​ខេត្តព្រៃវែង៖ ឯកឧត្តម ជា សុមេធី អភិបាលខេត្តព្រៃវែង បានណែនាំ អោយកងកម្លាំង​ទាំងអស់ ដែលឈរជើង នៅតាមខ្សែបន្ទាត់ព្រំដែនកម្ពុជា-វៀតណាម ត្រូវរឹតបន្តឹង ចំពោះការលួចចេញចូលខុសច្បាប់របស់ប្រជាជននៃប្រទេសទាំងពីរ គោលបំណង ដើម្បីការពារទប់ស្កាត់ការឆ្លងរាលដាលជាអន្តរជាតិនៃជំងឺកូវីដ-១៩ ស្របតាម​សេចក្តីថ្លែង​សារពិសេសរបស់សម្តេច​អគ្គមហាសេបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

​​ឯកឧត្តម អភិបាលខេត្ត បានដាក់ចេញបទបញ្ជាដូច្នេះ ក្នុងពេលឯកឧត្តម ដឹកនាំគណៈកម្មការប្រយុទ្ធនិងជំងឺកូវីដ-១៩ ខេត្ត និងអាជ្ញាធរស្រុក រួមជាមួយស្ថាប័នពាក់ព័ន្ធ ចុះពិនិត្យកន្លែង​ធ្វើចត្តាឡីស័ក តាមបន្ទាត់ព្រំដែនកម្ពុជា-វៀតណាម ស្ថិតក្នុងតំបន់ស្នាក់ការច្រកទ្វារស្វាយអាង៉ោង ស្ថិតក្នុងស្រុកកំពង់ត្របែក ខេត្តព្រៃវែង កាលពីថ្ងៃទី១៦ ខែកុម្ភ: ឆ្នាំ២០២១។

​អាជ្ញាធរខេត្ត បាន​ចុះពិនិត្យទីតាំងចំនួន៤ រួមមាន: ១- ទីតាំងធ្វើចត្តាឡីស័ក ២- ប៉ុស្តិ៍នគរបាលការពារព្រំដែនគោក ស្វាយអាង៉ោង ៣-ទីស្នាក់ការច្រកទ្វារស្វាយអាង៉ោង និង៤- ច្រករបៀងអូរស៊ែរ។​

ឯកឧត្តម អភិបាលខេត្តព្រៃវែង ក៏បានផ្តល់ជូននូវគ្រឿងឧបភោគបរិភោគ និងថវិកាមួយចំនួន ជាការលើកទឹកចិត្តដល់កម្លាំង ដែលប្រចាំការនៅកន្លែង​ធ្វើចត្តាឡីស័ក តាមបន្ទាត់ព្រំដែន​ផងដែរ។

ឆ្លៀតក្នុងឱ​កាសនេះដែរ ឯកឧត្តម អភិបាលខេត្ត ក៏សូមអំពាវនាវដល់បងប្អូនប្រជាជន ទាំងកម្ពុជា និងវៀតណាម មិនត្រូវចល័តលួចឆ្លងដែនខុសច្បាប់ឡើយ ក្នុងដំណាក់កាលនេះ គឺអាចមានហានិភ័យខ្ពស់ ទាំងផ្នែកសន្តិសុខ និងសុខភាពផងដែរ។

ទន្ទឹមនឹងនេះ ដើម្បីការពារសុខភាពរបស់បងប្អូន និងក្រុមគ្រួសារ ក៏ដូចជាសុខភាពសាធារណៈ ឯកឧត្តមអភិបាល ក៏បានអំពាវនាវសូម​ឲ្យ​បងប្អូន ដែលឆ្លងដែនទាំងអស់ ​ត្រូវសហការជាមួយ​ក្រុមការងារចត្តាឡីស័កកម្ពុជា នៅតាមច្រកព្រំដែន កម្ពុជា-វៀតណាម ដើម្បី​យកសំណាកទៅពិនិត្យជំងឺកូវីដ-១៩ និងដាក់អោយធ្វើចត្តាឡីស័ក នៅព្រំដែន ចំនួន ១៤ថ្ងៃ បើទោះបីជាបងប្អូន​ឆ្លងចូលមកប្រទេសកម្ពុជា តាមច្រកណាមួយក៏ដោយ។ ម្យ៉ាងវិញទៀត បងប្អូន អាចប្រឈមនឹងការឃាត់ខ្លួន និងរងការពិន័យរបស់​អាជ្ញាធរកម្ពុជា ក្នុងពេលធ្វើដំណើរខុសនឹងបម្រាមរបស់អាជ្ញាធរកម្ពុជាយើង៕ ដោយ៖ ស៊ឹម សាន