រាជធានីភ្នំពេញ ៖ កម្ពុជាបានបន្តរកឃើញជនជាតិចិន និងវៀតណាមសរុបចំនួន ១៥ នាក់ផ្សេងទៀតវិជ្ជមានកូវីដ ១៩ ជាប់ពាក់ព័ន្ធនឹងព្រឹត្តិការណ៍ សហគមន៍ ២០កុម្ភៈ…
រាជធានីភ្នំពេញ ៖ កម្ពុជាបានបន្តរកឃើញជនជាតិចិន និងវៀតណាមសរុបចំនួន ១៥ នាក់ផ្សេងទៀតវិជ្ជមានកូវីដ ១៩ ជាប់ពាក់ព័ន្ធនឹងព្រឹត្តិការណ៍ សហគមន៍ ២០កុម្ភៈ ដែលនាំឲ្យចំនួនអ្នកវិជ្ជមានកូវីដ១៩ នៃព្រឹត្តិការណ៍សហគមន៍លើកទី ៣ បានកើនឡើងប្រមាណ ៤៣ នាក់។
យោងតាមប្រកាសព័ត៌មានរបស់ក្រសួងសុខាភិបាលថ្ងៃទី ២១ ខែកុម្ភៈ បានឲ្យដឹងបន្ថែមថា ករណីរកឃើញវិជ្ជមានកូវីដ ១៩ សរុប គឺមានចំនួន១៧នាក់បន្ថែមទៀត ដែលក្នុងនោះ១៥នាក់ពាក់ព័ន្ធសហគមន៍២០កុម្ភៈ (មានជនជាតិចិនចំនួន១៤នាក់ និងវៀតណាម១នាក់) ចំនួន១នាក់ជាអ្នកដំណើរពីបរទេស និង១នាក់ទៀតជាពលករមកពីថៃ ដែលនាំឲ្យករណីកូវីដ១៩សរុបនៅកម្ពុជា គិតត្រឹមថ្ងៃនេះ ។
សម្រាប់អ្នកពាក់ព័ន្ធនឹងព្រឹត្តិការណ៍ ២០ កុម្ភៈ ក្រសួងក៏បានបញ្ជាក់ថា ១៥ ករណីវិជ្ជមានកូវីដ ១៩ ដែលជាប់ពាក់ព័ន្ធព្រឹត្តិការណ៍២០កុម្ភៈ គឺមានស្ត្រីជនជាតិចិនចំនួន ១១នាក់ បុរសចិនចំនួន ៣នាក់ និងស្ត្រីវៀតណាម១នាក់។ ដែលមកដល់ពេលនេះអ្នកជំងឺចំនួន ១៣នាក់ត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត និង៣នាក់នៅមណ្ឌលសុខភាពចាក់អង្រែ។
ក្រសួងសុខាភិបាលបានបញ្ជាក់ឲ្យដឹងបន្ថែមថា នៅថ្ងៃនេះក្រៅពីការរកឃើញមានការឆ្លងជំងឺកូវីដ១៩ថ្មីចំនួន១៧នាក់ ក៏មានអ្នកជំងឺ ៣ នាក់បានព្យាបាលជាសះស្បើយផងដែរ ក្នុងនោះ២នាក់ជាអ្នកដំណើរ និង១នាក់ជាពលករមកពីប្រទេសថៃ។
ចែករំលែកព័តមាននេះ