រាជធានីភ្នំពេញ ៖ សហរដ្ឋអាមេរិកបានសម្រេចដកបម្រាមលក់អាវុធដែលបានដាក់លើកម្ពុជា តាំងឆ្នាំ២០២១ មក និងចាប់ផ្ដើមធ្វើសមយុទ្ធយោធារួមគ្នាឡើងវិញ។ នេះបើតាមការចេញផ្សាយពីសេតវិមាន ក្រោយជំនួបលើកដំបូងរវាងប្រធានាធិបតីអាមេរិក លោក ដូណាល់…
រាជធានីភ្នំពេញ ៖ សហរដ្ឋអាមេរិកបានសម្រេចដកបម្រាមលក់អាវុធដែលបានដាក់លើកម្ពុជា តាំងឆ្នាំ២០២១ មក និងចាប់ផ្ដើមធ្វើសមយុទ្ធយោធារួមគ្នាឡើងវិញ។ នេះបើតាមការចេញផ្សាយពីសេតវិមាន ក្រោយជំនួបលើកដំបូងរវាងប្រធានាធិបតីអាមេរិក លោក ដូណាល់ ត្រាំ (Donald Trump) និងនាយករដ្ឋមន្ត្រីនៃព្រះរាជាណាចក្រកម្ពុជា សម្តេចមហាបវរធិបតី ហ៊ុន ម៉ាណែត កាលពីថ្ងៃទី២៦ ខែតុលា ឆ្នាំ២០២៥ នៅប្រទេសម៉ាឡេស៊ី។
នាយករដ្ឋមន្ត្រីកម្ពុជា និងប្រធានាធិបតីអាមេរិក បានជួបគ្នាលើកដំបូង កាលពីថ្ងៃទី២៦ ខែតុលា ឆ្នាំ២០២៥ នៅក្នុងទីក្រុងគូឡាឡាំពួ ប្រទេសម៉ាឡេស៊ី ដែលជាទីរៀបចំកិច្ចប្រជុំអាស៊ាន និងកិច្ចប្រជុំពាក់ព័ន្ធផ្សេងទៀត។ ស្របពេលលោក ត្រាំ បានធ្វើជាអធិបតីក្នុងពិធីចុះហត្ថលេខាលើកិច្ចព្រមព្រៀងសន្តិភាពរវាងកម្ពុជា និង ថៃផងដែរ។
តាមការចេញផ្សាយពីសេតវិមាបានឱ្យដឹងថា ដោយផ្អែកលើការស្វែងរកសន្តិភាព និងសន្តិសុខយ៉ាងយកចិត្តទុកដាក់របស់ប្រទេសកម្ពុជា សហរដ្ឋអាមេរិកនឹងលុបចោលការហាមឃាត់អាវុធលើកម្ពុជា ហើយភាគីទាំង ២ បានយល់ព្រមចាប់ផ្តើមសមយុទ្ធការពារជាតិទ្វេភាគី «ឆ្មាំអង្គរ» (ANGKOR SENTINEL) ឡើងវិញ ដែលធ្វើឡើងចុងក្រោយនៅក្នុងឆ្នាំ២០១៧។
លើសពីនេះ សហរដ្ឋអាមេរិកនឹងបង្កើនកៅអីសម្រាប់ទាហានកម្ពុជានៅបណ្តាសាលាយោធារបស់អាមេរិកដូចជា West Point, Air Force Academy និងផ្សេងៗទៀត។
បន្ថែមពីនេះទៀត សហរដ្ឋអាមេរិក និងកម្ពុជា បានយល់ព្រមពង្រីកកិច្ចសហប្រតិបត្តិការលើការប្រយុទ្ធប្រឆាំងនឹងអង្គការឧក្រិដ្ឋកម្មឆ្លងដែន រួមទាំងក្រុមជួញដូរគ្រឿងញៀន និងមជ្ឈមណ្ឌលបោកប្រាស់តាមអ៊ីនធឺណិតផងដែរ។ ដ្បិតឧក្រិដ្ឋកម្មទាំងនេះ បានលួចប្រាក់ជាង ១០ពាន់លានដុល្លារជារៀងរាល់ឆ្នាំពីជនជាតិអាមេរិកដែលងាយរងគ្រោះ៕
ចែករំលែកព័តមាននេះ