ខេត្តបន្ទាយមានជ័យ ៖ នៅថ្ងៃទី១៩ ខែធ្ន ឆ្នាំ២០២៥ ឯកឧត្តមទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.)…
ខេត្តបន្ទាយមានជ័យ ៖ នៅថ្ងៃទី១៩ ខែធ្ន ឆ្នាំ២០២៥ ឯកឧត្តមទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក.) បានដឹកនាំក្រុមការងារ គ.ស.ម.ក. ចូលរួមចុះសុខទុក្ខវីរកងទ័ពខ្មែរ ប្រមាណជិត៤០នាក់ ដែលបានរងរបួស និងកំពុងសម្រាកទទួលការព្យាបាលនៅមន្ទីរពេទ្យមិត្តភាពកម្ពុជា-ជប៉ុនមង្គលបូរី ស្ថិតក្នុងខេត្តបន្ទាយមានជ័យ ដោយមានការចូលរួមពីសំណាក់លោក អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងលោកវេជ្ជបណ្ឌិត ទុ បារាំង ប្រធានមន្ទីរពេទ្យមិត្តភាពកម្ពុជា-ជប៉ុនមង្គលបូរី ផងដែរ។
ឆ្លៀតក្នុងឱកាសនោះ ឯកឧត្តមទេសរដ្ឋមន្ត្រី បានពាំនាំការផ្តាំផ្ញើសាកសួរសុខទុក្ខ និងការយកចិត្តទុកដាក់បំផុតពីសំណាក់ ឯកឧត្តមទេសរដ្ឋមន្ត្រី បានពាំនាំការសាកសួរសុខទុក្ខ និងការយកចិត្តទុកដាក់បំផុតពីសំណាក់ សម្តេចអគ្គមហាសេនាបតីតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដល់វីរកងទ័ព ដោយបានបញ្ជាក់ថា ការចុះមកសួរសុខទុក្ខនេះគឺជាការលើកទឹកចិត្ត និងគោរពដឹងចំពោះគុណូបការៈពុំអាចកាត់ថ្លៃបាន ដែលវីរកងទ័ពយើង ក៏ដូចជាក្រុមគ្រួសារ បានលះបង់សាច់ស្រស់ ឈាមស្រស់ក្នុងបុព្វហេតុការពារជាតិមាតុភូមិ និងបូរណភាពទឹកដីរបស់កម្ពុជា ពីសត្រូវឈ្លានពាន ។
ឯកឧត្តមទេសរដ្ឋមន្ត្រី ក៏បន្ថែមផងដែរថា ការប្រយុទ្ធតស៊ូក្នុងសង្គ្រាមដើម្បីការពារជាតិលើកនេះ គឺជាគំរូវីរភាពដ៏អង់អាច ក្លាហាន និងមោះមុតជាងពេលណាៗទាំងអស់ សម្រាប់យុវជនជំនាន់ក្រោយក្នុងការបណ្តុះស្មារតីស្នេហាជាតិ ព្រមទាំងបានធ្វើឱ្យប្រជាពលរដ្ឋខ្មែរទូទាំងកម្ពុជា និងក្រៅប្រទេសបានគោរពដឹងគុណ និងបានក្រោកឈរពួតដៃគ្នាវេញជាធ្លុងមួយជាមួយរាជរដ្ឋាភិបាល និងជាមួយវីរកងទ័ពជួរមុខក្នុងការប្រយុទ្ធប្រឆាំងនឹងខ្មាំងសត្រូវ។
ជាមួយគ្នានេះ ឯកឧត្តមទេសរដ្ឋមន្ត្រី ក៏បាននាំយកមកជូនវីរកងទ័ពនិងក្រុមគ្រួសារនីមួយៗ ដូចជាអង្ករ មី ត្រីងៀត ក្រម៉ា ថវិកា និងគ្រឿងឧបភោគបរិភោគផ្សេងៗទៀត ព្រមទាំងថវិកាមួយចំនួនដើម្បីឧបត្ថម្ភជូនដល់ខាងមន្ទីរពេទ្យ ដើម្បីប្រើប្រាស់តាមតម្រូវការចាំបាច់ផ្សេងៗ ផងដែរ ៕
ចែករំលែកព័តមាននេះ