រាជធានីភ្នំពេញ ៖ រថយន្តកូរ៉េដឹកទឹកកកមួយគ្រឿងសង្ស័័យបើកបរក្នុងល្បឿនលឿន លុះមកដល់ផ្លូវបំបែកជា៤ព្យាយាមបួងចង្កូតបត់ឆ្វេងដោយខ្វះការប្រុងប្រយ័ត្ន បណ្តាលឲ្យក្រឡាប់ផ្ងារជើងតែម្តង ប៉ុន្តែមិនបណ្តាលឱ្យមនុស្សណាម្នាក់រងគ្រោះថ្នាក់នោះទេ ។ ហេតុការណ៍ខាងលើនេះបានកើតឡើងកាលពីវេលាម៉ោង២ឈានចូលព្រឹកថ្ងៃទី២៤ ខែកុម្ភៈ ឆ្នាំ២០២១…
រាជធានីភ្នំពេញ ៖ រថយន្តកូរ៉េដឹកទឹកកកមួយគ្រឿងសង្ស័័យបើកបរក្នុងល្បឿនលឿន លុះមកដល់ផ្លូវបំបែកជា៤ព្យាយាមបួងចង្កូតបត់ឆ្វេងដោយខ្វះការប្រុងប្រយ័ត្ន បណ្តាលឲ្យក្រឡាប់ផ្ងារជើងតែម្តង ប៉ុន្តែមិនបណ្តាលឱ្យមនុស្សណាម្នាក់រងគ្រោះថ្នាក់នោះទេ ។
ហេតុការណ៍ខាងលើនេះបានកើតឡើងកាលពីវេលាម៉ោង២ឈានចូលព្រឹកថ្ងៃទី២៤ ខែកុម្ភៈ ឆ្នាំ២០២១ ត្រង់ចំណុចស្តុបឬស្សីសាញ់ តាមបណ្ដោយផ្លូវបេតុងព្រៃសកែងនឹងផ្លូវ៥០ម៉ែត្រ ស្ថិតក្នុងសង្កាត់ព្រៃស ខណ្ឌដង្កោ រាជធានីភ្នំពេញ ។
រថយន្តកូរ៉េដឹកទឹកកកមួយគ្រឿងខាងលើម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 2M-3892 អ្នកបើកបរ និងអ្នករួមដំណើរម្នាក់ទៀតមិនស្គាល់អត្តសញ្ញាណនោះទេ ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរស២នាក់ជិះក្នុងរថយន្តកូរ៉េដឹកទឹកកកមួយគ្រឿង ធ្វើដំណើរតាមបណ្ដោយផ្លូវបេតុងព្រៃស ក្នុងទិសដៅពីលិចទៅកើត និងក្នុងល្បឿនយ៉ាងលឿន។ លុះមកដល់ចំណុចស្តុបកើតហេតុ រថយន្តដឹកទឹកកកក៏បួងចង្កូតបត់ឆ្វេងទៅផ្លូវ៥០ម៉ែត្រ ដោយមិនបានប្រុងប្រយ័ត្នក៏ជ្រុលក្រឡាប់ផ្ងារជើង បណ្តាលឲ្យរថយន្តរងការខូចខាតក្រពឹតនិងបែកកញ្ចក់ខាងមុខ តែមិនបង្កឲ្យមានអ្នករងរបួសនោះទេ។ បន្ទាប់មកអ្នកបើកបររថយន្ត និងអ្នករួមដំណើរក៏បាននាំគ្នាគេចខ្លួនចេញពីកន្លែងកើតហេតុបាត់ស្រមោល បន្សល់ទុកតែរថយន្តដែលក្រឡាប់ផ្ងារជើងប៉ុណ្ណោះ។
ក្រោយពេលកើតហេតុ សមត្ថកិច្ចមូលដ្ឋានបានចុះមកធ្វើការអន្តរាគមន៍និងរាយការណ៍ជូនសមត្ថកិច្ចជំនាញឲ្យមកធ្វើការស្ទូចយករថយន្តខាងលើយកទៅរក្សាទុកនៅអធិការដ្ឋាននគរបាលខណ្ឌដង្កោដើម្បីរង់ចាំម្ចាស់ចូលខ្លួនមកទទួលយករថយន្តត្រឡប់ទៅវិញនៅពេលក្រោយជាបន្តទៀត៕
