ខេត្តបាត់ដំបង៖ ដីព្រៃលិចទឹកដែលស្ថិតនៅក្នុងតំបន់៣ ក្នុងភូមិសាស្ត្រនានា ក្នុងខេត្តបាត់ដំបង ដែលជាតំបន់ហាមឃាត់ដាច់ខាតមិនឲ្យមានការរំលោភបំពាន នៅតែរងការកាប់ទន្ទ្រានរំលោភយកធ្វើជាកម្មសិទ្ធ ដែលបង្កឡើងដោយពួកជនទុច្ចរិត ដែលគេសង្ស័យអាចមានមន្ត្រីខិលខូចមួយចំនួនជាអ្នកនៅពីក្រោយខ្នង នៃបទល្មើសទន្ទ្រានដីព្រៃក្នុងតំបន់ហាមឃាត់នេះ។ ជាក់ស្ដែង…
ខេត្តបាត់ដំបង៖ ដីព្រៃលិចទឹកដែលស្ថិតនៅក្នុងតំបន់៣ ក្នុងភូមិសាស្ត្រនានា ក្នុងខេត្តបាត់ដំបង ដែលជាតំបន់ហាមឃាត់ដាច់ខាតមិនឲ្យមានការរំលោភបំពាន នៅតែរងការកាប់ទន្ទ្រានរំលោភយកធ្វើជាកម្មសិទ្ធ ដែលបង្កឡើងដោយពួកជនទុច្ចរិត ដែលគេសង្ស័យអាចមានមន្ត្រីខិលខូចមួយចំនួនជាអ្នកនៅពីក្រោយខ្នង នៃបទល្មើសទន្ទ្រានដីព្រៃក្នុងតំបន់ហាមឃាត់នេះ។
ជាក់ស្ដែង កាលពីថ្ងៃទី១៥ កុម្ភៈ អាជ្ញាធរស្រុកសង្កែ សហការជាមួយមន្ត្រីជលផល បានចុះត្រូតពិនិត្យដីព្រៃលិចទឹកនៅក្នុង «តំបន់៣» ដែលជាតំបន់ហាមឃាត់ ក្នុងភូមិសាស្ត្រ ឃុំកំពង់ព្រះ បានរកឃើញមានការកាប់ទន្ទ្រានរំលោភយកដីថ្មីៗ ដែលបង្កឡើងដោយជនទុច្ចរិត តែអាជ្ញារធរបានអះអាងថា គេបានស្គាល់អត្តសញ្ញាណ ជនរំលោភបំពានដីព្រៃលិចទឹកនោះហើយ។
អភិបាលរងស្រុកសង្កែ លោក ហែម សុភ័ក្រ ដែលបានដឹកនាំកម្លាំងចុះពិនិត្យលើទីតាំងបទល្មើសផ្ទាល់ បានថ្លែងប្រាប់កោះសន្តិភាពនៅព្រឹកថ្ងៃទី១៦ កុម្ភៈ ដោយទទូលស្គាល់ថា «បើតាមការពិនិត្យជាក់ស្ដែង នៅតំបន់ព្រៃលិចទឹកនោះ ពិតជាមានការកាប់ទន្ទ្រានរំលោភយកដីធ្វើជាកម្មសិទ្ធមែន»។ លោកអភិបាលរង បានប្រាប់ថា ទីតាំងដែលលោកដឹកនាំកម្លាំងចុះត្រូតពិនិត្យនោះ ស្ថិតនៅក្នុង«តំបន់៣» ក្នុងភូមិសាស្ត្រ ឃុំកំពង់ព្រះ ដែលជាតំបន់ហាមឃាត់ដាច់ខាតមិនអនុញាតឲ្យកាប់រុនរាន។បើតាមពិនិត្យជាក់ស្ដែងនៅតំបន់នោះ គឺ មានស្នាមឈួសឆាយចាស់និងទើបឈួសឆាយថ្មីៗ។
បើយោងរបាយការណ៏បឋមពីមន្ត្រីដែលចុះទៅពិនិត្យទីតាំងនោះដែរ បានឲ្យដឹងថា តាមការពិនិត្យជាក់ស្ដែង ទំហំដីដែលជនទុច្ចរិតបានឈួសឆាយកាលពីឆ្នាំទៅម៉ិញ និង ទើបកាប់រានថ្មីៗនេះមានប្រហែលជាង៤០ហិចតា។ ទីតាំងដីព្រៃលិចទឹក ដែលពួកឈ្មួញកំពុងឈួសឆាយរំលោភបំពានយកនេះ នៅចំណុចបឹងកុល ស្ថិតក្នុងភូមិអណ្ដូងត្រាច ឃុំកំពង់ព្រះ ស្រុកសង្កែ។
លោក ហែម សុភ័ក្រ បានបញ្ជាក់ថា យើងមិនទាន់ដឹងពីទំហំដីជាក់លាក់ ដែលត្រូវបានរំលោភបំពាននោះនៅឡើយទេ ព្រោះខាងមន្ត្រីជលផលកំពុងធ្វើរបាយការណ៏នេះ។ ប៉ុន្តែយើងបានស្គាល់អត្តសញ្ញាណជនដែលកាប់ទន្ទ្រានរំលោភយកដីព្រៃលិចទឹកទាំងនោះហើយ។ ពេលនេះយើងកំពុងធ្វើរបាយការណ៏ដាក់ជួនតុលាការ ដើម្បីចាត់ការតាមនីតិវិធីច្បាប់។
ជុំវិញករណី កាប់ទន្ទ្រានដីព្រៃលិចទឹកនៅក្នុង«តំបន់៣» ក្នុងខេត្តបាត់ដំបង ពីសំណាក់ជនទុច្ចរិត ដែលគេអះអាងថា អាចមានការឃុំឃិតពីមន្ត្រីខិលខូចមួយចំនួនផងនោះ។ បច្ចុប្បន្នបទល្មើសនេះហាក់កំពុងកើតឡើងស្ទើរគ្រប់ទីកន្លែងនៅក្នុង«តំបន់៣»នៃទឹកដីបាត់ដំបង។ ដោយសារតែជនទុច្ចរិតបង្កើនសកម្មភាពកាន់តែគគ្លើនស្ទើរមិនអាចទប់ស្កាត់បាន ទើបអាជ្ញាធរខេត្តសម្រេចបង្កើតគណៈកម្មការចម្រុះ ដើម្បីបញ្ជូនកម្លាំងសមត្ថកិច្ចចុះទៅដេកយាមការពារដីព្រៃលិចទឹកនៅ«តំបន់៣»នោះតែម្ដង។
បើតាមសមត្ថកិច្ចបានប្រាប់ថា ដីព្រៃលិចទឹកនៅ «តំបន់៣» ដែលរងការកាប់បំផ្លាញយ៉ាងធ្ងន់ធ្ងរ រហូតអាជ្ញាធរសម្រេចបញ្ជូនកម្លាំងសមត្ថកិច្ចចម្រុះទៅបោះជំរុំដេកការពារនោះ មានទីតាំងនៅចំណុច«ក្រពើស្គម» ស្ថិតក្នុងភូមិសាស្ត្រ ឃុំព្រៃចាស់ ស្រុកឯកភ្នំ។ ហើយរហូតមកដល់ពេលនេះ កម្លាំងសមត្ថកិច្ចបានប្ដូរវេណគ្នាចុះទៅដេកយាមប្រចាំការអស់រយៈពេលជាង១ខែកន្លងមកហើយ។
ហើយបើតាមសមត្ថកិច្ចបានប្រាប់ថា កម្លាំងសមត្ថកិច្ចអាចដេកយាមដីព្រៃនៅតំបន់នោះ រហូតដល់រដូវវស្សា ទើបអាចដកកម្លាំងត្រឡប់ចូលអង្គភាពវិញបាន។ ព្រោះជនល្មើសនៅតែចិញ្ចិមចិត្តរងចាំឪកាសឆ្មក់ចូលរុករានបន្តទៀត ប្រសិនបើអាជ្ញាធរដកកម្លាំងចេញពីតំបន់នោះមុនពេលរដូវទឹកឡើង៕
ចែករំលែកព័តមាននេះ