រាជធានីភ្នំពេញ ៖ សន្តិសុខយាមផ្សារម្នាក់ ត្រូវបានសន្តិសុខដូចគ្នា ប្រទះឃើញដេកស្លា.ប់នៅលើកៅអី បង្កការភ្ញាក់ផ្អើលកាលពីវេលាម៉ោង៦ និង៣០នាទីព្រឹកថ្ងៃទី១៨ ខែកុម្ភៈ ឆ្នាំ២០២១ នៅចំណុចផ្សារ…
រាជធានីភ្នំពេញ ៖ សន្តិសុខយាមផ្សារម្នាក់ ត្រូវបានសន្តិសុខដូចគ្នា ប្រទះឃើញដេកស្លា.ប់នៅលើកៅអី បង្កការភ្ញាក់ផ្អើលកាលពីវេលាម៉ោង៦ និង៣០នាទីព្រឹកថ្ងៃទី១៨ ខែកុម្ភៈ ឆ្នាំ២០២១ នៅចំណុចផ្សារ YT ស្ថិតតាមបណ្តោយផ្លូវជាតិលេខ១ ក្នុងភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ។
ជនរងគ្រោះមានឈ្មោះ ស្រី ឡុង អាយុ៥៥ឆ្នាំ មុខរបរជាសន្តិសុខរបស់ក្រុមហ៊ុន KPS មានស្រុកកំណើត ភូមិក្តីតាកុយ ឃុំវាលស្បូវ ស្រុកកៀនស្វាយ ខេត្តកណ្តាល និងមានទីលំនៅបច្ចុប្បន្ន ផ្ទះជួល ក្នុងសង្កាត់និរោធ ខណ្ឌច្បារអំពៅ ។
ជុំវិញហេតុការណ៍ខាងលើនេះ តាមការរៀបរ៉ាប់របស់ស្ត្រីជាប្រពន្ធឈ្មោះ ហៀង ស៊ីនីន អាយុ៥៣ឆ្នាំ អោយដឹងថា ប្តីរបស់នាងបានចូលបម្រើការងារជាសន្តិសុខ នៅក្រុមហ៊ុនសន្តិសុខ KPS ទើបតែបាន៣ខែប៉ុណ្ណោះ ។ ក្រោយមកក្រុមហ៊ុនបានចាត់តាំងប្តីខ្លួនអោយទៅយាមនៅផ្សារ YT ខាងលើតាំងពីថ្ងៃទី១៤ កុម្ភៈ មកម្លេះ ។
ស្ត្រីដដែលបន្តថា ដោយតាំងពីថ្ងៃទី១៤ មិនឃើញបុរសជាប្តីត្រឡប់ទៅផ្ទះសោះ នៅថ្ងៃទី១៧ ខែកុម្ភៈ នាងក៏តាមទៅរកដល់ផ្សារ YT ហើយក៏បានជួប តែត្រូវប្តីប្រាប់ថា មូលហេតុដែលមិនបានទៅផ្ទះ គឺមិនសូវស្រួលខ្លួន ណាមួយនៅតែមួយថ្ងៃទៀតទេ ខាងក្រុមហ៊ុន គេផ្លាស់អ្នកថ្មី អោយយាមជំនួសវិញហើយ នឹងបានទៅផ្ទះ ។ ឮដូច្នោះ ស្ត្រីជាប្រពន្ធក៏ត្រឡប់ទៅវិញ តាមការប្រាប់របស់ប្តី លុះព្រឹកស្អែកឡើង ស្រាប់តែមានគេទូរស័ព្ទ ប្រាប់ថា ប្តីគាត់ត្រូវស្លា.ប់ហើយ ។
សូមបញ្ជាក់ថា ជនរងគ្រោះ មានជំងឺលើសឈាមមកជាច្រើនឆ្នាំមកហើយដែរ ហើយមុនពេលស្លា.ប់ រូបគេបានលេបថ្នាំ ADIPIN (ថ្នាំលើសឈាម) អស់១គ្រាប់ក្នុងចំនួន១បន្ទះ ដែលមាន១០គ្រាប់ ។
ដោយឡែក បើតាមសម្តីបុរសម្នាក់ឈ្មោះ លី ថៃ ភេទប្រុស អាយុ២៣ឆ្នាំ ជាសន្តិសុខយាមនៅផ្សារខាងលើដូចគ្នា បានប្រាប់អោយដឹងថា នៅវេលាម៉ោង១០យប់ថ្ងៃទី១៧ គេសង្គេតឃើញជនរងគ្រោះ អង្គុយយាមធម្មតាតែម្នាក់ឯង នៅមុខផ្សារ បន្ទាប់មកខ្លួន ក៏ចូលទៅដេកនៅខាងក្រោយផ្សារ ។ លុះវេលាម៉ោង៥ទាបភ្លឺ ថ្ងៃទី១៨ ឈ្មោះលី ថែ ក៏បានក្រោក ហើយឃើញជនរងគ្រោះ ដែលយាមនៅមុខផ្សារពេញមួយយប់ បានដើរទៅខាងក្រោយវិញម្តង ។ រហូតដល់វេលាម៉ោង៦ និង៣០នាទីព្រឹកថ្ងៃខែដដែល ឈ្មោះ លី ថៃ ក៏បានដើរចូលទៅខាងក្រោយផ្សារដែល ជាកន្លែងសម្រាក ក៏ឃើញជនរងគ្រោះដេកស្តូកស្តឹងនៅលើកៅអីឈើ ។ ដោយឃើញសភាពដូច្នោះ លី ថៃ ក៏បានដើរ ទៅដាស ប៉ុន្តែដាសមិនក្រោកសោះ លុះស្ទាបដង្ហើមជនរងគ្រោះ ទើបដឹងថាផុតដង្ហើមបាត់ទៅហើយ ក៏ឈ្មោះ លី ថៃ បានរាយការណ៍ជូនម្ចាស់ផ្សារ ដើម្បីរាយការណ៍ជូនសមត្ថកិច្ចចុះអន្តរាគមន៍ ។
ក្រោយកើតហេតុ កម្លាំងសមត្ថកិច្ចមូលដ្ឋាន និងនគរបាលជំនាញ បានចុះពិនិត្យដល់ទីតាំងខាងលើ ដើម្បីពិនិត្យវិនិច័យ លើសាកសព ដើម្បីរកមូលហេតុ នៃការស្លា.ប់ ។
បន្ទាប់ពីពិនិត្យយ៉ាងល្អិតល្អន់រួចមក មន្ត្រីនគរបាលជំនាញ បញ្ជាក់ថា សពត្រូវបានស្លា.ប់ដោយសារគាំងបេះដូង ដែលបណ្តាលមកពីជម្ងឺលើសឈាមរបស់គេ ។ បច្ចុប្បន្ន សពត្រូវប្រគល់ជូនសាច់ញាតិ ដើម្បីយកទៅធ្វើបុណ្យតាមប្រពៃណី ៕ ដោយ ៖ លី ហេង
ចែករំលែកព័តមាននេះ