ខេត្តបាត់ដំបង៖ មុខសញ្ញាជួញដូរគ្រឿងញៀនយ៉ាងសកម្មចំនួន០២នាក់ ត្រូវបានសមត្ថកិច្ចធ្វើការស្រាវជ្រាវឃាត់ខ្លួនបានជាបន្តបន្ទាប់ កាលពីថ្ងៃទី២១ កុម្ភ: ដែលម្នាក់ត្រូវឃាត់ខ្លួននៅស្រុកឯកភ្នំ និងម្នាក់ទៀតឃាត់ខ្លួននៅក្រុងបាត់ដំបង ហើយថែមទាំងដកហូតវត្ថតាងថ្នាំញៀនបានជាង១០ថង់។
ប្រធានការិយាល័យប្រឆាំងគ្រឿងញៀន លោក សុខ និមល បានឱ្យដឹងថា ជនសង្ស័យឈ្មោះ វុន ណាវីន អាយុ២១ឆ្នាំ ត្រូវឃាត់ខ្លួននៅភូមិគោកដូង ឃុំពាមឯក ស្រុកឯកភ្នំ។ ជាមួយនឹងការឃាត់ខ្លួននេះ មន្ត្រីជំនាញដកហូតថ្នាំញៀនប្រភេទមេតំហ្វេតាមីន ICE (ម៉ាទឹកកក)ចំនួន១១ថង់។ ប៉ុន្តែជាង១ម៉ោងក្រោយ បន្ទាប់ពីជននេះបានសារភាព ទើបលោកស្នងការ និងលោកព្រះរាជអាជ្ញារ បញ្ជាឲ្យតាមឃាត់ខ្លួនបក្សពួកម្នាក់ទៀតឈ្មោះ ឃឿត សុឃុន អាយុ២១ឆ្នាំ នៅភូមិថ្កូវ សង្កាត់ក្ដុលដូនទាវ ក្រុងបាត់ដំបង ហើយដកហូតបានថ្នាំញៀនមេតំហ្វេតាមីន ICE (ម៉ាទឹកកក)ចំនួន០១ថង់ទៀត រួមទាំងវត្ថតាងពាក់ព័ន្ធមួយចំនួនទៀត។
បើតាមរបាយការណ៍បានឲ្យដឹងថា ជនសង្ស័យទាំង០២នាក់ខាងលើនេះ គឺជាមុខសញ្ញាដែលសកម្មបំផុតក្នុងមុខជំនួញគ្រឿងញៀន ដែលភាគច្រើនជនទាំង០២នាក់នេះធ្វើសកម្មភាពនៅក្នុងមូលដ្ឋាន។ ជននេះត្រូវកម្លាំងជំនាញ សហការជំមួមកម្លាំងមូលដ្ឋាន ធ្វើការឃាត់ខ្លួនពេលកំពុងប្រព្រឹត្តបទល្មើសជាក់ស្ដែង។ ជាមួយនឹងការឃាត់ខ្លួន មន្ត្រីជំនាញដកហូតវរត្ថុតាងបានសរុបចំនូន១២ថង់ មានទម្ងន់១១,៧៥ក្រាម រួមនឹងសម្ភារមួយចំនួនទៀត។
លោក សុខ និមល បានប្រាប់ថា ក្រោយឃាត់ខ្លួនមកសួរនាំ ជនសង្ស័យទាំង០២នាក់បានសារភាពទទួលស្គាល់វត្ថុតាងទាំងនោះថា ពិតជារបស់ខ្លួនមែន។ ពេលនេះមន្ត្រីជំនាញកំពុងរៀបចំសំណុំរឿងបញ្ជូនជនទាំង០២នាក់ រួមទាំងវត្ថុតាងផងទៅកាន់សាលាដំបូងខេត្ត ចាត់ការតាមផ្លូវច្បាប់ហើយ៕
ចែករំលែកព័តមាននេះ