រាជធានីភ្នំពេញ ៖ បុរសម្នាក់ពេលចេញពីកម្មវិធីនៅផ្ទះមិត្តភក្ដិវិញបានបើកបរម៉ូតូមួយគ្រឿងបោះពួយយ៉ាងលឿន លុះពេលមកដល់ចំណុចផ្លូវកោង សង្ស័យកាច់ចង្កូតបត់មិនទាន់ក៏រអិលដួលខ្ទាតអ្នកបើកបរម៉ូតូបោកក្បាលនឹងបង្កោលភ្លើងបំភ្លឺផ្លូវ បណ្តាលឱ្យបាត់បង់ជីវិតភ្លាមៗនៅនឹងកន្លែងកើតហេតុ ។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង៣ឈានចូលព្រឹកថ្ងៃទី១៧ ខែកុម្ភៈ ឆ្នាំ២០២១ ត្រង់ចំណុចខាងមុខបញ្ជាការដ្ឋានកងរាជអាវុធហត្ថរាជធានីភ្នំពេញ តាមបណ្ដោយផ្លូវវ៉េងស្រេង ស្ថិតក្នុងភូមិទ្រា៣ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
ជនរងគ្រោះឈ្មោះ គុយ វាសនា ភេទប្រុស អាយុ២៨ឆ្នាំ ស្នាក់នៅភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ ជាអ្នកបើកបរម៉ូតូមួយគ្រឿងម៉ាកហុងដា ស្គូពី ស៊េរីឆ្នាំ២០២១ ពណខ្មៅ ពាក់ស្លាកលេខ ភ្នំពេញ 1IL-8257 ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសរងគ្រោះជិះម៉ូតូមួយគ្រឿងទើបតែចេញពីកម្មវិធីនៅផ្ទះមិត្តភក្ដិម្តុំស្តុបណូគា ក្នុងគោលបំណងជិះត្រឡប់ទៅផ្ទះរបស់ខ្លួនវិញ។ ដោយធ្វើដំណើរតាមបណ្ដោយផ្លូវ២១៧ ក្នុងទិសដៅពីកើតទៅលិច និងក្នុងល្បឿនយ៉ាងលឿន។
តាមប្រភពដដែលបានបន្តថា លុះមកដល់ចំណុចកើតហេតុដែលជាផ្លូវកោង ជនរងគ្រោះបានជិះម៉ូតូបត់ស្ដាំឆ្ពោះទៅផ្លូវវ៉េងស្រេងដោយមិនបានប្រុងប្រយ័ត្ន ធ្វើឲ្យម៉ូតូរអិលដួលអូសជាច្រើនម៉ែត្ររងការខូចខាតបន្តិចបន្តួច ចំណែកបុរសរងគ្រោះបានខ្ទាតចេញពីម៉ូតូបោកក្បាលនឹងបង្គោលភ្លើងបំភ្លឺដែលនៅលើខឿនពុះចែកទ្រូងផ្លូវ បណ្តាលឲ្យបែកក្បាលបាត់បង់ជីវិតភ្លាមៗយ៉ាងអាណោចអាធ័ម ។ បន្ទាប់មកក៏មានសមត្ថកិច្ចមូលដ្ឋានបានចុះមកធ្វើការអន្តរាគមន៍ភ្លាមៗនៅកន្លែងកើតហេតុ ស្របពេលនោះដែរក៏មានបុរសជាមិត្តភក្ដិរបស់ជនរងគ្រោះចំនួន៣ទៅ៤នាក់បានមកដល់កន្លែងកើតហេតុ និងបានទាក់ទងទៅប្រាប់សាច់ញាតិរបស់ជនរងគ្រោះផងដែរ។
ក្រោយពេលកើតហេតុ ក៏មានសាច់ញាតិរបស់ជនរងគ្រោះបានមកដល់កន្លែងកើតហេតុ និងបានស្រែកទ្រហោយំឱបសពជនរងគ្រោះគួរឱ្យសោកសង្រេង ហើយសមត្ថកិច្ចជំនាញក៏បានធ្វើការប្រគល់សពបុរសរងគ្រោះឲ្យទៅក្រុមគ្រួសារដឹកយកទៅធ្វើបុណ្យទៅតាមប្រពៃណីនៅឯផ្ទះ។ ចំណែករីឯម៉ូតូរបស់ជនរងគ្រោះត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅអធិការដ្ឋាននគរបាលខណ្ឌមានជ័យរង់ចាំប្រគល់ទៅឲ្យក្រុមគ្រួសារជនរងគ្រោះវិញនៅពេលក្រោយជាបន្តទៀត ៕
ចែករំលែកព័តមាននេះ