មនុស្ស១២នាក់ ឆ្លងដែនពីឡាវ ចូលខេត្តស្ទឹងត្រែង ក៏ត្រូវធ្វើចត្តាឡីស័ក ១៤ថ្ងៃដូចគ្នា
ខេត្តស្ទឹងត្រែង ៖ លោកឧត្តមសេនីយ៍ត្រី អៀង វ៉ាន់ ឌី មេបញ្ជារការកងរាជអាវុធហត្ថខេត្តស្ទឹងត្រែង នាព្រឹកថ្ងៃទី១៨ ខែកុម្ភៈ ឆ្នាំ២០២១…
ខេត្តស្ទឹងត្រែង ៖ លោកឧត្តមសេនីយ៍ត្រី អៀង វ៉ាន់ ឌី មេបញ្ជារការកងរាជអាវុធហត្ថខេត្តស្ទឹងត្រែង នាព្រឹកថ្ងៃទី១៨ ខែកុម្ភៈ ឆ្នាំ២០
២១ បានចុះត្រួតពិនិត្យកន្លែងធ្វើចត្តាឡីស័ក ស្ថិតនៅផ្ទះសំណាក់មួយកន្លែង ក្នុងសង្កាត់ស្រះឬស្សី ក្រុងស្ទឹងត្រែង ។
លោកឧត្តមសេនីយ៍ត្រី មេបញ្ជារការ បានឲ្យដឹងថា ក្នុងផ្ទះសំណាក់ ដែលកំពុងធ្វើចត្តាឡីស័ក នៅពេលនេះ មានមនុស្សចំនួន១២នាក់
ក្នុង នោះមានស្ដ្រី៤នាក់ (ក្មេងស្រី១នាក់) និងបុរស៨នាក់(ក្មេងប្រុស១នាក់) ។
លោកបានបន្ថែមទៀតថា ចំណុចសំខាន់ដែលត្រូវពង្រឹងបន្ថែម រួមមានការដាក់កម្លាំសមត្ថកិច្ចប្រចាំការតាមគោលដៅ និងយាមកាមឲ្យបានតឹងរឹង នឹងត្រូវធ្វើចត្តាឡីស័កឲ្យបានគ្រប់១៤ថ្ងៃ តាមវិធានការរបស់ក្រសួងសុខាភិបាល ចំពោះប្រជាពលរដ្ឋ និងពលករចំណាក់ស្រុកដែលវិលត្រឡប់ចូលមកម្ពុជាវិញ ។
អ្នកដែលកំពុងធ្វើចត្តាឡីស័កនៅក្នុងផ្ទះសំណាក់ខាងលើនោះ គឺជាអ្នកឆ្លងដែនមកពីប្រទេសឡាវ តាមច្រកត្រពាំងគ្រៀល ព្រំដែន កម្ពុជា-ឡាវ ហើយក៏ត្រូវបានក្រុមគ្រូពេទ្យ នាំយកមកធ្វើចត្តាឡីស័ក ចំនួន១៤ថ្ងៃ ដើម្បីយកសំណាកទៅពិនិត្យ និងទប់ស្កាត់ ក៏ដូចជា ការពារ និងជៀសផុតពីជំងឺ កូវីដ-១៩ ។
គួរបញ្ជាក់ថា ខេត្តស្ទឹងត្រែង គិតរហូតមកដល់ព្រឹកថ្ងៃទី១៨ ខែកុម្ភៈ ឆ្នាំ២០២១នេះ មិនទាន់មានករណីវិជ្ជមានកូវីដ-១៩ នៅឡើយទេ ។ ដូច្នេះយើងត្រូវស្ដាប់តាមការណែនាំរបស់ក្រសួងសុខាភិបាល ដើម្បីការពារ និងជៀសផុតពីជំងឺកូវីដ-១៩ ៕ ដោយ៖រ៉ូ សាលី
ចែករំលែកព័តមាននេះ