រាជធានីភ្នំពេញ ៖ ជនសង្ស័យម្នាក់ដែលបានរត់គេចខ្លួនចូលនៅសម្ងំលាក់ខ្លួន ក្នុងលូ ហើយជាប់នៅក្នុងលូមួយយប់ ត្រូវបានកម្លាំងនគរបាលឬស្សីកែវ សហការណ៍ជាមួយគណៈបញ្ជាការឯកភាពសង្កាត់ឬស្សីកែវធ្វើការគាស់លូ ចាប់បានហើយ ។
ប្រតិបត្តិការតាមចាប់ជនសង្ស័យ ឆក់នេះអស់រយៈពេលជាច្រើនម៉ោងចាប់តាំងពីវេលាម៉ោងប្រមាណ៧ព្រឹក ថ្ងៃទី២២ ខែកុម្ភៈ ឆ្នាំ២០២១ ហើយឈានទៅឃាត់ខ្លួនបាននៅវេលាម៉ោងប្រមាណ១១ព្រឹក នៅចំណុចភូមិ បឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ ។
ជនសង្ស័យ ដែលត្រូវឃាត់ខ្លួនត្រូវបានគេស្គាល់ឈ្មោះហៅក្រៅឈ្មោះ ម៉ូម ហើយ ភ្លាមៗត្រូវបាននគរបាលនាំយកទៅសាកសួរជាមួយបក្សពួកដែលឃាត់ខ្លួនបានកាលពីម្សិលមិញ ។
តាមព័ត៌មានអោយដឹងថា ជនសង្ស័យដែលរត់ចូលលូនោះក្នុងចំណោមបក្សពួក២នាក់ដែលបានធ្វើសកម្មភាពឆក់ទូរស័ព្ទពីស្ត្រីម្នាក់បានសម្រេច កាលពីវេលាម៉ោងប្រមាណ១១និង៣០នាទីព្រឹក ថ្ងៃទី២១ ខែកុម្ភៈ ឆ្នាំ២០២១ នៅចំណុចផ្លូវបេតុង ក្រុមទី៥ ភូមិសាមគី សង្កាត់ឫស្សីកែវ ខណ្ឌឫស្សីកែវ ភ្នំពេញ ។ នៅក្នុងសកម្មភាពត្រូវបានកម្លាំងល្បាតនគរបាលប៉ុស្តិ៍ឫស្សីកែវ និងកំលាំងប្រជាការពារសង្កាត់ឫស្សីកែវឃាត់ខ្លួនបានជាក់ស្តែង បានម្នាក់ និងម្នាក់ទៀតបានរត់គេចខ្លួនចូលលូ ។
ជនសង្ស័យ ដែលត្រូវឃាត់ខ្លួនដំបូងឈ្មោះ សុះ អារីហ្វីន ហៅខ្មៅ ភេទប្រុស អាយុ៣៣ឆ្នាំ មុខរបរ មិនពិតប្រាកដ មានទីលំនៅផ្ទះជួល ផ្លូវ រថភ្លើង ភូមិ បាក់ទូក សង្កាត់ ទួលសង្កែ១ ខណ្ឌឫស្សីកែវ ភ្នំពេញ មានសារធាតុញៀន ។
ចំណែកជនម្ចាស់ ទូរស័ព្ទឈ្មោះ ហួន សុខលឿន ភេទស្រី អាយុ៤១ឆ្នាំ មុខរបរលក់ដូរ មានទីលំនៅ ផ្ទះ១៣៩០ ផ្លូវជាតិលេខ៥ ក្រុមទី៣ ភូមិ ឃ្លាំងសាំង សង្កាត់ឫស្សីកែវ ។
តាមនគរបាលអោយដឹងថា នៅមុនពេលកើតហេតុនារីរងគ្រោះបានជិះម៉ូតូម៉ាក់ SCOOPY ពណ៌ស ពាក់ស្លាកលេខ ១BQ_១៥២៣ គ្នា០៣នាក់ ត្រឡប់មកពីផ្សារសាំហាន់ធ្វើដំណើរត្រឡប់ទៅផ្ទះ ។ ពេលទៅដល់ភូមិសាមគ្គី បូរីមហាសេដ្ឋី ស្រាប់តែជនសង្ស័យជិះម៉ូតូម៉ាក់ហុងដា សេ១២៥ពណ៌ខ្មៅ សេរី២០១៩ ពាក់ស្លាកលេខ១O.៨២៤៥ គ្នា០២នាក់មកធ្វើសកម្មភាពឆក់យកទូរស័ព្ទបានសម្រេចតែម្តង ។
ភ្លាមៗត្រូវបានកម្លាំងល្បាតដេញឃាត់ខ្លួនបានម្នាក់ដកហូតបានម៉ូតូជិះធ្វើសកម្មភាព និងទូរស័ព្ទ ។ ដោយឡែកជនសង្ស័យម្នាក់បានរត់គេចខ្លួនចូលក្នុងលូហើយជាប់យប់ព្រឹកឡើងក៏បានស្រែកហៅអោយអ្នកដំណើរជួយក៏បានរាយការណ៍ទៅនគរបាលនាំគ្នាយករថយន្តស្ទួចគាស់ បើកគម្រប់លូហើយ ឃាត់ខ្លួនបានម្នាក់ទៀត ៕
ចែករំលែកព័តមាននេះ