ខេត្តកំពង់ស្ពឺ ៖ យុវជន២នាក់ជាជនមិនចូលផ្ទះ បោះបង់ចោលការសិក្សា មិនចូលសាលារៀន បែរជាមកសេពគប់គ្នាទៅរកស៊ីមុខរបរមិនស្របច្បាប់ ដោយដឹកជញ្ជូនថ្នាំញៀន១គីឡូក្រាមយកទៅលក់ ប៉ុន្តែប៉ះចំកម្លាំងសមត្ថកិច្ចដាក់អន្ទាក់ចាំចាប់ ក៏ជាប់ខ្នោះទាំងពីរនាក់តែម្តង ។…
ខេត្តកំពង់ស្ពឺ ៖ យុវជន២នាក់ជាជនមិនចូលផ្ទះ បោះបង់ចោលការសិក្សា មិនចូលសាលារៀន បែរជាមកសេពគប់គ្នាទៅរកស៊ីមុខរបរមិនស្របច្បាប់ ដោយដឹកជញ្ជូនថ្នាំញៀន១គីឡូក្រាមយកទៅលក់ ប៉ុន្តែប៉ះចំកម្លាំងសមត្ថកិច្ចដាក់អន្ទាក់ចាំចាប់ ក៏ជាប់ខ្នោះទាំងពីរនាក់តែម្តង ។
យុវជនទាំង២នាក់នោះ ម្នាក់ឈ្មោះ អ៊ិត វុទ្ធី ភេទប្រុស អាយុ២២ឆ្នាំ និងម្នាក់ទៀតឈ្មោះ ម៉ៃ ចិន ភេទប្រុស អាយុ១៦ឆ្នាំ ។
សូមបញ្ជាក់ថា កាលពីវេលាម៉ោង៤រសៀលថ្ងៃទី១៥ ខែកុម្ភៈ ឆ្នាំ២០២១ កម្លាំងសមត្ថកិច្ចជំនាញ (ក៤) នៃមន្ទីរប្រឆាំងបទល្មើសគ្រឿងញៀន ដឹកនាំដោយលោកឧត្តមសេនីយ៍ទោ ឃឹង សារ៉ាត់ ដោយមានការចូលរួមពីកម្លាំងជំនាញ នៃស្នងការដ្ឋាននគរបាលខេត្តកំពង់ស្ពឺ ក្រោមការសម្របសម្រួលដោយលោកជំទាវ ចាត សូរស្មី ព្រះរាជអាជ្ញាអមសាលាដំបូងខេត្ត បានបើកការស្រាវជ្រាវ បង្ក្រាបករណីជួញដូរគ្រឿងញៀន នៅចំណុចផ្លូវក្រោយសាលាខេត្តកំពង់ស្ពឺ ស្ថិតក្នុងភូមិទួលគោក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ បានមួយករណី និងធ្វើការឃាត់ខ្លួនជនសង្ស័យ២នាក់ ជាលទ្ធផលចាប់យកបានវត្ថុតាង ថ្នាំញៀនប្រភេទមេតំហ្វេតាមីន (ICE) ១កញ្ទប់ធំ ស្មើនឹងទម្ងន់ ៩៤៨,៩១ ក្រាម និងម៉ូតូ ១គ្រឿង ព្រមទាំងទូរស័ព្ទដៃ២គ្រឿងផងដែរ ។
សមត្ថកិច្ចបានឲ្យដឹងទៀតថា ជនសង្ស័យទាំង២នាក់ខាងលើនោះ ជាមនុស្សមិនចូលផ្ទះ បោះបង់ចោលការសិក្សា មិនសាលាទៅរៀន និងបានធ្វើសកម្មភាពល្មើសច្បាប់ ដោយដឹកជញ្ជូនគ្រឿងញៀន១គីឡូក្រាមដើរលក់ ទើបត្រូវសមត្ថកិច្ចចាប់ខ្លួន ។
ក្រោយពេលចាប់ខ្លួន ទាំងជនសង្ស័យ និងវត្ថុតាង ត្រូវបានសមត្ថកិច្ចកសាងសំណុំរឿង រួចបញ្ជូនទៅសាលាដំបូងខេត្តកំពង់ស្ពឺ ចាត់ការតាមនីតិវិធីច្បាប់ហើយ ៕
ចែករំលែកព័តមាននេះ