ទីក្រុងប៉េកាំង៖ នៅក្នុងឱកាសបំពេញទស្សនកិច្ចនៅទីក្រុងប៉េកាំងរយៈពេលបីថ្ងៃ លោកម៉ាក្រុងបានជំរុញឱ្យលោកស៊ីជីនពីងប្រើប្រាស់ឥទ្ធិពលក្នុងនាមជាប្រទេសមហាអំណាចជួយនិយាយបញ្ចុះបញ្ចូលឱ្យរុស្ស៊ីទទួលយកបទឈប់បាញ់។ ទស្សនកិច្ចនេះធ្វើឡើងត្រឹមតែប៉ុន្មានថ្ងៃប៉ុណ្ណោះបន្ទាប់ពីលោកម៉ាក្រុង និងលោកហ្សេឡិនស្គីជួបគ្នានៅទីក្រុងប៉ារីស។
នៅក្នុងឱកាសនោះ លោកហ្សេឡិនស្គីស្នើសុំឱ្យអឺរ៉ុបបន្តគាំទ្រអ៊ុយក្រែន ខណៈដែលលោកត្រាំកំពុងខិតខំចរចាគ្នាជាមួយរុស្ស៊ីដើម្បីបញ្ចប់សង្គ្រាម។ លោកម៉ាក្រុងជម្រាបជូនថ្នាក់ដឹកនាំចិនថាសម្រាប់ពេលនេះការសន្ទនាគ្នារវាងប្រទេសចិន និងបារាំងរឹតតែមានសារៈសំខាន់ជាងពេលណាៗទាំងអស់។ លោកសូមស្នើសុំរបៀបវារៈចំនួនបីនៃទំនាក់ទំនង។
ទី១ការរក្សាស្ថិរភាពភូមិសាស្ត្រនយោបាយ ទី២ការរក្សាជញ្ជីងពាណិជ្ជកម្ម និងទី៣ការរក្សានិរន្តរភាពបរិស្ថាន។ យើងចាំបាច់ត្រូវតែបន្តរួបរួមគ្នាដើម្បីថែរក្សាសន្តិភាព និងស្ថិរភាពនៅលើពិភពលោក។ លោកនិយាយត្រង់ចំណុចនេះចង់សំដៅទៅលើសង្គ្រាមនៅអ៊ុយក្រែនដែលបណ្ដាលឱ្យស្លាប់ទាហានរុស្ស៊ីលើសពី១,៥សែននាក់។ លោកយល់ថាបើសិនបារាំង និងចិនចេះសហការគ្នា ពេលនោះលទ្ធផលនឹងប្រកបដោយភាពច្បាស់លាស់។
ក្រៅពីវិស័យសន្តិសុខ លោកម៉ាក្រុងក៏កំពុងស្វះស្វែងរកការពង្រឹងកិច្ចសហការខាងពាណិជ្ជកម្មផងដែរ។ គេឃើញថ្នាក់ដឹកនាំធុរកិច្ចជាច្រើនរូបបានរួមដំណើរជាមួយគណៈប្រតិភូរបស់លោកម៉ាក្រុងទៅប្រទេសចិន។ លោកចង់ពង្រឹងនយោបាយការបរទេស និងចង់សម្រេចឱ្យបានកិច្ចព្រមព្រៀងពាណិជ្ជកម្មសម្រាប់ក្រុមហ៊ុនរបស់បារាំងដើម្បីជប់ឱ្យរស់ឡើងវិញនូវមរតកនយោបាយរបស់លោកដែលធ្លាប់ជួបនឹងចលាចលមួយគ្រាកាលពីរដូវក្ដៅ (ដូរនាយករដ្ឋមន្ត្រីជាច្រើនរូប)។
ចំណែកប្រទេសចិនចង់បន្ធូរបន្ថយភាពតានតឹងផ្នែកពាណិជ្ជកម្មជាមួយសហភាពអឺរ៉ុប។ ចិនចង់បង្ហាញថាខ្លួនជាដៃគូពាណិជ្ជកម្មដែលគួរឱ្យជឿទុកចិត្ត និងជាទីផ្សារសក្ដានុពលនាពេលអនាគតជំនួសឱ្យអាមេរិកនៅក្នុងស្ថានភាពដែលពិភពលោកជួបប្រទះនឹងការធ្លាក់ចុះសេដ្ឋកិច្ចដោយសារនយោបាយដំឡើងពន្ធរបស់លោកត្រាំ។
ប្រធានាធិបតីចិនថ្លែងថាមិនថាបរិស្ថានខាងក្រៅប្រែប្រួលយ៉ាងណាទេ ប្រទេសយើងទាំង២គួរតែបង្ហាញទស្សនវិស័យឯករាជ្យជាយុទ្ធសាស្ត្រក្នុងនាមជាប្រទេសមហាអំណាច។ លោកថ្លែងបន្តទៀតថាប្រទេសចិននៅតែប្ដេជ្ញាចិត្តលើកកម្ពស់សន្តិភាពនៅអ៊ុយក្រែន និងហ្កាហ្សាជានិច្ច។ នេះបើយោងតាមប្រភពពីរ៉យទ័រ និងប្រភពដទៃទៀត៕
ចែករំលែកព័តមាននេះ