រាជធានីភ្នំពេញ ៖ រថយន្ត១គ្រឿង ដឹកអេតចាយពេញទ្រុង ខណៈបើកបរក្នុងល្បឿនលឿន ទៅដល់ត្រង់ចំណុចភ្លើងស្តុបមួយកន្លែង មានយានយន្តកំពុងឈប់ត្រៀបត្រានៅខាងមុខ ស្រាបតែជាន់ហ្វ្រាំងអត់ស៊ី។ ដោយខ្លាចបុកយានយន្តទាំងនោះ អ្នកបើកបរ…
រាជធានីភ្នំពេញ ៖ រថយន្ត១គ្រឿង ដឹកអេតចាយពេញទ្រុង ខណៈបើកបរក្នុងល្បឿនលឿន ទៅដល់ត្រង់ចំណុចភ្លើងស្តុបមួយកន្លែង មានយានយន្តកំពុងឈប់ត្រៀបត្រានៅខាងមុខ ស្រាបតែជាន់ហ្វ្រាំងអត់ស៊ី។ ដោយខ្លាចបុកយានយន្តទាំងនោះ អ្នកបើកបរ ក៏បានសម្រេចចិត្តកាច់ចង្កូតគេចចេញ ហើយក៏ជ្រុលទៅបុកឡើងលើសួនច្បារពុះចែកទ្រូងផ្លូវទាំងកំរោល បណ្ដាលឲ្យរថយន្តនេះ ដាច់កង់មុខខាងស្ដាំ១គ្រាប់ ទៅមុខលែងរួច ។
ឧប្បត្តិហេតុខាងលើនេះ បានកើតឡើងកាលពីវេលាម៉ោងជាង៣រសៀលថ្ងៃទី៧ ខែឧសភា ឆ្នាំ២០២៦ នៅតាមមហាវិថីស៊ី ជីនពីង (ផ្លូវក្រវាត់ក្រុងទី៣) ត្រង់ចំណុចមុខវត្តគោកខ្សាច់ ស្ថិតនៅក្នុងភូមិគោកខ្សាច់ សង្កាត់ភ្លើងឆេះរទេះខណ្ឌកំបូល រាជធានីភ្នំពេញ ។
រថយន្តដឹកអេតចាយ ១គ្រឿងខាងលើនោះ ម៉ាកហ៊ីយ៉ាន់ពណ៌ស ពាក់ស្លាកលេខកំពង់ស្ពឺ 3A-1645 បើកបរដោយបុរសម្នាក់ មិនស្គាល់អត្តសញ្ញាណ ។
បើតាមបុរសម្នាក់ ដែលជាអ្នកឃើញហេតុការណ៍ខាងលើ បាននិយាយថា នៅមុនពេលកើតហេតុ គាត់បានឃើញរថយន្តនេះ ដឹកអេតចាយពេញទ្រុង បើកបរតាមមហាវិថី ស៊ី ជីនពីង ក្នុងទិសដៅពីជើងទៅត្បូង និងក្នុងល្បឿនលឿន។ លុះពេលទៅដល់ត្រង់ចំណុចកើតហេតុ មានយានយន្ត កំពុងឈប់ភ្លើងស្តុបត្រៀបត្រា ស្រាប់តែរថយន្តនោះ អត់បន្ថយល្បឿនឡើយ រួចក៏រេចង្កូតបុកឡើងលើសួនពុះចែកទ្រូងផ្លូវទាំងកំរោល បណ្ដាលឲ្យរថយន្តនោះដាច់កង់មុខខាងស្ដាំទើបទៅមុខលែងរួច ។
ទាក់ទិនទៅនឹងហេតុការណ៍នេះដែរ បុរសដែលជាអ្នកបើកបររថយន្តខាងលើបានប្រាប់គេឯងថា ខណៈពេលបើកបរទៅដល់ត្រង់ចំណុចកើតហេតុ ស្រាប់តែជាន់ហ្វ្រាំងអត់ស៊ី ហើយដោយខ្លាចបុកយានយន្តនៅខាងមុខ គាត់ក៏បានកាច់ចង្កូតគេចចេញ ទើបបុកឡើងលើសួនពុះចែកទ្រូងផ្លូវបែបនេះតែម្ដង ។
ក្រោយពេលកើហេតុ កម្លាំងនគរបាលប៉ុស្តិ៍ភ្លើងឆេះរទេះ និងនគរបាលខណ្ឌកំបូល បានចុះទៅពិនិត្យមើល និងរាយការណ៍ជូននគរបាលការិយាល័យ ចារចរណ៍ផ្លូវគោក នៃស្នងការដ្ឋានរាជធានីភ្នំពេញ នាំយករថយន្តខាងលើទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ