រាជធានីភ្នំពេញ ៖ មនុស្សចំនួន៣នាក់បានរងរបួសធ្ងន់ធ្ងរ ត្រូវបានរថយន្តមន្ទីរពេទ្យដឹកយកទៅសង្គ្រោះបន្ទាន់ភ្លាមៗ ក្រោយពេលជួបគ្រោះថ្នាក់ចរាចរណ៍រវាងម៉ូតូម៉ាកហុងដាឌ្រីមមួយគ្រឿងជិះគ្នា២នាក់បើកឆ្លងផ្លូវមិនបានមើលមុខមើលក្រោយ ក៏ត្រូវម៉ូតូ១គ្រឿងទៀតម៉ាកយ៉ាម៉ាហា បើកតាមផ្លូវត្រង់ទៅដល់ ក៏វាក់ និងបុកយ៉ាងពេញទំហឹងតែម្ដង។
ហេតុការណ៍៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៥និង៣០នាទីល្ងាចថ្ងៃទី២៣ ខែកុម្ភ: ឆ្នាំ ២០២១ នៅលើកំណាត់ផ្លូវបេតុងព្រៃសវត្តស្លែង ត្រង់ចំណុចមុខមណ្ឌលសុខភាពព្រៃវែង ស្ថិតនៅក្នុងភូមិព្រៃវែងខាងលិច សង្កាត់ព្រៃវែង ខណ្ឌដង្កោ រាជធានីភ្នំពេញ។
នគរបាលចរាចរណ៍ខណ្ឌដង្កោបានប្រាប់ឲ្យដឹងថា ខាងភាគីខាងម៉ូតូមួយគ្រឿងម៉ាក ហុងដាឌ្រីម ធុនC125 ពណ៌ខ្មៅ ពាក់ស្លាកលេខ បាត់ដំបង 1AI-6584 បើកបរដោយយុវជនម្នាក់ឈ្មោះ ព្រីង ពិសាល អាយុ២៥ឆ្នាំ មុខរបរជាងឈើ មានទីលំនៅភូមិអង់ខ្លា ឃុំត្រែង ស្រុកកណ្ដាលស្ទឹង ខេត្តកណ្ដាល រងរបួសធ្ងន់ ហើយមិនបានពាក់មួកសុវត្ថិភាពទេ។ចំណែកអ្នករួមដំណើរម្នាក់ឈ្មោះ ឈិន ក្រៃ ភេទប្រុស អាយុ២៤ឆ្នាំ មុខរបរជាងឈើ មានទីលំនៅក្នុងភូមិឃុំជាមួយគ្នា រងរបួសធ្ងន់ដែរហើយក៏អត់បានពាក់មួកសុវត្ថិភាពដែរ អ្នកទាំង២នាក់នេះកំពុងត្រូវបាននាំទៅសង្គ្រោះនៅគ្លីនិកឯកជន ។
ដោយឡែកខាងភាគីម៉ូតូមួយគ្រឿងម៉ាកយ៉ាម៉ាហា ((YAMAHA MX KING) ពណ៌ខៀវ ពាក់ស្លាកលេខ ភ្នំពេញ 1IM-4801 បើកបរដោយយុវជនម្នាក់ឈ្មោះ ហុក ហុង អាយុ២០ឆ្នាំ មុខរបរជាងភ្លើង មានទីលំនៅក្នុងភូមិតប្រហួត ឃុំព្រៃស្រលិត ស្រុកពារាំង ខេត្តព្រៃវែងពាក់មួកសុវត្ថិភាពត្រឹមត្រូវ និងបានរងរបួសធ្ងន់ហើយក៏ត្រូវបានបញ្ជូនទៅសង្គ្រោះព្យាបាលនៅគ្លីនិកឯកជនជាមួយគ្នានោះដែរ។
នគរបាលបានប្រាប់ឲ្យដឹងបន្តទៀតថា នៅមុនពេលកើតហេតុ ភាគគីម៉ូតូម៉ាកហុងដាជិះគ្នា២នាក់ បានបើកបរធ្វើដំណើរក្នុងទិសដៅពីលិចទៅកើត លុះពេលទៅដល់ត្រង់ចំណុចកើតហេតុបានបត់ឆ្វេងដៃឆ្លងផ្លូវ ជាហេតុធ្វើឲ្យម៉ូតូម៉ាកយ៉ាម៉ាហា ដែលកំពុងបើកបរក្នុងទិសដៅបញ្ច្រាស់ទិសគ្នាពីលិចទៅកើតមកដល់ក៏វាក់ គេចអត់ទាន់ក៏បុកចំពីចំហៀងខាងស្តាំម៉ូតូហុងដាឌ្រីមនោះយ៉ាងពេញទំហឹង បណ្តាលឲ្យដួលបោកផ្ទប់ថ្នល់រងរបួសធ្ងន់ទាំងសងខាងតែម្តង។
ក្រោយពេលកើតហេតុ ជនរងគ្រោះទាំង៣នាក់ត្រូវបានរថយន្តមន្ទីរពេទ្យដឹកយកទៅសង្គ្រោះបន្ទាន់ភ្លាមៗ ចំណែកម៉ូតូទាំង២គ្រឿងបានរងការខូចខាតយ៉ាងដំណំ បន្ទាប់មកកម្លាំងនគរបាលចរាចរណ៍ខណ្ឌខង្កោសហការណ៍ជាមួយកម្លាំងនគរបាលប៉ុស្តិ៍ព្រៃវែងចុះទៅធ្វើការវាស់វែងនិងនាំយកទៅរក្សាទុកនៅអធិការដ្ឋាននគរបាលខណ្ឌដង្កោរងចាំការដោះស្រាយនៅពេលក្រោយ៕
ចែករំលែកព័តមាននេះ