ទីក្រុងប៉េកាំង៖ នៅក្នុងស្ថានភាពដែលចិន និងជប៉ុនកំពុងតែមានភាពតានតឹងផ្នែកការទូតជាមួយគ្នាក្រោយការថ្លែងសុន្ទរកថារបស់នាយករដ្ឋមន្ត្រីជប៉ុន លោកស្រីតាកាអ៊ីឈិ ពាក់ព័ន្ធនឹងបញ្ហាតៃវ៉ាន់ និងបន្ទាប់ពីការអំពាវនាវរបស់រដ្ឋាភិបាលចិនឱ្យប្រជាជនខ្លួនបង្កើនការប្រុងប្រយ័ត្នចំពោះការធ្វើដំណើរនៅជប៉ុន គេឃើញថាអ្នកដែលមានគម្រោងធ្វើដំណើរទៅជប៉ុន និងដែលបានទិញសំបុត្រយន្តហោះរួចហើយបានសម្រេចចិត្តលុបចោលគម្រោងរបស់ខ្លួនវិញ។
យោងតាមតួលេខដែលប្រមូលបានពីក្រុមហ៊ុនអាកាសចរណ៍នានារបស់ចិន គេឃើញថាអ្នកទេសចរចិនលុបចោលការធ្វើដំណើរជិតកន្លះលាននាក់ ពោលគឺប្រហែល៤,៩១សែននាក់គិតចាប់ពីថ្ងៃសៅរ៍សប្ដាហ៍មុនរហូតមកដល់ពេលនេះ។ ចំនួននេះស្មើនឹង៣២%នៃចំនួនអ្នកទេសចរដែលមានគម្រោងធ្វើដំណើរទៅជប៉ុន និងដែលបានកក់សំបុត្រយន្តហោះរួចហើយ។ ក្រោយមក ចំនួនអ្នកលុបចោលការធ្វើដំណើរកើនឡើងដល់ជាង៨២%កាលពីថ្ងៃអាទិត្យ និង៧៥,៦%កាលពីថ្ងៃចន្ទ។
នេះបើយោងតាមការបូកសរុបតួលេខរបស់អ្នកស្រាវជ្រាវដែលប្រមូលទិន្នន័យពីគ្រប់ក្រុមហ៊ុនអាកាសចរណ៍ចិនទាំងអស់។ កាលពីថ្ងៃសុក្រ បន្ទាប់ពីប្រទេសចិនអំពាវនាវឱ្យប្រជាជនខ្លួនផ្អាកធ្វើដំណើរទៅប្រទេសជប៉ុនដោយសារហេតុផលសុវត្ថិភាព គេឃើញថាក្រុមហ៊ុនអាកាសចរណ៍នានានៅប្រទេសចិនដែលបានទទួលការកក់សំបុត្រយន្តហោះរួចហើយបានប្រកាសថាខ្លួននឹងបង្វិលប្រាក់កក់គ្រប់ចំនួនជូនអតិថិជនវិញ។
ភាពតានតឹងរវាងចិន និងជប៉ុនកើតឡើងសាជាថ្មីក្រោយការថ្លែងសុន្ទរកថារបស់លោកស្រីតាកាអ៊ីឈិដែលប្រមើលមើលអំពីសេណារីយោផ្ទុះសង្គ្រាមនៅតៃវ៉ាន់ និងការចូលអន្តរាគមន៍របស់កងទ័ពជប៉ុនដើម្បីជួយតៃវ៉ាន់។ សារព័ត៌មានកងទ័ពរំដោះប្រជាជនចិនចុះផ្សាយកាលពីថ្ងៃអាទិត្យថាជប៉ុនឱ្យតែហ៊ានធ្វើដូច្នេះនឹងប្រែក្លាយប្រទេសរបស់ខ្លួនទៅជាទីលានសង្គ្រាមជាមិនខាន។
សំបុត្រយន្តហោះដែលលុបចោលច្រើនជាងគេគឺសៀងហៃទៅតូក្យូ និងសៀងហៃទៅអូសាកា។ ជាការពិត វិស័យឯកជនរបស់ជប៉ុនដែលធ្លាប់ទទួលបានផលប្រយោជន៍ពីអ្នកទេសចរចិននឹងត្រូវបាត់បង់ប្រាក់ចំណូល។ ប៉ុន្តែបើនិយាយអំពីវិស័យអាកាសចរណ៍វិញ ចិនរងគ្រោះខ្លាំងជាងជប៉ុន។ នេះបើយោងតាមលោកចនក្រេន (John Grant) ជាអ្នកវិភាគជាន់ខ្ពស់របស់អង់គ្លេស។
ក្រុមហ៊ុនអាកាសចរណ៍របស់ចិនមានចំណែកទីផ្សារច្រើនជាងជប៉ុនឆ្ងាយណាស់បើនិយាយនៅក្នុងក្របខណ្ឌហោះហើរទៅមករវាងប្រទេសទាំង២។ ក្រុមហ៊ុនអាកាសចរណ៍ធំៗទាំង៥សុទ្ធតែមានទីតាំងនៅប្រទេសចិន។ ហេតុនេះការលុបចោលគម្រោងធ្វើដំណើរទៅជប៉ុននឹងធ្វើឱ្យក្រុមហ៊ុនអាកាសចរណ៍ចិនខាតបង់ជាងក្រុមហ៊ុនជប៉ុន។ នេះបើតាមលោកចនក្រេន។
នៅអំឡុងពេលពីរបីសប្ដាហ៍ខាងមុខនេះ វិស័យអាកាសចរណ៍អាចនឹងមានការផ្លាស់ប្ដូរយ៉ាងគំហុកខាងចំនួនអ្នកដំណើរ។ ប៉ុន្តែគេឃើញថាជប៉ុនមិនបាននៅស្ងៀមទេ។ ជប៉ុនកំពុងស្វះស្វែងរកការសន្ទនាគ្នា និងតាមលួងចិត្តចិនដើម្បីរម្ងាប់អារម្មណ៍ខឹងសម្បាររបស់ខ្លួន។ ដូចនេះ គេគិតបញ្ហាប៉ះពាល់ចំពោះអាកាសចរណ៍ចិន-ជប៉ុនអាចនឹងកើតឡើងត្រឹមតែមួយកម្សួលប៉ុណ្ណោះ។ រួចហើយនឹងវិលមករកសភាពធម្មតាឡើងវិញ។ នេះបើយោងតាមការផ្សាយរបស់ឆេនណល ញូស៍ អេស៊ា (Channel News Asia) និងប្រភពដទៃទៀត៕
ចែករំលែកព័តមាននេះ