ខេត្តស្ទឹងត្រែង ៖ បុរសម្នាក់បានសម្រេចចិត្តបញ្ចប់ជីវិតខ្លួនឯង ដោយយកក្រណាត់មកចងភ្ជាប់.ក.ជាមួយនឹងចំរឹងបង្អួចក្នុងបន្ទប់ផ្ទះសំណាក់មួយកន្លែង ក្បែររង្វង់មូលកណ្តាលក្រុងស្ទឹងត្រែង ក្រោយពីអស់ជំរើសក្នុងការគេចខ្លួន ដោយសារតែដីកាតុលាការតាមលងជានិច្ច។ ហេតុការណ៍នេះ មិនបានភ្ញាក់ផ្អើលឈូឆរដល់មនុស្សម្នាឡើយ កាលពីវេលាម៉ោង១និង១០នាទីរសៀល…
ខេត្តស្ទឹងត្រែង ៖ បុរសម្នាក់បានសម្រេចចិត្តបញ្ចប់ជីវិតខ្លួនឯង ដោយយកក្រណាត់មកចងភ្ជាប់.ក.ជាមួយនឹងចំរឹងបង្អួចក្នុងបន្ទប់ផ្ទះសំណាក់មួយកន្លែង ក្បែររង្វង់មូលកណ្តាលក្រុងស្ទឹងត្រែង ក្រោយពីអស់ជំរើសក្នុងការគេចខ្លួន ដោយសារតែដីកាតុលាការតាមលងជានិច្ច។ ហេតុការណ៍នេះ មិនបានភ្ញាក់ផ្អើលឈូឆរដល់មនុស្សម្នាឡើយ កាលពីវេលាម៉ោង១និង១០នាទីរសៀល នាថ្ងៃទី២០ ខែកុម្ភៈ ឆ្នាំ២០២១ ព្រោះតែម្ចាស់ផ្ទះសំណាក់ រួមទាំងសមត្ថកិច្ច បានចុះពិនិត្យលក្ខណៈស្ងៀមស្ងាត់ ។
ទាក់ទិននឹងករណីខាងលើនេះ យោងតាមឯកសារសមត្ថកិច្ចពីខេត្តរតនៈគិរី បានបង្ហាញឲ្យដឹងថា បុរសដែលបានបញ្ចប់ជីវិតខ្លួនឯងខាងលើនេះមានឈ្មោះ មៀង សឹម ភេទប្រុស អាយុ២៧ឆ្នាំ ជនជាតិទំពួន មុខរបរធ្វើចំការ មានស្រុកកំណើតនៅភូមិលុងឃុង ឃុំលុងឃុង ស្រុកបរកែវ ខេត្តរតនៈគិរី មានឪពុកឈ្មោះ រីវ មៀង និងម្តាយឈ្មោះ សួង អាំ និងមានប្រពន្ធឈ្មោះ កា មានកូន២នាក់រស់នៅក្នុងបន្ទុកផងដែរ ។
តាមឯកសាររបស់សមត្ថកិច្ចដដែលក៏បានឲ្យដឹងដែរថា បុរសរូបនេះបានរត់គេចខ្លួនពីខេត្តរតនៈគិរី ខណៈពេលដែលសមត្ថកិច្ចកំពុងតាមចាប់ខ្លួន ដោយមានដីកាបង្គាប់ចេញពីលោក សួស ឡា ចៅក្រមស៊ើបសួរនៃអយ្យការអមសាលាដំបូងខេត្តរតនៈគិរី។ ហើយបុរសរូបនេះត្រូវបានតុលាការដាក់ឲ្យនៅក្រោមការត្រួតពិនិត្យ ពីបទ.ឃា.ត.ក.ម្ម.គិតទុកជាមុន ដែលបានប្រព្រឹត្តនៅភូមិលុងឃុង ឃុំលុងឃុង ស្រុកបរកែវ ខេត្តរតនៈគិរី កាលពីថ្ងៃទី០៦ ខែកុម្ភៈ ឆ្នាំ២០១៤ ។ ហើយបទល្មើសនេះដែលមានចែង តាមបញ្ញត្តិមាត្រា២០០ នៃក្រមព្រហ្មទណ្ឌ ជាបទល្មើសឧក្រិដ្ឋ ដែលត្រូវដាក់ពន្ធនាគា ពី១០ ទៅ១៥ឆ្នាំ ។
បើតាមប្រភពពីសាច់ញាតិបានឱ្យដឹងថា បុរសខាងលើនេះ គឺជាប់ពាក់ព័ន្ធដីកាចាប់ខ្លួនពីតុលាការ ដោយសារតែផ្តាច់ជីវិតប្រពន្ធកាលពី៧ឆ្នាំមុននៅភូមិ-ឃុំខាងលើ។ បុរសរូបនេះក្រោយពេលប្រព្រឹត្តបទល្មើសឧក្រិដ្ឋរួច ក៏បានរត់គេចខ្លួនរហូតមកដល់ពេលនេះ លុះពេលសមត្ថកិច្ចរកឃើញ គឺក្រោយពេលបុរសរូបនេះបានបញ្ចប់ជីវិតខ្លួនឯងក្នុងបន្ទប់ផ្ទះសំណាក់ក្បែរង្វង់មូល ស្ថិតនៅក្នុងភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង បាត់ទៅហើយ។
សូមបញ្ជាក់ថា នៅថ្ងៃកើតហេតុដដែលនោះ កាលពីវេលាម៉ោង៦ល្ងាច ម្ចាស់ផ្ទះសំណាក់ ក៏បាននិមន្តព្រះសង្ឃមកធ្វើកិច្ចបញ្ចៀសគ្រោះ ដើម្បីយកសពចេញពីផ្ទះសំណាក់មកប្រគល់ជូនក្រុមគ្រួសារសាច់ញាតិ យកទៅធ្វើបុណ្យតាមប្រពៃណីផងដែរ ៕
ចែករំលែកព័តមាននេះ