រដ្ឋធានីគីហ្គាលី ៖ នៅព្រឹកថ្ងៃទី១៨ ខែវិច្ឆិកា ឆ្នាំ២០២៥ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ…
រដ្ឋធានីគីហ្គាលី ៖ នៅព្រឹកថ្ងៃទី១៨ ខែវិច្ឆិកា ឆ្នាំ២០២៥ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញបំពេញទស្សនកិច្ចផ្លូវការនៅសាធារណរដ្ឋរវ៉ាន់ដា។ ក្នុងឱកាសបំពេញទស្សនកិច្ចផ្លូវការនេះ ឯកឧត្តម ឧបនាយករដ្ឋមន្ដ្រី បានអញ្ជើញដឹកនាំគណៈប្រតិភូដាក់កម្រងផ្កាគោរពវិញ្ញាណក្ខន្ធ នៅបូជនីយដ្ឋានចងចាំទីក្រុងគីហ្គាលី ។
នៅព្រឹកថ្ងៃដដែល ឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញជួបទ្វេភាគីជាមួយ ឯកឧត្តម Olivier Jean Patrick Nduhungirehe រដ្ឋមន្ត្រីការបរទេស និងសហប្រតិបត្តិការអន្តរជាតិ នៃសាធារណរដ្ឋរវ៉ាន់ដា។
ឯកឧត្ដមឧបនាយករដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលរវ៉ាន់ដា ចំពោះការទទួលបដិសណ្ឋារកិច្ចដ៏កក់ក្តៅជូនគណៈប្រតិភូកម្ពុជា ក្នុងអំឡុងពេលទស្សនកិច្ចផ្លូវការរបស់ឯកឧត្ដម នៅសាធារណរដ្ឋរវ៉ាន់ដា និងក្នុងឱកាសអញ្ជើញចូលរួមសន្និសីទថ្នាក់រដ្ឋមន្ត្រីហ្វ្រង់កូហ្វូនី លើកទី៤៦ ដែលនឹងប្រព្រឹត្តិទៅពីថ្ងៃទី១៩-២០ ខែវិច្ឆិកា ឆ្នាំ២០២៥។ ក្នុងឱកាសនៃជំនួប ភាគីទាំងពីរបានពិភាក្សារិះរកមធ្យោបាយដើម្បីជំរុញកិច្ចសហប្រតិបត្តិការរវាងប្រទេសទាំងពីរបន្ថែមទៀត លើវិស័យនយោបាយ សេដ្ឋកិច្ច និងវប្បធម៌ ។
បន្ទាប់ពីបញ្ចប់កិច្ចពិភាក្សា រដ្ឋមន្ត្រីការបរទេសទាំងពីរ បានអញ្ជើញចុះហត្ថលេខាលើឯកសារចំនួនពីរ ៖ (១) អនុស្សរណៈ នៃការយោគយល់ស្តីពីការបង្កើតកិច្ចពិគ្រោះយោបល់ទ្វេភាគីរវាងក្រសួងការបរទេសទាំងពីរ និង (២) កិច្ចព្រមព្រៀងលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ ។
នៅរសៀលថ្ងៃដដែល ឯកឧត្តម Olivier Jean Patrick Nduhungirehe រដ្ឋមន្ត្រីការបរទេស និងសហប្រតិបត្តិការនៃសាធារណរដ្ឋរវ៉ាន់ដា បានរៀបចំអាហារថ្ងៃត្រង់ស្វាគមន៍ ជូន ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងគណៈប្រតិភូ ក្នុងអំឡុងពេលអញ្ជើញបំពេញទស្សនកិច្ចផ្លូវការនៅរវ៉ាន់ដា ៕
ចែករំលែកព័តមាននេះ