ខេត្តសៀមរាប ៖ រថយន្តស៊េរីទំនើបមួយគ្រឿង សង្ស័យបើកបរក្នុងស្ថានភាពងងុយដេក ទើបបុកជាមួយរថយន្តដឹកមាន់យ៉ាងពេញទំហឹង ក្នុងទិសដៅបញ្ច្រាសគ្នាបណ្តាលឱ្យរងការខូចខាតទាំងសងខាងយ៉ាងធ្ងន់ធ្ងរ ប៉ុន្តែពុំមាននរណាម្នាក់រងរបួសឡើយ និងបានបង្កការកកស្ទះពេញផ្លូវជាតិ។
ហេតុការណ៍ខាងលើនេះបានកើតឡើងកាលពីវេលាម៉ោង១និង៤០នាទីរសៀលថ្ងៃទី២២ ខែកុម្ភៈ ឆ្នាំ២០២១ ត្រង់ចំណុចលើកំណាត់ផ្លូវជាតិលេខ៦ ចន្លោះបង្គោលគីឡូលេខ ២៩៩-៣០០ ស្ថិតក្នុងភូមិឪឡោក ឃុំបាគង ស្រុកប្រាសាទបាគង ខេត្តសៀមរាប ។
តាមប្រភពពីមន្ត្រីនគរបាលចរាចរណ៍ស្រុកប្រាសាទបាគង បានប្រាប់ថា ភាគីខាងរថយន្តស៊េរីទំនើបមួយគ្រឿង ពណ៌ស ពាក់ស្លាកលេខ ភ្នំពេញ 2AN-8464 បើកបរដោយឈ្មោះ លីម អីវ ភេទប្រុស អាយុ៤៤ឆ្នាំ នៅភូមិត្រពាំងថ្លឹង សង្កាត់ចោមចៅ ខណ្ឌពោធិ សែនជ័យ ក្រុងភ្នំពេញ ។ ចំណែកភាគីខាងរថយន្តដឹកមាន់ម៉ាកហ៊ីយាន់ដាយ ពណ៌ស ពាក់ផ្លាកលេខ កំពង់ចាម 3A-6593 បើកបរដោយ ឈ្មោះ រ៉ាវី ហ្វីនីន ភេទប្រុស អាយុ២៧ឆ្នាំ រស់នៅភូមិរកាលើ ឃុំសំបួរមាស ស្រុកកំពង់ចាម ខេត្តកំពង់ចាម ។
តាមប្រភពដដែលបានឱ្យដឹងបន្តថា មុនពេលកើតហេតុ រថយន្តស៊េរីទំនើបបើកបរមានទិសដៅពីកើតទៅលិច លុះមកដល់ចំណុចកើតហេតុខាងលើ ក៏បុកជាមួយរថយន្តដឹកមាន់ ដែលបើកបរក្នុងទិសដៅបញ្ច្រាសគ្នា បណ្តាលឱ្យរងការខូចខាតរថយន្តទាំងសងខាង តែមិនបណ្តាលឱ្យមនុស្សណាម្នាក់រងគ្រោះថ្នាក់ទេ ។ ចំពោះមូលហេតុ គឺបង្កឡើងដោយភាគីខាងរថយន្តស៊េរីទំនើបបើកបរក្នុងស្ថានភាពងងុយដេក។
តាមប្រភពដដែលបានបញ្ជាក់ថា ក្រោយពេលកើតហេតុ កម្លាំងនគរបាលជំនាញស្រុកបានចុះមកដល់កន្លែងកើតហេតុ រួចអូសយករថយន្តទាំងគ្រឿងមករក្សាទុកនៅអធិការនគរបាលស្រុកប្រាសាទបាគង ដើម្បីរង់ចាំដោះស្រាយតាមនីតិច្បាប់។
តាមប្រភពដដែលបានបញ្ជាក់ទៀតថា បច្ចុប្បន្ន ម្ចាស់រថយន្តទាំងសងខាងកំពុងចូលខ្លួនមកដោះស្រាយគ្នានៅអធិការនគរបាលស្រុកប្រាសាទបាគង ប្រសិនបើមិនត្រូវគ្នា កម្លាំងនគរបាលជំនាញ និងរៀបចំកសាងសំណុំរឿងបញ្ជូនទៅកាន់ការិយាល័យនគរបាលចរាចរណ៍ខេត្ត ដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ