ខេត្តកណ្ដាល ៖ សេចក្តីរាយការណ៍បឋមឲ្យដឹងថា កាលពីវេលាម៉ោង១០និង៣០នាទីព្រឹកថ្ងៃទី១៨ ខែកុម្ភៈ ឆ្នាំ ២០២១ នៅចំណុចផ្ទះលក់ចាប់ហួយរបស់ឈ្មោះ លី វណ្ណា…
ខេត្តកណ្ដាល ៖ សេចក្តីរាយការណ៍បឋមឲ្យដឹងថា កាលពីវេលាម៉ោង១០និង៣០នាទីព្រឹកថ្ងៃទី១៨ ខែកុម្ភៈ ឆ្នាំ ២០២១ នៅចំណុចផ្ទះលក់ចាប់ហួយរបស់ឈ្មោះ លី វណ្ណា ជាកូនជនរងគ្រោះ ស្ថិតក្នុងភូមិទួលសង្កែ ឃុំកំពង់កុង ស្រុកកោះធំ ខេត្តកណ្ដាល មានករណីឃា.ត.កម្មមួយប្រព្រឹត្តដោយជនមិនស្គាល់មុខបានស.ម្លា.ប់ស្ត្រីវ័យចំណាស់ម្នាក់ រួចជនជាឃា.ត.ករបានគេចខ្លួនបាត់ ។
ជនរងគ្រោះឈ្មោះ ម៉េង ហ៊ាង ភេទស្រី អាយុ៦២ឆ្នាំ មុខរបរនៅផ្ទះ មានទីលំនៅៗ ភូមិទួលសង្កែ ឃុំកំពង់កុង ស្រុកកោះធំ ខេត្តកណ្តាល ។
ករណីខាងលើនេះ បើតាមការបំភ្លឺពីឈ្មោះ លី ផាន់ណេត ភេទប្រុស និងឈ្មោះ លី គុយអេង ភេទស្រី ត្រូវជាចៅបង្កើតរបស់ជនរងគ្រោះ បានឲ្យដឹងថា នៅមុនពេលកើតហេតុ ពេលព្រឹកព្រលឹមថ្ងៃ១៨ ខែកុម្ភៈ ឆ្នាំ ២០២១ នេះ ឪពុកម្ដាយ និងបងប្រុសរបស់ពួកគេ បានចេញទៅរកស៊ីដឹកទំនិញចាប់ហួយបាត់អស់ទៅ ចំណែកប្អូនប្រុសម្នាក់ទៀត ក៏ទៅរៀនបាត់ដែរ ។ នៅក្នុងផ្ទះមានតែពួកគេទាំង២នាក់ និងលោកយាយជាជនរងគ្រោះតែប៉ុណ្ណោះ ដោយបើកលក់ចាប់ហួយធម្មតា តែឈ្មោះ លី គុយអេង គឺសម្ងំនៅតែក្នុងបន្ទប់ពុំបានចេញក្រៅជួយលក់ដូរទេ ព្រោះរូបគេមានអាការៈឈឺចុកក្នុងពោះ ។
តាមប្រភពដដែលបានបន្តថា លុះនៅវេលាម៉ោងប្រមាណ៩និង៣០នាទីព្រឹកថ្ងៃដដែល ឈ្មោះ លី ផាន់ណេត បានទៅធ្វើប្រវត្តិរូបនៅផ្សារកោះធំ ហើយត្រឡប់មកដល់ផ្ទះវិញ នៅវេលាម៉ោងប្រមាណ១០ព្រឹក ពេលនោះគឺលោកយាយជាជនរងគ្រោះនៅកំពុងតែហូបបាយនៅលើគ្រែមុខផ្ទះ ។ ភ្លាមនោះដែរ ឈ្មោះ លី ផាន់ណេត ក៏បានជិះម៉ូតូយកប្រវត្តិរូបទៅដាក់ពាក្យធ្វើការ និងទៅយកប្អូនប្រុសដែលចេញពីសាលារៀនផងដែរ ខណៈនៅពេលដែលឈ្មោះ លី ផាន់ណេត ចេញទៅបានបន្តិច ឈ្មោះ លី គុយអេង ដែលដេកនៅក្នុងបន្ទប់ បានដាក់កាសទូរសព្ទ័សម្រាប់ស្ដាប់នៅរន្ធត្រចៀកសងខាង ដោយស្ដាប់ពុំសូវឮសំឡេងខាងក្រៅទេ ។
តាមប្រភពដដែលបានបន្តទៀតថា រហូតនៅវេលាម៉ោងប្រហែល១០កន្លះ ឈ្មោះ លី គុយអេង ដោយស្ងាត់សម្លេងជនរងគ្រោះ រូបគេក៏ដើរចេញមកមើល ស្របពេលគ្នានោះដែរ ឈ្មោះ លី ផាន់ណេត ក៏បានត្រឡប់មកដល់ផ្ទះវិញជាមួយប្អូនប្រុស ហើយនាំគ្នាដើរចូលទៅក្នុងផ្ទះ ស្រាប់តែបានឃើញលោកយាយជាជនងគ្រោះដេកដួលនៅក្នុងផ្ទះ រួចក៏បានស្រែកថា យាយដួលៗ ទើបឈ្មោះ លី គុយអេង រត់ទៅដល់ចូលទៅលើកត្រកងបីលោកយាយ ដែលដៃស្ដាំរបស់លោកយាយរងគ្រោះមានស្នាមមុតចេញឈាម និងស្នាមរលាត់ស្បែកត្រង់ក និយាយពុំរួច តែលោកយាយនៅដឹងខ្លួន និងបើកភ្នែក លើកដៃបាន ចំណែកឈ្មោះ លី ផាន់ណេត បានតេទូរស័ព្ទប្រាប់ទៅអាណាព្យាបាលខ្លួន និងប្រាប់បងប្អូនអ្នកជិតខាង ឲ្យមកជួយ ដោយមិនបានដឹងថាអ្នកណាវាយមកលើលោកយាយរបស់ពួកគេទេ ។ ភ្លាមៗនោះឈ្មោះ លី គុយអេង និងបងប្អូនអ្នកជិតខាង បានដឹកជនរងគ្រោះទៅព្យាបាលនៅ
មន្ទីរពេទ្យបង្អែកស្រុកកោះធំដែរ ប៉ុន្តែជាអកុសល លោកយាយជាជនរគ្រោះបានស្លា.ប់ពេលទៅដល់មន្ទីរពេទ្យ ។
ក្រោយពីទទួលបានព័ត៌មានខាងលើនេះភ្លាម លោកអធិការនគរបាលស្រុកកោះធំ បានបញ្ជាឲ្យកម្លាំងជំនាញ ទៅសហការជាមួយកម្លាំងនគរបាលប៉ុស្តិ៍កំពង់កុង និងចុះដល់កន្លែងកើតហេតុ ដើម្បីពិនិត្យ នឹងធ្វើការស្រាវជ្រាវស្វែងរកមុខសញ្ញាជាឃាតករ ។ តាមការពិនិត្យសពជនរងគ្រោះ រកឃើញមានស្លាកស្នាម ហើមជាំលើ.ក ក្រោមថ្គាមខាងស្ដាំ ហើមជាំ.កខាងស្ដាំ លើឆ្អឹងដងកាំបិត និងស្នាមមុតដាច់លើម្រាមដៃ និងខ្នងដៃខាងស្ដាំ ។
ក្រៅពីស្លាកស្នាមទាំងនេះ ពុំមានស្លាកស្នាមអ្វីផ្សេងទៀតឡើយ ដូចនេះការសន្និដ្ឋានរបស់សមត្ថកិច្ច គឺលោកយាយរងគ្រោះស្លា.ប់ដោយសាររងបួសយ៉ាងធ្ងន់ធ្ងរ អាចជាអំពើ ឃា.ត.កម្ម ។ ក្រោយពីពិនិត្យរួច សពលោកយាយរងគ្រោះត្រូវបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ