រាជាធានីភ្នំពេញ ៖ ប្រមុខដឹកនាំរាជរដ្ឋាភិបាលកម្ពុជា បានចារលើឯកសារមួយសម្រេចឱ្យបណ្តេញចេញពីកម្ពុជា និងលែងឱ្យត្រឡប់ចូលមកវិញចំពោះជនបរទេសទាំងឡាយណា ដែលគេចវេះ និងមិនចូលរួមសហការក្នុងការធ្វើចត្តាឡីស័ក និងទីតាំងណាមិនសហការជាមួយសមត្ថកិច្ចត្រូវបិទអាជីវកម្មនិងទីតាំង ខណៈកម្ពុជាកំពុងតែប្រឈមមុខយ៉ាងធ្ងន់ធ្ងរនៃការឆ្លងក្នុងព្រឹត្តិការណ៍សហ គមន៍ ២០កុម្ភៈ ។
យោងតាមសំណើរបស់លោកឧត្តមសេនីយ៍ឯក ឌី វិជ្ជា អគ្គស្នងការរងនរគបាលជាតិ និងជាអនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ១៩ ផ្ញើជូនសម្តេចនាយករដ្ឋមន្ត្រីចុះថ្ងៃទី២២ ខែកុម្ភៈ ឆ្នាំ២០២១នេះ បានលើកឡើងថា កន្លងមកស្ថាប័នរបស់ខ្លួនបានជួបឧបសគ្គជាច្រើនក្នុងការងារ ជាក់ស្តែង ក្នុងព្រឹត្តិការណ៍សហគមន៍ «៣វិច្ឆិកា», «២៨វិច្ឆិកា» និង «២០កុម្ភៈ» ។
លោកឧត្តមសេនីយ៍ឯក ឌី វិជ្ជា ដែលជាកូនប្រសាររបស់សម្តេចតេជោក៏បានបញ្ជាក់ថា អនុគណៈ កម្មការស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ១៩ (Covid-19) «តែងតែជួបប្រទះនូវបញ្ហាប្រឈមមួយចំនួនក្នុងប្រតិបត្តិការរបស់ខ្លួន ក្នុងនោះមានបញ្ហាបុគ្គលជាប់ពាក់ព័ន្ធនឹងជំងឺកូវីដ១៩ មិនព្រមសហការផ្តល់ការសម្ភាសន៍ ផ្តាច់ទំនាក់ទំនង និងករណីរត់គេចមិនព្រមធ្វើចត្តាឡីស័ក ព្រមទាំងទីតាំង (ពាក់ព័ន្ធ) មិនសហការចំពោះកិច្ចប្រតិបត្តិការស្រាវជ្រាវ និងតាមដានបុគ្គលផ្ទុកជំងឺកូវីដ១៩ ដែលធ្វើឱ្យប្រតិបត្តិការមានភាពយឺតយ៉ាវ និងខ្វះចន្លោះ» ។
លោក ឌី វិជ្ជា បានបន្តថា «ហេតុដូចនេះដើម្បីពង្រឹងប្រសិទ្ធភាពការងារទប់ស្កាត់ការរីករាលដាលនៃជំងឺកូវីដ១៩ នោះលោកបានស្នើសម្តេចតេជោ អនុវត្តន៍នូវវិធានការចំនួន៣ ចំពោះជនមិនសហការទាំងនេះ ដើម្បីពង្រឹងប្រសិទ្ធភាពការងារទប់ស្កាត់ការរីករាលដាលជំងឺកូវីដ១៩ក្នុងសហគមន៍។
វិធានការទាំង ៣ចំណុចនោះរួមមាន៖ ១- ចំពោះជនបរទេស សូមគោរពស្នើសុំ បណ្តេញចេញពីប្រទេសកម្ពុជា និងហាមចូលប្រទេសជាថ្មី, ទី២- ចំពោះជនជាតិខ្មែរ ក៏ត្រូវចាត់វិធានការតាមផ្លូវច្បាប់ និងទី ៣-សម្រាប់ម្ចាស់ទីតាំង សូមដកហូតអាជ្ញាប័ណ្ណ និងបិទអាជីវកម្មក្នុងទីតាំង។
ចំពោះសំណើវិធានការទាំង៣ចំណុចនេះ ត្រូវបានសម្តេចតេជោ ហ៊ុន សែន ចារយល់ព្រមរួចរាល់ហើយនៅថ្ងៃដដែលនេះ ៕
ចែករំលែកព័តមាននេះ