ខេត្តកណ្តាល ៖ លោក គួច ចំរើន ចុះពិនិត្យស្ថានភាពទឹកលិច នៅភូមិសាស្ត្រស្រុកកៀនស្វាយ និងបានណែនាំដល់អាជ្ញាធរស្រុកត្រូវតាមដានឱ្យបានជាប់ជាប្រចាំ និងត្រៀមជួយដោះស្រាយឱ្យបានទាន់ពេលវេលា ។…
ខេត្តកណ្តាល ៖ លោក គួច ចំរើន ចុះពិនិត្យស្ថានភាពទឹកលិច នៅភូមិសាស្ត្រស្រុកកៀនស្វាយ និងបានណែនាំដល់អាជ្ញាធរស្រុកត្រូវតាមដានឱ្យបានជាប់ជាប្រចាំ និងត្រៀមជួយដោះស្រាយឱ្យបានទាន់ពេលវេលា ។ នេះបើយោងតាម រដ្ឋបាលខេត្តកណ្តាល បានប្រកាសនាថ្ងៃរសៀលទី០៤ ខែធ្នូ ឆ្នាំ២០២៥ ។
ជាក់ស្តែង លោក គួច ចំរើន អភិបាលនៃគណៈអភិបាលខេត្តកណ្ដាល បានណែនាំដល់អាជ្ញាធរស្រុកកៀនស្វាយ និងមន្ទីរពាក់ព័ន្ធទាំងអស់ ត្រូវយកចិត្តទុកដាក់ខ្ពស់ ចំពោះស្ថានភាពទឹកលិចផ្លូវ សាលារៀន និងផ្ទះសម្បែងរបស់បងប្អូនប្រជាពលរដ្ឋ ក្នុងភូមិសាស្ត្រឃុំឈើទាល ដោយត្រូវសហការគ្នាតាមដាន និងរាយការណ៍ឱ្យបានជាប់ជាប្រចាំមកខេត្ត ជាពិសេស ក៏ត្រូវតែរៀបចំផែនការ ដើម្បីត្រៀមជួយដោះស្រាយបញ្ញានានារបស់ប្រជាពលរដ្ឋឱ្យបានទាន់ពេលវេលា ប្រកបដោយការទទួលខុសត្រូវខ្ពស់ផងដែរ ។
លោក គួច ចំរើន បានណែនាំដូច្នេះ ក្នុងឱកាសដែលលោកបានដឹកនាំមន្ទីរជំនាញ មន្ត្រីពាក់ព័ន្ធ និងអាជ្ញាធរស្រុកកៀនស្វាយ ចុះពិនិត្យស្ថានភាពទឹកលិចដោយសារទឹកភ្លៀង នៅក្នុងបរិវេណដីខាងក្រោយសាលាបឋមសិក្សា និងអនុវិទ្យាល័យឬស្សីស្រុក និងស្ថានភាពរបស់ព្រែកឫស្សីស្រុក ស្ថិតនៅឃុំឈើទាល ស្រុកកៀនស្វាយ នាព្រឹកថ្ងៃទី៤ ខែធ្នូ ឆ្នាំ២០២៥ ។
ចំពោះដីផ្នែកខាងក្រោយរបស់សាលាបឋមសិក្សា និងអនុវិទ្យាល័យឬស្សីស្រុក ដែលបានរងការលិចទឹកទំហំជាង២ពាន់ម៉ែត្រការ៉េ លោកអភិបាលខេត្ត បានស្នើដល់អាជ្ញាធរស្រុកត្រូវយកដីមកចាក់បំពេញ និងត្រូវយកគ្រឿងចក្រមកឈូសឆាយឱ្យបានស្អាត និងកាយរំដោះទឹកចេញពីបរិវេណសាលាឱ្យបានឆាប់រហ័ស ។
ដោយឡែក សម្រាប់ស្ថានភាពរបស់ព្រែកឬស្សីស្រុក លោកអភិបាលខេត្ត បានជំរុញដល់មន្ទីរពាក់ព័ន្ធ និងអាជ្ញាធរស្រុកត្រូវសហការគ្នាចុះធ្វើនិយាមការទៅតាមបណ្ដោយព្រែក និងដាក់គ្រឿងចក្របណ្ដើរៗទុកសម្រាប់ធ្វើការកាយ និងស្ដារព្រែកនេះឱ្យបានល្អប្រសើឡើងវិញ កុំឱ្យមានការកកស្ទះ ដើម្បីទុករំដោះទឹកបញ្ជៀសការជនលិចសាលារៀន ផ្លូវ និងផ្ទះសំបែងប្រជាពលរដ្ឋ។
ពិសេសជាងនេះទៅទៀតនោះ គឺពាក់ព័ន្ធនិងការចុះធ្វើនិយាមការ និងការដឹកគ្រឿងចក្រចូល គឺដាច់ខាតមិនត្រូវឱ្យមានការប៉ះពាល់ដល់ប្រជាពលរដ្ឋជាដាច់ខាត ។
ក្នុងឱកាសនោះដែរ លោកអភិបាលខេត្ត បានធ្វើការក្រើនរំលឹកទៅដល់ក្រុមការងារមន្ទីរពាក់ព័ន្ធ និងអាជ្ញាធរមូលដ្ឋានគ្រប់លំដាប់ត្រូវបន្តយកចិត្តទុកដាក់លើការងារអន្តរាគមន៍ចំពោះបញ្ហាទឹកលិចក្នុងភូមិសាស្ត្រឃុំឈើទាលនេះបន្ថែមទៀត ត្រូវបន្តកិច្ចសហការគ្នាពិនិត្យស្ថានភាពទឹកលិចឱ្យបានជាប់ជាប្រចាំ ករណីចាំបាច់ត្រូវរាយការណ៍មកខេត្តឱ្យបានទាន់ពេលវេលា ដើម្បីខេត្តជួយដោះស្រាយឱ្យកាន់តែមានប្រសិទ្ធភាព សំដៅបញ្ចៀសបាននូវការជន់លិច ៕
ចែករំលែកព័តមាននេះ