រាជធានីភ្នំពេញៈបុរសជាកម្មករយាមឃ្លាំងហ្គាសមួយកន្លែងត្រូវបានគេប្រទះឃើញដេកស្លាប់នៅលើបេតុងក្នុងឃ្លាំងដែលគេសង្ស័យថា ត្រូវរថយន្តដឹកហ្គាសថយកិនស្លាប់ហើយបិទទ្វារឃ្លាំងបើកគេចបាត់ស្រមោល។
ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង៧ព្រឹកថ្ងៃទី៣១ ខែមីនាឆ្នាំ ២០២៦នៅចំណុចឃ្លាំងហ្គាសមួយកន្លែងស្ថិតនៅភូមិត្រពាំងទទឹង សង្កាត់ពន្សាំង ខណ្ឌព្រែកព្នៅរាជធានីភ្នំពេញ។
ជនរងគ្រោះឈ្មោះ ផល សុភាព ភេទប្រុស អាយុ១៦ ឆ្នាំ មុខរបរកម្មករយាមឃ្លាំងហ្គាស មានទីលំនៅភូមិខ ១ សង្កាត់ច្រាំងចំរ៉េះ២ ខណ្ឌឬស្សីកែវនិងស្នាក់នៅយាមឃ្លាំងនៅភូមិកើតហេតុខាងលើ។
តាមព័ត៌មានបានឲ្យដឹងថា នៅវេលា ព្រឹកម្ដាយមីងបានយកបាយទៅអោយក្មួយដូចសព្វដងក៏ប្រទះឃើញជនរងគ្រោះដេកស្លាប់លើបេតុង នៅក្នុងឃ្លាំងក៏បង្កឲ្យមានការភ្ញាក់ផ្អើលតែម្ដង។
តាមព័ត៌មានបានឲ្យដឹងថា នៅមុនពេលកើតហេតុគេឃើញរថយន្តដឹកស៊ីទែនហ្គាសមួយគ្រឿងបានបើកចូលទៅក្នុងឃ្លាំងក្រោយមកស្រាប់តែបិទទ្វារឃ្លាំងបើកចេញទៅបាត់ដោយពុំមាននរណាម្នាក់ចាប់អារម្មណ៍ឡើយ។លុះក្រោយមកនៅពេលដែលម្ដាយមីងយកបាយទៅឲ្យក្មួយស្រាប់តែប្រទះឃើញសពដេកស្លាប់រួចទ្រហូរយំបង្កឲ្យមានការភ្ញាក់ផ្អើលដល់ប្រជាពលរដ្ឋ។
តាមភិនភាគនិងស្លាកស្នាមជនរងគ្រោះគេសង្ស័យថាត្រូវរថយន្តដឹកហ្គាសថយកិនស្លាប់ខណៈពេលដែលរថយន្តដឹកហ្គាសយកទៅដាក់នៅក្នុងឃ្លាំង។
តាមព័ត៌មានឲ្យដឹងទៀតថា ឃ្លាំងខាងលើត្រូវបានម្ចាស់ជួលដាក់ហ្គាសទើបតែបានពីរថ្ងៃ។ហើយឲ្យកម្មកររងគ្រោះយាមតែម្នាក់ឯង។មិននឹកស្មានថា កម្មកររូបនោះរងគ្រោះដោយសាររថយន្តកិនស្លាប់បែបនេះ។
ភ្លាមៗនគរបាលមូលដ្ឋានក៏បានចុះទៅកន្លែកើតហេតុធ្វើការស្រាវជ្រាវដើម្បីឈានទៅឃាត់រថយន្តបង្កគ្រោះថ្នាក់ខាងលើមកចាត់ការតាមច្បាប់៕
ចែករំលែកព័តមាននេះ