រាជធានីភ្នំពេញ ៖ លោក កឹម សុខា អតីតប្រធានគណបក្សសង្គ្រោះជាតិបានបញ្ជាក់ថា លោកមិនបានហាមឃាត់បុគ្គលណា ឬក្រុមណាមួយ ក្នុងការបង្កើតគណបក្សនយោបាយថ្មីនោះទេ ។…
រាជធានីភ្នំពេញ ៖ លោក កឹម សុខា អតីតប្រធានគណបក្សសង្គ្រោះជាតិបានបញ្ជាក់ថា លោកមិនបានហាមឃាត់បុគ្គលណា ឬក្រុមណាមួយ ក្នុងការបង្កើតគណបក្សនយោបាយថ្មីនោះទេ ។ នេះបើតាមមេធាវីរបស់លោក ។
លោកស្រី ម៉េង សុភារី មេធាវីការពារក្តីឲ្យលោក កឹម សុខា បានសរសេរលើបណ្តាញសង្គម កាលពីថ្ងៃទី១៥ កុម្ភៈឆ្នាំ២០២១ថា« ដើម្បីជៀសវាងការភ័ន្តច្រឡំ ឬបកស្រាយខុសពីបំណងរបស់ឯកឧត្តម កឹម សុខា នាងខ្ញុំសូមជំរាបថា ឯកឧត្តម កឹម សុខា មិនបានហាមឃាត់ ឬរារាំង ឬចោទប្រកាន់បុគ្គល ឬក្រុមណាដែលបានបង្កើតបក្សនយោបាយ ឬចង់បង្កើតបក្សនយោបាយថ្មី ស្របតាមរដ្ឋធម្មនុញ្ញទេ» ។
លោកស្រីថា បំណងរបស់លោក កឹម សុខា គ្រាន់តែមិនចង់ឲ្យយកឈ្មោះ ឬករណីរបស់គាត់ទៅប្រើដូចមានក្នុងខ្លឹមសារនៃសេចក្តីថ្លែងការណ៍របស់សហមេធាវី ចុះថ្ងៃទី៧ ខែកុម្ភៈ ឆ្នាំ២០២១ កន្លងមក ។ លោកស្រីមេធាវីលើកឡើងថា ដូចយើងធ្លាប់ដឹងរួចមកហើយថា កន្លងមកមានបុគ្គលមួយចំនួនបានយកឈ្មោះ និងករណីរបស់ឯកឧត្តម កឹម សុខា ទៅភ្ជាប់ដូចជា ការប្រើពាក្យថា សមរង្សី កឹម សុខា ជាមនុស្សតែមួយ ហើយបានយកសារដែលមានឈ្មោះលោក កឹម សុខា ទៅធ្វើការរៃអង្គាស់ប្រាក់ ដែលមិនពាក់ព័ន្ធលោក កឹម សុខា ទាល់តែសោះ ក៏ដូចជាមានការយកឈ្មោះ លោកទៅភ្នាល់គ្នាការបង្កើតចលនា២ធ្នូ ដែលមិនមានការយល់ព្រម និងការគាំទ្រពីលោកកឹម សុខា ឡើយ ហើយករណីនេះសហមេធាវីរបស់លោក ក៏ធ្លាប់បានចេញសេចក្តីថ្លែងការណ៍ក្នុងនាមលោកកឹម សុខា រួចមកហើយកាលពីថ្ងៃទី២ ធ្នូ២០១៨ កន្លងមក ។
លោកស្រីបន្តថា ដោយឡែកថ្មីៗនេះមានបុគ្កល និងក្រុមមួយចំនួនដែលបានបង្កើតគណបក្សថ្មីៗ មានការភ្ជាប់ឈ្មោះលោកកឹម សុខា ផងដែរ ដើម្បីប្រយោជន៍គណបក្សថ្មីនោះ ។ លោកស្រីបន្ថែមថាលោក កឹម សុខា ចង់បញ្ជាក់ថាការបង្កើតគណបក្សនយោបាយណាមួយគឺជាសិទ្ធិរបស់បុគ្គលម្នាក់ៗ ប៉ុន្តែសូមធ្វើនយោបាយប្រកបដោយគុណធម៏និងត្រូវជឿជាក់លើសមត្ថភាពខ្លួនឯង ។
លោកស្រីមេធាវីថា« ដូចយើងដឹងស្រាប់ហើយថា ឯកឧត្តម កឹម សុខា បច្ចុប្បន្នកំពុងជាប់បំរាមរបស់តុលាការពាក់ព័ន្ធនឹងសកម្មភាពនយោបាយ ហេតុនេះសកម្មភាពនយោបាយសុំមិនអោយពាក់ព័ន្ធជាមួយឯកឧត្តម ឡើយ» ។ ជាមួយគ្នានោះដែរ លោកស្រីមេធាវីថា ការចេញសេចក្តីថ្លែងការណ៍ ចុះថ្ងៃទី៧ ខែកុម្ភ: ឆ្នាំ២០២១ គឺចង់បញ្ជាក់ជំហររបស់ឯកឧត្តមថា បុគ្គល ឬក្រុមណាដែលមានបំណងបង្កើត ឬបានកំពុងបង្កើត ឬបានបង្កើតគណបក្សនយោបាយ ឬចលនានយោបាយណាមួយ គឺឯកឧត្តមមិនពាក់ព័ន្ធឡើយ ដើម្បីកុំអោយមតិសាធារណៈជនមានការភ័ន្តច្រឡំថាឯកឧត្តម កឹម សុខា មានទំនាក់ទំនងនយោបាយជាមួយ ។
សូមជម្រាបថាការលើកឡើងរបស់មេធាវីបន្ទាប់ពីក្រុម លោក អ៊ូ ច័ន្ទរ័ត្នអតីតមន្ត្រីគណបក្សសង្គ្រោះជាតិរួមនឹងមន្ត្រីមួយចំនួនទៀតបានសម្រេចបង្កើតគណបក្សនយោបាយឈ្មោះថា៖«គណបក្សកែទម្រង់កម្ពុជា»ដែលគ្រោងនឹងដាក់ពាក្យស្នើសុំទៅក្រសួងមហាផ្ទៃនៅពេលឆាប់ៗនេះ ៕
ចែករំលែកព័តមាននេះ