ខេត្តកំពត ៖ រថយន្តមួយគ្រឿងសង្ស័យបត់មិនទាន់នៅចំណុចផ្លូវកោងបំបែកជា៣ ក៏ជ្រុលទៅបុ.ករះផ្ទះប្រជាពលរដ្ឋចំនួន៤ខ្នង បណ្តាលឱ្យរងការខូចខាត ប៉ុន្តែមិនបណ្តាលឱ្យមនុស្សណាម្នាក់រងគ្រោះថ្នាក់ឡើយ ។
ហេតុការណ៍ខាងលើនេះបានកើតឡើងកាលពីវេលាម៉ោង11និង30នាទីយប់ថ្ងៃទី22 ខែកុម្ភៈ ឆ្នាំ2021 នៅចំណុចផ្លូវបំបែកជា៣ហ្សិត ស្ថិតក្នុងភូមិបឹងធំ ឃុំអង្គសូរភី ស្រុកកំពង់ត្រាច ខេត្តកំពត។
រថយន្តបង្កមួយគ្រឿងខាងលើម៉ាកធុនដ្រា ពណ៍ស ពាក់ស្លាកលេខ ភ្នំពេញ 2AN-0606 បើកបរដោយឈ្មោះ ច័ន្ទ ពេញបរមី ភេទប្រុស អាយុ២៦ឆ្នាំ និងអមដំណើរឈ្មោះអ៊ុក ភេទប្រុស ក្រុងព្រះសីហនុ ខេត្តព្រះសីហនុ ។ ចំណែកម្ចាស់ផ្ទះទាំង៤ខ្នងដែលរងការខូចខាតខាងលើ រួមមាន ១-ឈ្មោះអី បូរ ជាអ្នកលក់ចាប់ហ៊ួយ ២-ឈ្មោះហ៊ឹម ស្រីនាង អាយុ29ឆាំ្ន បើកហាងអ៊ុតសក់ ៣-ឈ្មោះហេង ណែត ជាអ្នកលក់បាយ និង៤-ឈ្មោះហេង សុភក្ត័ ជាអ្នកលក់ចាប់ហ៊ួយ ។
លោកទុំ ទិត នាយផ្នែកសណ្ដាប់ធ្នាប់ចរាចស្រុកកំពង់ត្រាច បានឱ្យដឹងកាលពីព្រឹកថ្ងៃទី24 កុម្ភៈ នេះថា មុនពេលកើតហេតុ រថយន្តមួយគ្រឿងខាងលើបានបើកបរតាមបណ្ដោយផ្លូវលេខ31 ក្នុងទិសដៅពីជើងទៅត្បូង លុះបើកមកដល់ចំណុចផ្លូវបំបែកជា3រថយន្តនោះមិនបានបើកតាមផ្លូវកោងបត់ទៅកាន់ផ្លូវជាតិលេខ33ទៅកំពត-កែបទេ លុះបើកផុតផ្លុវលេខ31ទៅហើយ ក៏ជ្រុលធ្លាក់ចេញពីផ្លូវទៅបុ.ករះផ្ទះប្រជាពលរដ្ឋចំនួន4ខ្នងដែលនៅជាប់ផ្លូវកោងបំបែកជា៣ តែម្តង។
តាមប្រភពដដែលបានបន្តថា ក្នុងហេតុការណ៍ខាងលើ មិនបណ្តាលឱ្យមនុស្សណាម្នាក់រងគ្រោះថ្នាក់នោះទេ ប៉ុន្តែបណ្តាលឱ្យផ្ទះរបស់ប្រជាពលរដ្ឋទាំង៤ខ្នងខាងរងការខូចខាត ។
លោកនាយផ្នែកសណ្ដាប់ធ្នាប់ និងចរាចរណ៍បានបន្តទៀតថា ដោយសារតែនៅចំណុចខាងលើងាយប្រឈមនិងគ្រោះថ្នាក់ញឹកញាប់ពេក ធ្វើឱ្យម្ចាស់ផ្ទះមានក្ដីព្រួយបារម្ភជាប្រចាំ គឺអោយតែយប់ ពួកគាត់បានស្ពាយបង្វិចចេញពីផ្ទះហើយ ឬក៍ទៅដេកនៅខាងក្រោយផ្ទះ ។
រីឯអ្នកបើកបររថយន្តមួយគ្រឿងខាងលើបានរៀបរាប់ឱ្យដឹងថា គាត់មានគ្នាជិះក្នុងរថយន្តនោះមានចំនួន2នាក់ មិនមានរងគ្រោះថ្នាក់អ្វីទេ ។ នៅមុនពេលកើតហេតុ គាត់បានមកចូលរួមពិធីមង្គលការមួយនៅស្រុកបន្ទាយមាស ហើយចេញមកផឹកស៊ីបន្តនៅហាងលក់ដូរមួយកន្លែងជាមួយមិត្តភក្ត័ជាមន្ត្រីនគរបាល លុះពួកគាត់រវល់តែជជែកគ្នាលេង ភ្លេចរឿងផ្លូវកោង ក៏ជ្រុលទៅបុ.ករះផ្ទះប្រជាពលរដ្ឋតែម្តង ។
នៅព្រឹកថ្ងៃទី23 ខែកុម្ភៈ នេះដែរ នគរបាលបានស្ទួចរថយន្តបង្កទៅរក្សាទុកនៅអធិការដ្ឋាននគរបាលស្រុក រង់ចាំធ្វើការដោះស្រាយគ្នានៅពេលក្រោយទៀត ៕
ចែករំលែកព័តមាននេះ