត្រីពាក់ព័ន្ធនឹងធ្វើឡើងនៅថ្ងៃទី១១ ខែវិច្ឆិកា ឆ្នាំ២០២៥ ដើម្បីបញ្ជាក់ពីការផ្អាកប្រាក់ឧបត្ថម្ភបន្ថែមសម្រាប់នាយករដ្ឋមន្ត្រី និងរដ្ឋមន្ត្រីគណៈរដ្ឋមន្ត្រី ដែលត្រូវបានផ្តល់បន្ថែមពីលើប្រាក់ខែរបស់សមាជិកសភា។
ការផ្លាស់ប្តូរថ្មីនេះ ត្រូវបានមើលឃើញថា គឺជាកិច្ចខិតខំប្រឹងប្រែងរបស់នាយករដ្ឋមន្ត្រីជប៉ុន លោកស្រី តាកាអ៊ីឈី ផ្ទាល់តែម្តង ដើម្បីបង្ហាញពីការប្តេជ្ញាចិត្តរបស់លោកស្រីក្នុងការកែទម្រង់ និងធ្វើឱ្យការចំណាយសាធារណៈមានភាពប្រសើរឡើង ស្របទៅតាមការប្រកាសពីមុនរបស់លោកស្រីថានឹងកាត់បន្ថយប្រាក់ខែរដ្ឋមន្ត្រី។ លោកស្រី បានបញ្ជាក់នៅក្នុងសន្និសីទសារព័ត៌មានកាលពីខែតុលាថា លោកស្រីនឹងជំរុញឱ្យមានវិសោធនកម្មច្បាប់ ដើម្បីកុំឱ្យសមាជិកគណៈរដ្ឋមន្ត្រីទទួលបានប្រាក់ខែខ្ពស់ជាងប្រាក់ខែរបស់បណ្តាអ្នកតាក់តែងច្បាប់។
បើយោងតាមព័ត៌មានដែលផ្តល់ដោយប្រធានលេខាធិការគណៈរដ្ឋមន្ត្រីជប៉ុនបានឱ្យដឹងថា បច្ចុប្បន្ន សមាជិកសភាជប៉ុនក្នុងម្នាក់ទទួលបានប្រាក់ខែ ១ ២៩៤ ០០០យ៉េនក្នុង១ខែ ឬ ៨ ៤០៥ដុល្លារអាមេរិក ហើយនៅក្នុងនោះ នាយករដ្ឋមន្ត្រីទទួលបានប្រាក់បន្ថែម ១ ១៥២ ០០០យ៉េនក្នុង១ខែ ឬ ៧ ៤៨២ដុល្លារ និងរដ្ឋមន្ត្រីទទួលបានប្រាក់បន្ថែម ៤៨៩ ០០០យ៉េនក្នុង១ខែ ឬ ៣ ១៧៥ដុល្លារ។
ទោះជាយ៉ាងណាក៏ដោយ នៅក្នុងក្របខ័ណ្ឌនៃគោលនយោបាយកែទម្រង់រដ្ឋបាល និងហិរញ្ញវត្ថុ នាយករដ្ឋមន្ត្រីជប៉ុនបានសងប្រាក់ ៣០% នៃប្រាក់ខែរបស់លោកស្រីដោយស្ម័គ្រចិត្ត និងបានស្នើឱ្យកាត់បន្ថយប្រាក់ខែរដ្ឋមន្ត្រីចំនួន ២០%។
ផែនការនេះ ទទួលបានការសាទរថា «ល្អឥតខ្ចោះ» ដោយលោក (Fumitake Fujita) មេដឹកនាំគណបក្សប្រឆាំងដ៏លេចធ្លោមួយនៅជប៉ុន ឈ្មោះ គណបក្សនវានុវត្តន៍ជប៉ុន (JIP ឬ Ishin) ដោយបង្ហាញពីឆន្ទៈដ៏មុតមាំរបស់នាយករដ្ឋមន្ត្រីក្នុងការកែទម្រង់។
យ៉ាងណាមិញ មតិមួយចំនួនក៏កំពុងបង្ហាញការសង្ស័យអំពីការកាត់បន្ថយប្រាក់ខែរបស់រដ្ឋមន្ត្រីស្ថិតនៅក្នុងបរិបទដែលរដ្ឋាភិបាលអំពាវនាវឱ្យបង្កើនប្រាក់ចំណូលសម្រាប់ប្រជាជន។
ជាក់ស្តែង លោក Yuichiro Tamaki មេដឹកនាំគណបក្សប្រជាធិបតេយ្យដើម្បីប្រជាជន (DPFP) បានរិះគន់ជាសាធារណៈចំពោះផែនការនេះថាជាការបង្ហាញពី ការគិតបែបអតិផរណា ខណៈដែលប្រទេសជប៉ុនកំពុងតែប្រឈមមុខនឹងបញ្ហាអតិផរណា។ សមាជិកគណៈរដ្ឋមន្ត្រីម្នាក់ដែលមិនបញ្ចេញឈ្មោះ ក៏ទទួលស្គាល់ថា ខ្លួនមានអារម្មណ៍ព្រួយបារម្ភចំពោះការសម្រេចចិត្តរបស់លោកស្រីនាយករដ្ឋមន្ត្រី តាកាអ៊ីឈី ផងដែរ៕
ចែករំលែកព័តមាននេះ